2 Mga Adiꞌ 4 - Tagbanwa

Tiyabang ni Eliseo i esang kaꞌildaw-ildaw nga balu

¹ Kaꞌsa naꞌaduꞌut ki Eliseo i esang balu, nga asawa it natay na nga magꞌadal it pagkaprupitaꞌ. Pagꞌabut, maat ya, “Agalen, natay nay asawa ku. Siguru magkaꞌrutan mu naga nga mintras egen kanya paggalangen ya it may iꞌlam i Ampuꞌang Diyus. Ta kayti, naꞌaduꞌun it aken i kinaꞌutangan namen, magpanukut. Ta it egay magkaparagan kung pamamayad, ireg ya, duwang anak ku nga mga lalaki, yanay ibayad ku, ka uripnen ya na.”

² “Ta, ay unu na lamang i makatabang kut imu?” katubag si Eliseo. “Unuy nasubli mu nga pagngatanan mi magꞌasawa?” “Ta daꞌga,” maat i babay ngayti. “Yamanay duꞌun, sang lalanaan manay lana-lana.”

³ “Ta in atkayan,” maat ni Eliseo, “manlekep-lekep kat mga kamalay mu. Manlebas kat mga karebtangan nira nga egay mga bebetang. Daklen mu nga banar i lebasan mu.

⁴ Ta, in dakel nang dakel i nalebasan mu, buwaten mi magꞌaꞌanak, magsiradu kamu asat balay mi. Bawnga itgis muy paꞌaaten mu ngayan nga lana asat mga nalebasan mu ngayan. Pangipnuꞌun muy muꞌsa.”

⁵ Pagkaꞌuliꞌ it babay ngayti, siyunud yay kumpur ipiyagꞌaat ngaytit kanya ni Eliseo. Pagkapanlebas ya, namagsiradu na sira magꞌaꞌanak bawnga piyan-gisan ya nay mga karebtangan ngayti nga nalebasan ya.

⁶ Iyan napnuꞌ nay muꞌsa, maat yat mga anak ya ngayti, “Daliꞌ, tumaban kamu paꞌ it beken nga mabtangan ku.” “Ta napnuꞌ na bayang muꞌsa, Inaꞌ. Ega na bay beken nga karebtangan,” maat it mga anak ya ngayti. Ta it ega nay karebtangan, ega na magturuꞌ i ipagtigis ya ngayting lana, naꞌubus na.

⁷ Naꞌaduꞌun siꞌ kanya it ki Eliseo, ka nanugid na nga nabwat ya nay muꞌsa. “Ta in atkayan,” maat ni Eliseo ngayti, “ipaꞌalang mu nay lana ngayan isaꞌun mabayadan mu nay paꞌaaten mu ngayan nga utang mi. Iyan maꞌped, ipangaꞌgenan mi na magꞌaꞌanak.”