2 Tesalonica 1 - Tagbanwa

¹ Mga pagmaꞌalen nameng mga sulsug kat pamayaꞌ nga asan it Tesalonica nga mga taawan na it Ampuꞌang Diyus nga Amaꞌ tami, kamu nga maglalagpit nat Ampuꞌan nga si Jesu-Cristo, wayan i surat namen, aku nga si Pablo, si Silas baw si Timoteo.

² Ipagpanalangin namen nga sana asat imyu nga pirmi i ildaw baw kaꞌimbengan it nakem nga ipagbegay it Diyus Amaꞌ baw Ampuꞌan nga si Jesu-Cristo.

Mga pasalamat baw ipagpanalangin na Pablo sabap it mga taga Tesalonica

³ Mga sulsug namen kat pamayaꞌ, dapat talaga nga magpasalamat kami nga pirmi duꞌun it Ampuꞌang Diyus sabap it imyu. Mapakay nga atkaytuy buwat namen sabap nasiguru namen nga talagang magmapaꞌgen i pamayaꞌ baw pagsarig mi it ki Cristo baw magsisigi paꞌ gasiꞌ nga, kada esat imyu, magdakulaꞌ i raras mi it esa may esa.

⁴ Aypaꞌ matuud nga pagdaya-dayawun namen kamu kat muꞌsa nga mga magpamayaꞌ. Kada malusadan namen nga rugar, ipagtuturan namen nga magpaneꞌteꞌ kamu kat pamayaꞌ mi nga nakaꞌunay na duꞌun it Ampuꞌang Diyus, maski na maat pirmi kamu nga magꞌiꞌigaꞌ kat tarep basiꞌ baw beken paꞌ nga mga kakuriꞌan nga paglabayen mi.

⁵ Talagang muꞌsa ngaytu, magpamatuud nga mataldeng mukuman i Ampuꞌang Diyus, nga ipabetang ya kamu nga mapakay mistar duꞌun it kaꞌadiꞌan ya, yanagang kaꞌadiꞌan nga pagpanindegan mi nga iyan i ipagkapakuriꞌ ngaytut imyu.

⁶ Baw sira ngayan nga magpakuriꞌ it imyu, siguradu nga belsen it Ampuꞌang Diyus it panriga, ka yay kataldengan nga pagꞌangutun nira kat panleteg ya.

⁷ Temed kamu nga pagpakuriꞌan, sang tamiyan nga awaꞌan it Ampuꞌang Diyus it muꞌsang mga kakuriꞌan, asan it ipaꞌuliꞌ ngayan it Ampuꞌan nga si Jesus nga garing duꞌun it langit, sang siraan it mga ega babasta-bastaen nga mga anghil ya.

⁸ Uyut nagat pangabut ya i magdidigalang nga apuy, baw rigaen yat kamatuudan i kumpur ega magkilala it Ampuꞌang Diyus baw ega magpamayaꞌ it Magayen ngaytung Baritaꞌ pasar it Ampuꞌan tami ngaytu nga si Jesus.

⁹ Talagang panriga it kanira, egay kaskedan nga kakuriꞌan, nga manupusan nang beblag nira it Ampuꞌan baw kabantugan it guna ya.

¹⁰ Magꞌabut yan i muꞌsa ngaytu kat aldaw ngayan nga ipaꞌuliꞌ ni Jesu-Cristo. Paꞌuliꞌ kanya isaꞌun matanyag i kabantugan ya kat muꞌsang mga taawan ya nga inawaꞌan ya nat kasalaꞌan. Talagang bantugun kanya sabap it kalililuꞌan nga binwat ya kat pangaꞌgenan it kumpur magpamayaꞌ it kanya. Siguradu nga uyut kamuy imyu sabap piyakimatuud baw piyamayaꞌ mi i Magayen ngaytung Baritaꞌ nga ipiyangadal namen asat imyu.

¹¹ Aypaꞌ ka pirmi namen kamu nga ipagpanalangin duꞌun it Ampuꞌang Diyus. Pagꞌangutun namen nga sana tabangen ya kamu it mangaꞌgenan uyun kat pangaꞌgenan nga pagsagyaan ya, nga bagay it mga taw nga piyanakman ya nga pasakep it kanya. Baw sana, kat guna ya, tabangen ya kamu isaꞌun matuman i kada pagpikiren mi nga magayen, nga mga kuꞌadaten u kubwaten mi sabap it pamayaꞌ mit kanya.

¹² Ta simpri, in atkayan, daꞌga mabgayan mi it kabantugan i ngaran it Ampuꞌan tami nga si Jesus? Ta, kamu gasiꞌ, begayan gasiꞌ it kabantugan, uyun kat kaꞌildaw it Ampuꞌang Diyus tami baw Ampuꞌan nga si Jesu-Cristo.