2 Pedro 2 - Tagbanwa

Maraꞌe-raꞌet talagay manigpangadal it kaꞌambutan

¹ Temed maski tagnaꞌ ngayti, may mga nagpapru-prupitaꞌ duꞌut mga Israelita. Ta kayti, atkayan naga, asat imyu may limiꞌwan gasiꞌ nga maat manigpangadal. Temed pangadal nira, panlibeg it pikiran mi, nga ikaranggaꞌ it pamayaꞌ, ka talagang alaid kat kamatuudan. Talagang pagdaꞌgaen nira i pamegbeg ni Jesu-Cristo, kanya nga subuk miyalang it kanira isaꞌun kanya nang taawan. Ka ega pagkilalaen nira nga Agalen nira nga dapat sirbiyan. Temed ta, talagang egay pagduwa-duwa nga abutun sira it panriga.

² Dakel i kaꞌibaan mi nga magpamayaꞌ nga gumuru it mararaꞌway nga pagbuwaten nira. Aypaꞌ, sabap it buwat nira nga atkaytu, masudi-sudi talaga it mga ega namayaꞌ i ipagpangadal nga kamatuudan pasar it Ampuꞌan.

³ Ta it maꞌingarum talagay mga manigpangadal ngayti, kat biyuwat-buwat lamang ngayting sugi-sugid nira nga purus kaꞌambutan, buwaten nira kamu nga desang papanulusan. Temed yay matuud, garing it tagnaꞌ paꞌ magꞌaꞌareg nga lagi i ipiyabetang-betang nga ukuman nga mabeꞌgat. Talagang egay pagduwa-duwa nga daꞌsira abutun it panriga.

⁴ Dedemdemen mi tu, nga iyan tagnaꞌ paꞌ, may nagkasalaꞌan nga mga anghil, temed daꞌsira piyataꞌnan it Ampuꞌang Diyus. In daꞌga pinirisu ya sira duꞌun it piyakamalgeb nga siwang. Ta duꞌun paꞌ sira it kadleman ngayti, seked mabut i aldaw nga ipangukuman.

⁵ Baw beken, dedemdemen mi nga sabap it pirmi nga pagkuntraꞌen it katataawan i kaꞌirgan it Ampuꞌang Diyus it iti, amulaꞌ pay banwa, aypaꞌ ka tiyunaw ya i banwa ngaytu. Talagang egay ipiyagribri ya nga beken, puyrat ki Noe baw pitung kataawan nga maꞌiba ya. Nakabetang i katataawan it atkayti maski ipagpatantu ni Noe it kanira in magꞌuꞌunuy pangaꞌgenan nga pagsagyaan it Ampuꞌang Diyus.

⁶ Ta daꞌga basaꞌan, biyetanganan ya gasit ukuman i mga taw duꞌut Sodoma baw Gomorra, sabap gasiꞌ it subraꞌ nay pamagbuwaten nira nga kasalaꞌan? Talagang inanteng it Ampuꞌang Diyus i mga siyudad ngayti. Binwat yaytuy atkaytu isaꞌun mamuyaan it mga taw it kaꞌnu-kaꞌnung timpu i baraꞌan nira, basta iyan nagang ipagpaꞌalaid nira nga pirmi kat nakem nira i kaꞌirgan it Ampuꞌang Diyus.

⁷ Temed ipiyagribri ya naga si Lot nga mataldeng kat panleteg ya. Ka masakit nga banar nga magkasmekan ni Lot ngayti i karaꞌe-raꞌetan it mga karugar ya ngayting taga Sodoma, nga magsarit sumbayaꞌ it kaꞌiꞌirgan nga maraꞌe-raꞌet it egay maski unu nga pagsupil it sadili.

⁸ Paribasay mataldeng nga taw si Lot ngayti, talagang ega magkapakay ya i magkamuyaan ya ngayting karaꞌe-raꞌetan it aldaw-aldaw garing it pagpakibanwa ya ngayti duꞌun.

⁹ Ta kat mga biyaraꞌan ngaytit tagnaꞌ paꞌ, daꞌga maꞌyag nga iyan Ampuꞌang Diyus, magkaꞌrut talaga rimibri it mga magpamayaꞌ it kanya kat mga kakuriꞌan nira. Baw talagang magkaꞌrut kanya gasiꞌ rimiga it mga mamagbuwat it karaꞌe-raꞌetan, mintras ipagꞌareg ya sira kat aldaw ngayti nga ipangukuman nga banar.

¹⁰ Subrang ipagꞌareg ya i iyan mga magsumbayaꞌ it mararaꞌway nga kaꞌirgan it bilug baw iyan mga masusutil nga ega magkilala it mga magpupudir. Ta, mga paꞌaaten ku ngaytu nga manigpangadal it kaꞌambutan, talagang pangaasen sira nga ega magkaꞌrut it eyaꞌ baw ipagpadaꞌeg nira i sadili nga kakayaan. Egay galang nira it maski mga matataꞌas nga banar i kabantugan. Maꞌunu galangen nira, pagtibabaꞌen nira ga.

¹¹ Temed maski mga anghil nga subrang dakulay kakayaan baw makseg pat mga manigpangadal ngaytit kaꞌambutan, daꞌsira magpanibabaꞌ baw magpakusalaꞌ it beken kat adapan it Ampuꞌan.

¹² Takaꞌ in itung mga taw, yanay kat baꞌbaꞌ nira, panibabaꞌ. Pati mga bagay nga ega magkasepsepan nira, pagtibabaꞌen na. Kabilangan nira, mga ramu-ramu nga egay nanakem, ka pagsunudun lamang i kaꞌirgan it bilug. Mga ramu-ramu, subuk ipiyanganak sira isaꞌun madakep baw imatayen. Ta itu nga mga taw, atkayan naga. Maꞌilang i mabetangan nira.

¹³ Ka it ega magayen i siyari nirat buwat, iyan i tumbas it kanira, betanganan it ega naga magayen. Mga taw ngayti, isaꞌun lamang masumbayaꞌ niray maraꞌway ngaytu nga kaꞌirgan nira, kasasagyaan nirang pagbuwaten it maski aldawun i kasagyaan nira ngaytu nga maraꞌway. Talagang dakulaꞌ nga kaꞌeꞌyaꞌan baw sudi-sudi, ka mamagpanragiꞌ sirat pagkaraꞌnen mi nga uyut i pagbuwaten nga Apunan. Pagsagyaan nira talagay makapanluku it imyu.

¹⁴ Kada leteg nira, pagrambang mata. Sabap egay beken nga tutulus nira, mga babay nga mapiyarayag-rayag. Talagang egay kaskedan it buwat nirat kasalaꞌan. Mapiyandayaꞌ sira it iyan malubay paꞌ i pamayaꞌ. Talagang pangtasan na sirat pagsumbayaꞌ it kaꞌingarum nira. Atkaytung mga taw, siguradu talaga nga rigaen it Ampuꞌang Diyus.

¹⁵ Ta it subuk nagpaski sira, alaid nang alaid sira kat dalan it kamatuudan. Ka yay siyunsun nira nga dalan, gimnuru sirat ki Balaam nga anak ni Beor. Tagnaꞌ paꞌ si Balaam ngayti, siyaꞌa-saꞌang yay taꞌeg nga muwat it maraꞌe-raꞌet sabap talagang yay kanget it nakem ya, kupisiꞌ it tangdan.

¹⁶ Temed ega natabus ya, ka siyabar it kabayuꞌ ya nga asno. Ka maski ramu-ramu nga ega magkaꞌampang, piyaꞌampang nat Ampuꞌang Diyus, ka simnabar it kabubwalan ya.

¹⁷ Mga manigtulduꞌ ngaytut kaꞌambutan, taw nga egay kakapulusan. Ka kaꞌalimbawaan nira, naꞌlet na nga tumbud baw kunum nga egay pakinabang ka ipagdedeg it deres. Temed rigaen sirat Ampuꞌang Diyus duꞌun it ipiyagꞌareg yang lagi nga nagpintut nat pandele-delem.

¹⁸ Pasubraꞌ i dakulaꞌ kat mga pangangampangan nira. Temed ta, ega yay kapulusan it pamagsugiden nira. In daꞌga pandayaꞌ nira lamang it mga baꞌgung namayaꞌ it Ampuꞌan, nga ega paꞌ nakasepsep nga banar it kaꞌirgan ya. Sabap ipagpakursud nira i mga baꞌgu ngayting namayaꞌ nga paꞌuliꞌan i pangaꞌgenan nga kamaliꞌ, nga sumarit sumbayaꞌ it maraꞌway nga kaꞌiꞌirgan it bilug it egay maski unu nga pagsupil it sadili.

¹⁹ Ipagsanggup paꞌ nira nga in siyu-siyuy sumunud it pangadal nira, ribri na talaga nga mapakay nang buwaten i kumpur ireg nirang kubwaten, ka ega na uripen it kaꞌirgan it beken. Temed ta, mga magpaliꞌwan it atkayti ngayti, uripen naga sira mismu it karaꞌe-raꞌetan nga kaꞌiꞌilang. Sabap yay matuud, kitang taw, uripen it in unu-unuy magbebegbeg it aten.

²⁰ Dedemdemen mi tu, nga iyan mga taw nga nangindiꞌ na it maraꞌe-raꞌet nga pamagbuwaten it taw situt banwa ka nakakilala na nga matuud it ki Jesu-Cristo, nga kanyay Ampuꞌan baw Manriribri tami, in beteꞌ paꞌuliꞌan nira i karaꞌe-raꞌetan ngaytu nga uripnen siꞌ sira, siguradu nga maraꞌe-raꞌet pat tagnaꞌ i kabetangan nira.

²¹ Ka magayen pay ega naꞌrutan niray dalan ngaytut kamatuudan pasar it karibriyan, ega gat iyan mangindiꞌ, lamang nasepsepan nira nay ipiyangadal it kanira nga garing duꞌun it Ampuꞌang Diyus. Talagang subraꞌ nay kitaen nirang panriga.

²² Ta daꞌga in atkayan, siray maꞌiguꞌan it sambatan ngayan nga magꞌaat, “Pagkaꞌnen nagat keꞌdeng i lamang isiyuka ya na.” Baw beken, “Beyeꞌ, lamang mapaꞌyuꞌ na, mangilmug nagat sumaꞌup.”