2 Samuel 12 - Tagbanwa

Biyasul si David, langkuy nagsinguliꞌ kanya

¹ Aypaꞌ tiyaꞌeg it AMPUꞌANG DIYUS i prupitaꞌ nga si Natan nga paꞌaduꞌun it ki David. Pagꞌabut, maat i inaat ya, “Duꞌut esang lansangan may duwang kalalakiyan. Manggaden i sangbat, iyan esa, miskin.

² Matupaen baw mabakaꞌen nga banar i manggaden ngayti.

³ Iyan miskin ngayti, pasasangba-sangbat i babay nga uybu-uybun it tupa i kanya. Impet ya it subung nagat pagꞌepet yat mga anak ya, pagkapu-kapuꞌputun ya nga ipagpasbung ya nat anak ya. Pagsaduun yat pangaꞌen baw pagsakpen yat danum nga pagꞌimnun ya.

⁴ Kaꞌsa may bisitaꞌ nga miyabut duꞌun it manggaden ngayti. Ta, it ega ireg ya nga kat sadili ya nga mga tupa i pisiꞌan it karniꞌen, iti na, kat miskin ngayti, i pinsiꞌ ya nga inimatay nga ipiyasdaꞌ ya it miyabut ngayti duꞌut kanya.”

⁵ Pagkagneg kayti ni David nakawarak-warak it iseg. Maat ya, “Pagdedngegen ta it AMPUꞌANG DIYUS, bagay it atkayang taw, ega egnen!

⁶ Baw kaꞌilangan pabayadan it kanya it epat nga dubli i binwat ya ngaytu, sabap ega siyanguꞌan yay miskin ngayti.”

⁷ Iriyapar na ni Natan it ki David ngayti, maat ya, “Ikaw na ngaytu bay paꞌaaten ngayting manggaden. Ta kayti, iyan AMPUꞌANG DIYUS it bangsa ta ngaytung Israel, ituy inaat ya pasar it imu. ‘Ipiyasiguru ku ikaw nga magꞌadiꞌ it bangsa ngaytu nga Israel. Irinibri ku paꞌ ikaw kat alima ni Saul.

⁸ Ibinggay ku paꞌ it imu i pamalay-balay baw mga asawa it agalen mu nga si Saul, pati kaꞌadiꞌan gasiꞌ it Israel baw Juda. Ta in kurang payan, may subraꞌ paꞌ sikayan nga makabgay ku.

⁹ Ta unuka biyalalaꞌan mu na i ampang ku, aku nga AMPUꞌANG DIYUS, baw minwat ka it talagang pagraꞌwayen ku? Ipiyaꞌimatay mu si Urias baw siyadili muy asawa ya ngaytu. Eeꞌ baꞌ, talagang matuud nga ipiyabunuꞌ mu it mga Ammonita i Heteo ngayti nga si Urias isaꞌun lamang maꞌimu i asawa ya.

¹⁰ Ta it binwat muy atkaytung kaꞌulugan, nga biyalalaꞌan mu na aku nga AMPUꞌANG DIYUS, tandaꞌanan muytu nga pirming may mabunuꞌ kat kaꞌanak-anakan mu.’

¹¹ Maat pay beken nga inaat it AMPUꞌANG DIYUS, ‘May palabanen kut imu kat seled it pamalay-balay mu. Kat adapan mu ibgay kut kanya i mga asawa mu. Magdadaran sira kat muyagan it maski aldawun.

¹² Binwat muytu kat lingeb, muyagan nga rigaen ku ikaw. Maltegan tu it kapuꞌsaan it bangsa ngaytu nga Israel.’”

¹³ Pagkagneg ni David kayti, maat ya it ki Natan ngayti, “Matuud na bayan nga nagkasalaꞌan aku duꞌun it AMPUꞌANG DIYUS.” Katubag i prupitaꞌ ngayti, “Ta it inamin mu nagay kasalaꞌan mu, pasinsiyaen ya naga yan ikaw. Daꞌka naga yan matay.

¹⁴ Takaꞌ sabap it binwat mu ngaytu, masudi-sudi naytuy AMPUꞌANG DIYUS it mga bangsa nga kalaban ya. Aypaꞌ matay i anak mu ngayan.”

¹⁵ Bawnga miyuliꞌ na si Natan. Tiyuman nga matuud it AMPUꞌANG DIYUS i inaat ya ngayti. Iyan anak ni David duꞌut siyubli ya ngayting asawa ni Urias, simnarut it maꞌget.

¹⁶ Binwat ni David, nagpasanguꞌ-sanguꞌ duꞌun it Ampuꞌang Diyus nga pagayenen i waꞌwaꞌ ngayti nga magsarut. Nagpuwasa kanya baw delem-delem maglinag i bubuntul ya duꞌut kadaꞌtagan it magparadak na lamang.

¹⁷ Inaduꞌun kanya it mga sarig-sarigan nga kat seled it pamalay-balay ya ngayti, inaluꞌaluk kanya nga ega naga pabuntul duꞌut kadaꞌtagan ngayti, temed ega magkaꞌunu-unu nira. Maski pangaꞌen ega magsukdan.

¹⁸ Pagꞌikapitu nga aldaw, natay na i waꞌwaꞌ ngayti. Egay magkaꞌurum sumugid duꞌut ki David ngayti, ka pagpipikiren nirang, “In ega magkaꞌaluꞌaluk kanyat egen pay waꞌwaꞌ, simpri subraꞌ nang tumalaluꞌ yan it natay na. Barang muwat paꞌ kanya it ega magayen.”

¹⁹ Ta it namuyaan ni David nga mamagyeꞌye-yeꞌyepen i mga taawan ya, timindag kat nakem ya nga natay na i waꞌwaꞌ ngayti. Aypaꞌ miningkut kanya, “Unu,” maat ya, “natay na i waꞌwaꞌ?” “Eeꞌ, Agalen namen, miyatay na.”

²⁰ Pagkagneg ni David, timnindeg na kanya, langkuy namaꞌyuꞌ baw nagpakay siꞌ it magayen. Siminled kanya duꞌut papagsambaan nirat AMPUꞌANG DIYUS ka nanalangin baw simnamba it AMPUꞌANG DIYUS. Pagkatupus ya miyuliꞌ na ka nagpatarakan nat pangaꞌen.

²¹ Iningkut kanya it mga taawan ya ngayti, “Agalen namen,” maat nira, “unu baytuy buwat mu ngaytung atkaytu? Ka iyan egen paꞌ ngayan i waꞌwaꞌ, nagpuwasa ka baw pagsugawan mu kanya. Ta kayti nga patay na kanya, nanlimpiyuꞌ ka na baw kimnaꞌen ka na gasiꞌ.”

²² Katubag si David, maat ya, “Iyan magsarut paꞌ i waꞌwaꞌ, nagpuwasa aku baw magtegel it sugaw ka napikir ku, barang-barang sanguꞌan aku naga it AMPUꞌANG DIYUS. Pagayenen ya i anak ku ngayan.

²³ Ta it kayti nga patay na kanya, unuka magpuwasa aku paꞌ? Unu, makapaꞌuliꞌ ku paꞌ asat kanya i ginawa ya? Urut ku nga mga kaꞌnu-kaꞌnung timpu makatundug aku nagayat kanya, temed maski unu-unuꞌun ku paꞌ, ega nayan kaꞌuliꞌ kanya situt aken.”

²⁴ Biyanga-bangay na ni David si Bat-seba baw nagꞌulid siꞌ sira. Nagdarugmatiꞌ siꞌ i asawa ya ngayti. Sumakit, lalaki. Si Solomon i ipiyangaran nira. Miyaꞌal it AMPUꞌANG DIYUS i waꞌwaꞌ ngayti.