2 Mga Adiꞌ 9 - Tagbanwa

¹ Kaꞌsang aldaw tiyaꞌwagan it prupitaꞌ nga si Eliseo i esang mangaꞌwaꞌen nga prupitaꞌ baw tiyaꞌeg ya nga magꞌaat, “Sambutun mu nay gulamen mu baw dali-daliꞌen mu nga paꞌaduꞌun it Ramot-galaad. Tabanen muy lana ngaytu.

² Pagꞌabut mu duꞌun, tulusun mu si Jehu nga anak ni Josafat baw apuꞌ ni Namsi. Pagkaparag mut kanya pabayaꞌen mu duꞌun it esa nga seled nga duwa-duwa kamu lamang i duꞌun.

³ Bawnga paturuꞌan mut lana i ulu ya. Mampang ka nga aaten mu, ‘AMPUꞌANG DIYUS i timnaꞌeg kaytu it paturuꞌan i ulu mu it lana ku ka magꞌadiꞌ ka kat bangsa ngaytu nga Israel.’ Bawnga ayaw ka nat pagꞌatrasu. Malagyu ka nga lagi.”

⁴ Egay beken, napanaw na i prupitaꞌ ngayti nga paꞌaduꞌut Ramot-galaad.

⁵ Abutan ya tiꞌmes i mga pagbayaꞌen it mga sundaluꞌ. Maat yat kanira, “Agalen, may enged ku baytu nga taꞌeg it aken.” Si Jehu na i nakatubag. Maat ya, “Ta, siyu manggid it amen i pagtaꞌgan it imu?” “Ta, ikaw bayan, Agalen,” maat i prupitaꞌ ngayti.

⁶ Pagkagneg ni Jehu timnindeg na kanya, dayun it siminled duꞌut balay, duwa sira it prupitaꞌ ngayti. Iyan duꞌun na sirat seled piyaturuꞌan nat prupitaꞌ it lana i ulu ni Jehu, dengan it miyampang nga magꞌaat, “AMPUꞌANG DIYUS i nagtaꞌeg kaytu nga paturuꞌan i ulu mu it lana, ka magꞌadiꞌ ka kat bangsa ngaytu nga Israel nga piniliꞌ it AMPUꞌANG DIYUS nga taawan ya.

⁷ Itu nay taꞌeg it AMPUꞌANG DIYUS it imu, pangimatayen mu i kaꞌanakan it tagnang agalen mu nga si Acab, nga ituy beles nga panriga it AMPUꞌANG DIYUS it asawa ni Acab ngayti nga si Jezebel. Sabap siyari yat imatay i mga prupitaꞌ it AMPUꞌANG DIYUS baw muꞌsa nga mga magsirbi it kanya it kamatuudan.

⁸ Sabap ipiyabetang-betang it AMPUꞌANG DIYUS nga mapuuꞌ talaga i muꞌsang kaꞌanakan ni Acab. Pangimatayen talaga i muꞌsang kaꞌanakan ya nga lalaki situt bangsa ngaytu nga Israel. Egay maꞌped, gurang, mangaꞌwaꞌ.

⁹ Buwaten ya talaga kat kaꞌanakan ni Acab i iyan nga binwat ya kat kaꞌanakan ni Jeroboam nga anak ni Nabat, baw kat kaꞌanakan ni Baasa nga anak ni Ahias.

¹⁰ Iyan si Jezebel, agden i bilug ya it mga keꞌdeng duꞌun it piyagtengaꞌan it lugtaꞌ ni Jezreel. Ega talaga kaꞌilangan nga may lembeng it kanya.” Pagkaꞌampang ya it atkayti miyalagyu nay prupitaꞌ ngayti it egay pamꞌun.

¹³ Pagkasugid ni Jehu duꞌut mga kaꞌibaan ya ngayti in unuy inaat it prupitaꞌ, egay beken, binwat nira, iꞌinamlad nira i mga gulamen nira duꞌun it ulun-ulunan it agdan ka tindegan ni Jehu ngayti. Bawnga minsiꞌ sira it taburi ka inyepan, dengan it ipaggaꞌuy nga magꞌaat, “Adiꞌ na kayti si Jehu!”

Inimatay ni Jehu si Joram nga adiꞌ it Israel baw si Ocozias nga adiꞌ it Juda

¹⁵ Ta it atkayti, kaꞌampang si Jehu ngayti, “In talagang magkampiꞌ kamu it aken, maski siyu nga taw, ega pataꞌnan mi nga makaꞌaduꞌun it Jezreel nga mamaritaꞌ duꞌun it nagꞌabut ngaytu.”

¹⁶ Bawnga binwat ni Jehu ngayti, simnakay it sarakayan yat magpakibunuꞌ ka aduꞌunun yay adiꞌ nga si Joram nga duꞌun it Jezreel. Kat iting timpu duꞌun si Joram it Jezreel ka magpapilat it mga bungad yat nagpakibunuꞌ, baw pagpasyaran kanya ni Ocozias nga adiꞌ it Juda.

^17a Nalawag it guwardiya nga duꞌun it piyaꞌabwatay nga gugwardiyaan duꞌun it Jezreel i bulyug na Jehu nga magꞌaꞌabut.

²¹ “Sigi,” maat it adiꞌ ngayti nga si Joram, “asikasuun mi i sarakayan ku.” Simnakay nga lagi it kanya-kanyang sarakayan si Joram baw si Ocozias, ka susmuun nira i reetan ngayti na Jehu. Duꞌun i piyagsusmuwan nira it lugtaꞌ nga inagaw ni Acab duꞌun it ki Nabat ngayti nga taga duꞌun naga.

²² Iyan nakilalaan ni Joram si Jehu, piyataꞌwagan ya nga magꞌaat, “Unu baytu, Jehu, magayen nagay enged mu ngaytu?” Katubag si Jehu, “Ega bay magayen ngayang paꞌaaten mu mintras magsisigi pay ipiyatindeg it inaꞌ mu ngayan nga pagsamba ngaytut mga pagbete-beteꞌen nga diyus baw kiyaꞌrutan ngaytut mga katungkulan.”

²³ Pagkagneg ni Joram kayti, biyaring ya nga lagi i sarakayan ya ka malagyu, dengan it giyaꞌuyan ya si Ocozias nga magꞌaat, “Inakalan ta ni Jehu ngaytu!”

²⁴ Temed piyatundugan kanya ni Jehu it panaꞌ. Naꞌiguꞌ i pangangaldawan, nga naꞌbut i pusuꞌ. Simnuꞌsub nga lagi si Joram duꞌun it sarakayan ya.

²⁵ Bawnga maat ni Jehu it katabang ya nga si Bidcar, “Sigi, bitbiten mu kanya ka ibuntal na situt lugtaꞌ ngaytu nga inagaw duꞌut ki Nabat ngayan nga taga situ. Ka siguru magkademdeman mu naga i inampang ngayan it AMPUꞌANG DIYUS kuntraꞌ it amaꞌ ni Joram ngaytu nga si Acab, iyan katꞌesa nga magsasakay ta nga duwa nga magdadasun it ki Acab ngayti.

²⁶ Ka daꞌga baꞌ magꞌaat basaꞌan, ‘Talagang pagleltegan ku katꞌapun i pagꞌimatay it ki Nabat baw mga anak ya,’ maat it AMPUꞌANG DIYUS. ‘Aypaꞌ sikaytu naga nga rugar i sukutan ku it imu.’ Aypaꞌ sigi,” maat ni Jehu, “bitbiten mu na ka iwaꞌsag na sikaytu nga lugtaꞌ uyun duꞌun it inampang ngayti it AMPUꞌANG DIYUS.”

²⁷ Pagkamuya ni Ocozias it atkayti na, miyalagyu gasiꞌ kanya. Pamalagyu ya, ayun duꞌun it Bet-agan. Temed isingkat ni Jehu nga usigen ka panaꞌen gasiꞌ. Naꞌbutan kanya duꞌun it dalan nga magpanungul duꞌun it Gur, nga patuꞌ it Ibleam. Maski naꞌiguꞌ kanya nakadiritsu nagay palagyu ni Ocozias seked duꞌun it Meguido, nga duꞌun nay piyatayan ya.

Inimatay gasiꞌ ni Jehu si Jezebel baw muꞌsang kaꞌanakan ni Acab

³⁰ Pagꞌabut ni Jehu duꞌun it Jezreel, pagkabaritaꞌ ni Jezebel, nangayus-ayus kanya, nangapay baw piyaꞌidan yay linibut it duwang mata ya it pamamaꞌid nga pagayen it bilug. Bawnga nanlalawagan kanya.

³¹ Pagkalteg yat ki Jehu nga magseled na duꞌut puwirtaꞌan, piyataꞌwagan ya nga magꞌaat, “Akuytu! Demdemen muy nabetangan ngayan ni Zimri nga mangingimatay it agalen ya!”

³² Timningaraꞌ si Jehu baw nagpataꞌwag kanya nga magꞌaat, “Siyuy kampiꞌ it aken nga asan it dibwat?” Pagkaꞌampang ya kayti miyungaw duꞌun it lalawagan i siguru duwa u tulung kataawan nga magpamaalaꞌ duꞌun it balay it adiꞌ ngayti.

³³ “Sigi,” maat ni Jehu, “iꞌlug mi asat lalawagan ngayan i iyang babay.” Iꞌinlug nira na nga matuud si Jezebel ngayti. Pagtedag ya duꞌut lugtaꞌ, timnabsak i duguꞌ ya duꞌun it dingding baw duꞌun it mga kabayuꞌ. Liyagidlid na na Jehu it sarakayan nira i miyatay ngayti.

³⁴ Pagkaꞌanu kayti, siminled na Jehu duꞌun it balay it adiꞌ ngayti ka namagkaraꞌnen. Pagkakaꞌen maat ni Jehu it mga kaꞌibaan ya ngayti, “Aduꞌunun mi i babay ngayan nga siyumpaan it Ampuꞌang Diyus ka ilbeng mi. Sabap ega naga yan raꞌyat nga taw. Anak naga it adiꞌ.”

³⁵ Aduꞌunun it mga singkat ngayti ni Jehu, abutan nira, ega na bilugun. Yamanay duꞌun, barungutan ya, mga pala-palad it alima, baw mga kararapa ya.

³⁶ Pagkasugid nira duꞌut ki Jehu, kaꞌampang kanya, “Pagtuman yan it inampang it AMPUꞌANG DIYUS nga isiyugid it taga Tisbe ngayan nga prupitaꞌ nga si Elias, nga magꞌaat, ‘Kat sang bagiꞌ nga lugtaꞌ duꞌun it Jezreel, agden it mga keꞌdeng si Jezebel.

³⁷ Baw bilug ya, atnat basura lamang nga ikiyambung, nga ega nay makakilala it kanya.’”