2 Tesalonica 3 - Tagbanwa

Pagꞌangutun ni Pablo i panalangin it mga taga Tesalonica ngayti

¹ Paꞌugdun ku paꞌ nga beken, mga sulsug kat pamayaꞌ, pagꞌangutun namen it imyu nga ipagpanalangin mi kami isaꞌun madali-daliꞌ nga kapanlekep kat muꞌsa nga rugar i ampang ngaytu it Ampuꞌang Diyus, baw masagya gasiꞌ nga tanggapen nira it may galang nga subung it imyu.

² Beken paꞌ nga ipanalangin mit amen, iribri kami naga it Ampuꞌang Diyus kat mga taw nga buwal baw karaꞌe-raꞌetan nay nakapnuꞌ. Sabap ta, dakel i mga taw nga egay pamayaꞌ it ampang ngaytut Ampuꞌang Diyus.

³ Temed talagang daꞌtami pagpabaya-bayaꞌan it Ampuꞌang Diyus. Papaꞌgenen ya kamu baw tarimaen ya kamu isaꞌun daꞌkamu daꞌgen ni Satanas.

⁴ Baw kat keseg it pakilagpit tami it Ampuꞌan, pagsisiguruun namen nga pagbuwaten mi na baw ipasigi mi paꞌ nga buwaten i kumpur mga ipiyagꞌaat namen ngayan it imyu.

⁵ Ipagpanalangin namen duꞌun it Ampuꞌan nga sana padakulaꞌen ya nga banar i kasepsep mi it ega ngaytu basta-basta nga pagmaꞌal baw raras it Ampuꞌang Diyus it aten. Baw iyan paneꞌteꞌ ni Cristo maski pagpakuriꞌan, sana ipatantu yat imyu isaꞌun maguru mi.

Kaꞌilangan talaga nga magpaꞌres manulus

⁶ Palangbus, mga sulsug namen kat pamayaꞌ, ituy ipagsekat namen it imyu kat ngaran it Ampuꞌan nga si Jesu-Cristo. Ega na pakiꞌiba-ibaan mi i mga taw nga garusan baw ega magpangaꞌgenan uyun kat ipiyangadal namen it imyu.

⁷ Siguru in kamu ga, maꞌyag nat imyu nga yay kaꞌilangan mi nga guruun, buwat namen nga papaꞌres. Talagang ega maggarus kami manulus it iyan asan kami ngayan it imyu.

⁸ Ega maat pagkaꞌnen namen na lamang it ega pagbayadan i ipagbegay it amen. In daꞌga, talagang delem-aldaw magpaꞌres kami isaꞌun daꞌkami mabwat nga kasasawan it maski siyu asat imyu.

⁹ Sabagay may pudir namen nga pagastuꞌ it imyu. Temed ega. Imbis pagastuꞌ kami, isan yan ipiyalteg namen it imyu in magꞌuꞌunu talagay magayen nga pangaꞌgenan isaꞌun iyan i guruun mi.

¹⁰ Ka daꞌga baꞌ pirmi nga ipagꞌaat namen it imyu it iyan asan kami ngayan, nga ega subuꞌun i maski siyu it imyu nga paggarusan yay panulus?

¹¹ Siyangpit namen tu situt surat namen ngaytu ka nabaritaꞌan namen nga may beken asat imyu nga pagꞌindiꞌan nay sadili nga ipagkaꞌgen. Ega lamang atkayan, in daꞌga magpanasaw sira nagat pangaꞌgenan it beken.

¹² Kat ngaran it Ampuꞌan nga si Jesu-Cristo, ipagsekat baw ipagsasar namen it mga taw ngaytu nga patakenaꞌ it magayen baw manulus it sadili nga ipagkaꞌgen.

¹³ Temed kamu, mga sulsug namen kat pamayaꞌ, ayaw kamut paseked-seked kat mga buwat mi nga magayen.

¹⁴ Baw in may maniidan mi nga ega magsunud it mga inaat namen kat surat ngaytu, tatandaꞌanan mi kanya, baw ega na pakiꞌiba-ibaan mi isaꞌun magꞌeyaꞌ-eyaꞌ kanya.

¹⁵ Temed ega naga ipabetang mi kanya nga kakuntraꞌ mi, in daꞌga sardawun mi nga subung it esang sulsug.

Pangiyaꞌpusan nga sugi-sugid

¹⁶ Ta, ipagpanalangin namen duꞌun it Ampuꞌan nga puꞌun it kaꞌimbengan it nakem, nga maski unuy kabetangan mi, sana pirmi ya nga ipagbegay it imyu i kaꞌimbengan ngaytu. Baw sana pirmi nga kaꞌibaan mi nga muꞌsa i Ampuꞌan ngaytu.

¹⁷ Ta, pangiyaꞌpusan ngaytu nga sugi-sugid nga pangumusta, aku na mismu i magsurat. Talagang atkaytuy buwat ku kat kada surat nga ipagpataban ku kat paꞌari-aring rugar, isaꞌun pakimatuudun nga aku nga si Pablo talagay garing.

¹⁸ Ipagpanalangin namen nga sana pirming asat imyu nga muꞌsa i ildaw it Ampuꞌan nga si Jesu-Cristo.