2 Pedro 3 - Tagbanwa

Talagang paꞌuliꞌ naga situ i Ampuꞌan nga si Jesu-Cristo

¹ Mga pagmaꞌalen ku, itu ngaytung surat ku, ikadwa naytu nga surat ku asat imyu. Baw kat duwa na ngaytu nga surat ku, pagpaꞌresan ku nga banar nga ipademdem it imyu i mga in pirang bagay nga sulag kut imyu kat pikir nga magayen.

² Ka iyan bay ireg ku, egen nga pirmi kat nakem mi i mga isiyugid it mga ipiyatindeg it Ampuꞌang Diyus nga mga prupitaꞌ it tagnaꞌ paꞌ, baw iyan mga ipiyagꞌurdin gasiꞌ it Ampuꞌan tami nga si Jesu-Cristo nga Manriribri tami. Kami ngaytu nga mga apustul mi i nangadal it imyu it mga iti ngayti.

³ Uꞌnat muꞌsa nga kaꞌilangan mi nga maꞌrutan, in magdadarapaꞌ nay umur it banwa, abutun kamu it mga mamagsumbayaꞌ it sadiling kaꞌirgan nga maraꞌe-raꞌet, baw buwaten nira na kamu nga kasesleman sabap it pamayaꞌ mi.

⁴ Ka maat yan i aaten nira, “Daꞌga baꞌ sanggup ni Cristo nga paꞌuliꞌ naga kanya? Ta ari na, ka daꞌga paꞌ kayti? Magkaꞌubus nat matay i mga giyaringan tami, temed ungaytu ega pay kanya. Talagang ega bay piyagbelagan, ka isan bat magpanunsun nagay muꞌsa it pabetang-betang it banwa garing it pagguna.”

⁵ Temed iyan pagꞌaaten nira nga egay piyagbelagan, talagang egay matuud ya kayan. Ka paglipaten nira lamang i panriga nga tiyunaw i banwa. Ka daꞌga baꞌ, iyan langit baw banwa, giyuna kat keseg it ampang it Ampuꞌang Diyus? Giyuna yang danum i giyamit ya kat pagguna ya it banwa, baw sabap it danum magpaneꞌteꞌ i muꞌsa ngaytu nga giyuna.

⁶ Baw danum nagay giyamit ya iyan tiyunaw yay banwa.

⁷ Baw ta, talagang mabut siꞌ nga, kat keseg nagaytut ampang ya, ranggaꞌen ya siꞌ i ega na desang banwa, in daꞌga pati langit gasiꞌ, ka antengen ya na. Magꞌaꞌareg i panranggaꞌ ngaytu kat aldaw nga ipangukuman, nga rigaen ya nat ega makatindeg i mga taw nga pirming pagkuntraꞌen niray kaꞌirgan ya.

⁸ Temed ta, mga pagmaꞌalen ku, ega lipa-lipaten mi tu, nga pabetang it Ampuꞌang Diyus it timpu, belag it aten. Sabap kat panemdem it Ampuꞌang Diyus, maski sang aldaw lamang u sang ribu na nga taꞌun, subuk nagsubung nga ega maꞌlay nga timpu. Madaliꞌ tumaꞌlib.

⁹ Aypaꞌ it belag i kanya nga pabetang it timpu, ega maꞌaat ta nga subung it patandes it beken, nga sanggup ya ngaytu sabap it pamaꞌuliꞌ situ ni Jesu-Cristo, sanggup lampud na lamang ka ega paꞌ tiyuman ya. Temed yay matuud, ega paꞌ tiyuman ya sabap lamang it kadakulat sanguꞌ yat aten nga muꞌsa. Ka pagbegayan ya pat rugar i kadakel, nga makapagsinguliꞌ baw mangindiꞌ it kasalaꞌan nira. Ka talagang ireg ya nga maribri i muꞌsa, nga egay maski siyu nga kaꞌaduꞌun it egay kaskedan nga kakuriꞌan.

¹⁰ Temed ta, maski atkayan i ireg ya, mabut talagay aldaw nga tumanen yay sanggup ya ngaytung ranggaꞌen ya nay banwa. Kaꞌalimbawaan it pamaꞌuliꞌ ngaytut Ampuꞌan, subung it mananakaw nga ega magkaꞌrutan i ipanakaw ya. Temed kat iyan na nga aldaw, iyan langit, biglaꞌ nga maꞌawaꞌ, dengan it dagurdur. Baw maranggaꞌ nga maꞌanteng it talagang magkaꞌansur i muꞌsang paryaman ya. Atkayan naga i banwa, pati muꞌsang betang ya, maꞌansur gasiꞌ.

¹¹ Ta it atkaytuy mabetangan it muꞌsa ngaytung mga bagay, kaꞌilangan nga isiguru mi nay pangaꞌgenan mi nga alaid kat muꞌsang kasalaꞌan, baw uyun talaga kat kaꞌirgan it Ampuꞌang Diyus.

¹² Kaꞌilangan paꞌres kamung banar it mga itu ngaytu, mintras pagꞌelaten mi i aldaw ngaytu nga ipiyagtirminu ya. Paꞌres isaꞌun madali-daliꞌ nagay pangabut it iyang aldaw. Sabagay kat aldaw ngayan, maꞌanteng nay langit baw matunaw nay muꞌsang paryaman.

¹³ Temed talagang magayen i pagꞌiꞌinawaren tami nga ipiyagsanggup it Ampuꞌang Diyus. Ka pagsisiguruun tami i baꞌgung langit baw baꞌgung banwa nga ega masledan it maski unu nga maraꞌe-raꞌet, in daꞌga purus kataldengan.

¹⁴ Aypaꞌ mga pagmaꞌalen ku, mintras pagꞌelaten mi tu, paꞌresan nga mangaꞌgenan uyun talaga it kaꞌirgan it Ampuꞌang Diyus. Paꞌresan nga ega nay bagay nga kamansaꞌ it bilug baw masudi-sudi it beken, isaꞌun maꞌimbeng i nakem ta in madap nat kanya.

¹⁵ Dedemdemen mi nga magpalulus lamang i Ampuꞌan, ka isaꞌun dakel i mabgayan it timpu nga ikaribri nira. Daꞌga baꞌ, pagsurat ngayan asat imyu it pagmaꞌaleng sulsug tami kat pamayaꞌ nga si Pablo, siyangpit ya naytu nga lagi, uyun kat kasepsep nga ipiyagbegay it Ampuꞌang Diyus it kanya.

¹⁶ Talagang kat muꞌsang mga surat ya, atkaytu nga pirmi i pademdem yat imyu, pasar it itung mga bagay. Sabagay may mga ibintang ya gasiꞌ kat mga surat ya nga makuriꞌ masepsepan. Ta mga itu ngaytu, bela-belag i ipagpapuntuꞌ it mga kurang it kasepsep pasar it kamatuudan baw mga malubay pay pamayaꞌ. Atkayan naga gasiꞌ i mga pagbuwaten nira duꞌut beken nga mga kasuratan nga ampang it Ampuꞌang Diyus. Ta, egay beken nga baraꞌan it buwat nirang atkayan, pagtinggelen niray liꞌeg nira.

¹⁷ Ta it kayti, mga pagmaꞌalen ku, nga magkaꞌrutan mi nay itung mga bagay, magayen in magꞌintur kamu isaꞌun daꞌkamu mateꞌag-teꞌag it kamaliꞌ nga pangadal it mga taw ngayting maraꞌe-raꞌet. Isaꞌun daꞌkamu makapangindiꞌ it talagang natantuwan mi nang banar nga kamatuudan.

¹⁸ In daꞌga, kaꞌilangan pasigi kamu nga pagpapaꞌgenen mi i pamayaꞌ mi it Ampuꞌan baw Manriribri tami nga si Jesu-Cristo, kat ildaw nga ipagbegay ya. Baw paꞌresan mi i pagkilala mit kanya, isaꞌun dumakulaꞌ i kasepsep mi it kaꞌirgan baw adat ya. Dapat nga bantugun kanya kayti baw seked it kaꞌnu-kaꞌnu. Kamatuudan tu.