2 Mga Adiꞌ 6 - Tagbanwa

Piyaltaw ni Eliseo i kapa nga timnangsuꞌ duꞌut danum

¹ Kaꞌsa, sang reetan i mga magꞌadal it pagkaprupitaꞌ nga naꞌaduꞌun it ki Eliseo ngayti. Pagꞌabut, maat nira, “Magꞌuꞌunu naytu it daꞌkami na magsadang duꞌut pagsasagpunan namen nga pagtaꞌidan?

² Sana in mapakay it imu, mamukan kami it kayu duꞌun it tambing it Jordan ka pisiꞌan namen it ibuwat-buwat it ipatindeg namen nga baꞌgung balay.” “Unuka ega mapakay,” maat ni Eliseo ngayti.

³ Maat i sang kataawan, “In beteꞌ mapakay gasiꞌ it imu, bayaꞌen mu naga kami.” “Ta unuka ega,” katubag si Eliseo.

⁴ Napanaw na sira nga naꞌaduꞌun nat Jordan ka mamukan na.

⁵ Iyan mamagpukan na sira, timnangsuꞌ i kapa it sang kataawan. Magtengeꞌ nay nangabang kanyat ki Eliseo. Maat ya, “Agalen ku, daliꞌ, tabang! Nakapakun aku na bayni ka timnangsuꞌ nay kapa ku sinit danum ngayni, maski bang daꞌga liyebasan ku lamang.”

⁶ Minlep si Eliseo ngayti nga prupitaꞌ it Ampuꞌang Diyus. Maat ya, “Ari manggid i tindagan it timnangsuꞌ ngayan?” Itiyulduꞌ it kanya i tindagan. Timnigbas si Eliseo it sanga-sanga bawnga itindag ya duꞌut tindagan ngayti. Magkadaꞌtun duꞌut danum, maglutaw i tarem it kapa ngayting timnangsuꞌ.

⁷ “Ta,” maat ni Eliseo ngayti, “wayan na. Kautun mu mana.” Egay beken, kiyaut ya na.

Diyaꞌeg ni Eliseo i mga taga Siria

⁸ Kaꞌsa, napikir it adiꞌ duꞌut Siria nga rumpakan i Israel. Tiningped yay muꞌsang mga katimbang ya bawnga ipiyagsugid yay magkapikir ya ngayti. Itiyulduꞌ yat kanira in ari may ari ireg ya nga pagkampuwan nira.

⁹ Temed, iti ngayti, naꞌrutan ni Eliseo ngayti nga prupitaꞌ it Ampuꞌang Diyus. Ipiyaꞌrut ni Eliseo it ki Joram nga adiꞌ it Israel. Inaat ya gasiꞌ nga tandaꞌan it magayen i iti may iti nga rugar, sabap duꞌun kayting mga rugar i pagkampuwan it taga Siria.

¹⁰ Aypaꞌ piyatandaꞌan nga matuud it adiꞌ ngayti nga si Joram i kumpur ipiyagꞌaat ngayti ni Eliseo nga rugar. Ega lamang kaꞌsa isugid ni Eliseo it adiꞌ ngayti i pasar it pagpikiren it mga taga Siria ngayti nga manrumpak. Ta, kumpur rugar nga ipagꞌaat ni Eliseo nga kaꞌilangan nga tandaꞌan, pagsunudun ni Joram, pagpatandaꞌan yat mga sundaluꞌ.

¹¹ Ta sabap it iti ngayti, nalibeg i pikir it adiꞌ ngayti it Siria baw miniseg kanya. Tiningped yay mga katimbang ya, baw piyangingkut ya. “Kayti,” maat ya, “sumugid kamu it kamatuudan. Siyu manggid it imyu i magkampiꞌ it adiꞌ it Israel nga magliplip it manugid duꞌun it kanya?”

¹² Katubag i sang kataawan, “Ta ega bayan, kagalang-galang nga Adiꞌ, i maat may magliplip duꞌun it sumugid. Takaꞌ yay matuud, muꞌsang pagꞌampangen mu, maski duꞌun kat irigaꞌan mu magꞌampang, subuk pagkaya-kayapen nga muꞌsa duꞌun it prupitaꞌ ngaytit Israel nga si Eliseo. Ta kanya nay magsugid duꞌun it adiꞌ nira ngayti.”

¹³ “Ta sigi,” maat it adiꞌ ngayti, “tulusun mi kanya ka ipadakep ku.” May nakasugid duꞌun it kanya nga, si Eliseo, duꞌun it Dotan.

¹⁴ Aypaꞌ dakel nga mga sundaluꞌ i piyapaꞌaduꞌun ya. May magsasakay it sarakayan it magpakibunuꞌ, may magsasakay it kabayuꞌ. Delem nay pagꞌabut nira duꞌun, liniputan nira i lansangan ngayti.

¹⁵ Pagꞌeyag it aldaw, nanliꞌwan i katabang ni Eliseo. Yanay piyagꞌaꞌandaꞌan it mata ya, magꞌalinaynay nay mga sundaluꞌ baw dakel na nga mga kabayuꞌ baw mga sarakayan it magpakibunuꞌ, palinibut nat lansangan ngayti. Pagseled ya maat yat ki Eliseo ngayti, “Agalen, unu naytuy baraꞌan ta kaytu?”

¹⁶ Katubag si Eliseo ngayti, maat ya, “Ayaw kat iꞌlam. Subraꞌ ta pang dakel i aten, subraꞌ pang dakel it kanira.”

¹⁷ Pagkaꞌampang ya kayti, nanalangin kanya nga magꞌaat, “AMPUꞌANG DIYUS, ipalugut mu nga kalteg kanya it mga kampiꞌ ngaytut aten.” Ta, tiyubag it AMPUꞌANG DIYUS i panalangin ya ngayti. Pagpanigmata it katabang ngayti ni Eliseo, maltegan ya kat linibut nira, magpupnuꞌ it magdeleg na nga mga kabayuꞌ i bukid ngayti baw mga magdeleg na gasiꞌ nga mga sarakayan it magpakibunuꞌ.

¹⁸ Ta, pagꞌelep it mga taga Siria ngayti it ki Eliseo, nanalangin siꞌ kanya nga magꞌaat, “AMPUꞌANG DIYUS, ipagpangabang kut imu nga ipabaraꞌ mu nga ega magkakilalaan nira i magkaltegan nira.” Ta, tubag it AMPUꞌANG DIYUS it panalangin ngayti ni Eliseo, atkayting matuud i binwat ya it kamamataan it mga taga Siria ngayti.

¹⁹ Ta it atkayti na, inlep sira ni Eliseo, maat ya, “Ega bayan sikaytuy dalan. Egaytu ituy lansangan ngayang pagꞌabutun mi. Dumasun kamut aken ka itulduꞌ kut imyu i pagtulusun mi ngayan nga taw.” Egay beken, piyabayaꞌ ya na sira duꞌut Samaria ngayting puꞌun nga siyudad it Israel.

²⁰ Pagꞌabut nira duꞌun, nanalangin siꞌ si Eliseo ngayti nga magꞌaat, “AMPUꞌANG DIYUS, ipaꞌuliꞌnan mu nay panleteg nira.” Ipiyaꞌuliꞌnan nat AMPUꞌANG DIYUS i panleteg it mga taga Siria ngayti. Nagkala-kalala sira, pagkamuya nira it duꞌun na sira it Samaria.

²¹ Ta it atkayti, binwat it adiꞌ ngaytit Israel nga si Joram, iningkut ya si Eliseo. “Unu,” maat ya, “pangimatayen ku na sira, Agalen? Daꞌga baꞌ yay magayen, pangimatayen ku na sira?”

²² Katubag si Eliseo, maat ya, “Ayaw saꞌan. Ka maski sira nga nadakepan mu duꞌut pagbunuꞌan, pagrarasan mu mimatay. Subraꞌ nay sira ngaytu nga ega dakepan. Yay magayen, maꞌunu imatayen mu, pakaꞌnen mu sira bawnga paꞌuliꞌen duꞌut adiꞌ nira.”

²³ Egay beken, nagpaꞌitsu it pangaꞌen i adiꞌ ngayti nga si Joram ka piyakaꞌen yay mga taga Siria ngayti. Bawnga piyaꞌuliꞌ ya na sira duꞌut agalen nira. Gimnaring sikayti, daꞌsira na pagrumpakan it iting mga taw.