2 Samuel 11 - Tagbanwa

Si David baw si Bat-seba

¹ Pagsaylu sit taꞌun, iyan timpu siꞌ nga magayeng ipagpakibunuꞌ, piyasulung siꞌ ni David i muꞌsang sundaluꞌ it Israel. Piyakapagbayaꞌen nga si Joab i magpanguꞌnaan. Dakel i piyangimatay nira nga mga Ammonita bawnga kiyulung nira i Rabba nga puꞌun nga siyudad it mga Ammonita ngayti. Temed si David ngayti, duꞌun nagat Jerusalem, ega miyayat kanira.

² Kaꞌsang apun, minigaꞌ si David. Pagkasulag ya it apu-apun na, miyapyat duꞌut mapatag nga atep it mabakas ngayting balay ya. Ta it duꞌun na kanya magpanaw-panaw, may nalawag ya nga magpamaꞌyuꞌ nga babay nga masyadung kadaraga.

³ Ipiyapariksaꞌ ya in siyuyti nga babay. Nasugid duꞌut kanya nga anak kanya ni Eliam, si Bat-seba i ngaran. Pagꞌaꞌasawaen it Heteo nga si Urias i ngaran.

⁴ Ta, ipiyapisiꞌ ni David si Bat-seba ngayti nga yapay katiwas ya it adat nira nga paglimpiyuꞌ in pagduguꞌun. Inulid kanya ni David bawnga piyaꞌuliꞌ naga.

⁵ Ta, sabap it iti nga kaꞌulugan nagdarugmatiꞌ si Bat-seba. Ipiyasugid ya duꞌut ki David nga piyagsipatan kanya.

⁶ Pagkaꞌrut ni David, may piyapanaw ya duꞌut piyakapagbayaꞌen ngaytit sundaluꞌ ya nga si Joab. Tinggunan ya nga paꞌuliꞌen daꞌan duꞌut Jerusalem si Urias.

⁷ Pagꞌabut ni Urias, iningkut kanya ni David nga magꞌaat, “Kumusta naga si Joab baw kadaklan it mga sundaluꞌ ta? Talaꞌga?” Maat ya pang beken, “Unuy pagbara-baraꞌan it pakibunuꞌ mi duꞌun?”

⁸ Bawnga inaat ya si Urias ngayti, “Magayen,” maat ya, “muliꞌ ka daꞌan duꞌut imyu isaꞌun kapaꞌna ka, ka alaid ti i giyaringan mu ngayti.” Aypaꞌ napanaw na si Urias ngayti. Binggayan paꞌ it adiꞌ ngayti si Urias it pangaꞌen nga iꞌabut ya duꞌut balay.

⁹ Temed ega limnangbus si Urias duꞌut balay nira. Duꞌun i inigaꞌan ya it puwirtaꞌan it mabakas ngayting balay it adiꞌ, nagpakiꞌigaꞌ na duꞌut mga guwardiya it puwirtaꞌan.

¹⁰ Pagkaꞌrut ni David it ega limnangbus si Urias, maat yat kanya, “Unu, daꞌka pagꞌildawun it yapay abut mu it garing ka ngaytu duꞌut alaid? Unuka daꞌka limnangbus duꞌut imyu?”

¹¹ Maat i tubag ni Urias, “Iyan Kaban it Pakiꞌupakat it AMPUꞌANG DIYUS baw mga sundaluꞌ it Israel baw mga sundaluꞌ it Juda, duꞌun lamang it mga bala-balay nga magkapuru-purun. Ta it alaid duꞌut babalayan i pagꞌigaꞌan it agalen ku nga si Joab baw mga sundaluꞌ mu, kat atkaytung kabetangan nira talagang mabeꞌgat i nakem ku nga lumangbus aku duꞌut balay namen isaꞌun lamang kaꞌulid akut asawa ku. Talagang pagdedngegen aku it AMPUꞌANG DIYUS, ega talaga mabwat ku yan.”

¹² Maat siꞌ ni David it ki Urias ngayti, “Magayen siguru situ ka daꞌat kayting aldaw. Dedelem mana i igaring mu.” Aypaꞌ duꞌun paꞌ it Jerusalem si Urias it iting aldaw.

¹³ Inimbitar ni David si Urias it pakikaraꞌnen duꞌut kanira. Piyalanguwan ni David si Urias ngayti, takaꞌ ega naga limnangbus si Urias duꞌut kanira it pagdelem. Duꞌun nagay inigaꞌan ya it mga guwardiya ngayti.

¹⁴ Pagꞌeyag it aldaw, simnurat si David duꞌun it ki Joab, ipiyataban ya nat ki Urias ngayti.

¹⁵ Maat i duꞌun it surat ya, “Isara mu si Urias kat mga maꞌiꞌiseg nga mga kalaban mi. Pagkaꞌanu kayan paꞌatrasen muy beken, pataꞌnan mu nga mapatay kanya.”

¹⁶ Pagkabasa ni Joab it surat ngayti, nagbaklay-baklay kanya duꞌut pagkukulungun nira ngayti nga siyudad. Pagkamuya ya in ariyen manggid i may maꞌiꞌiseg nga mga kalaban nira, duꞌun nay piyatarbukan yat ki Urias.

¹⁷ Pagpanliꞌwan it mga kalaban nira nga garing duꞌut siyudad ngayti, diyarugpaꞌ niray mga taawan ngayti ni Joab. May napatay nirang mga sundaluꞌ ni David, uyut na si Urias.

²⁶ Pagkabaritaꞌ ni Bat-seba it napatay nay asawa ya ngayti, pinlawan ya naga.

²⁷ Iyan naꞌayaw nay pulaw ngayti, ipiyapisiꞌ na kanya ni David ka nagꞌasawa na sira. Sumakit i pagbebtengen ngaytu ni Bat-seba, lalaki. Temed talagang riyaꞌwayan nga banar it AMPUꞌANG DIYUS i binwat ngayti ni David.