2 Samuel 7 - Tagbanwa

Kupatindeg si David it papagsambaang balay

¹ Nakatiꞌen-tiꞌen na si David kat balay ya nga balay it adiꞌ. Baw sabap it tabang it AMPUꞌANG DIYUS it kanya, naꞌlay nang ega nay magpanrumpak.

² Ta it atkayti, ipiyatawag ya i prupitaꞌ nga si Natan. Siyugi-sugid ya nga magꞌaat, “Kayti magkaltegan mu nga pagtataꞌidan ku, mabakas na nga pamalay-balay ka buwat-buwat ya purus tablaꞌ nga sedro. Temed iyan Kaban it Pakiꞌupakat it Ampuꞌang Diyus, duꞌun lamang it magkapuru-purun nga bala-balay.”

³ Katubag si Natan ngayti, maat ya, “Magayen yan i magkapikir mu ngayan nga kubwaten mu. Ipatabus mu lamang sabap magkaꞌrutan ku nga pagpanguꞌnaan ka nga pirmi it AMPUꞌANG DIYUS.” (Maski napikir ni David nga yay kubwaten ya, ega natabus ya ka may ampang it Ampuꞌang Diyus nga miyabut duꞌun it prupitaꞌ ngayting si Natan nga magꞌaat, “Aduꞌunun mu si David. Aaten mu nga ega kanya i kapatindeg it balay ku ngaytu. Ipatindeg manaytu it esang anak ya nga sumubli it kanya.” Natuman tu kat timpu ni Solomon. Papagsambaan ngayting ipiyatindeg nira, piyangaranan nirat Templo.)