2 Mga Adiꞌ 25 - Tagbanwa

¹ Ta it atkayti, iyan ikasang puluꞌ nang aldaw it ikasang puluꞌ nga bulan, nga ikasiyam nang taꞌun it pagꞌadiꞌ ni Sedequias ngayti, tiningped ni Nabucodonosor i muꞌsang mga sundaluꞌ ya. Inaduꞌun niray Jerusalem ka kiyulung nira. Palinibut may sundaluꞌ na.

² Magduduwang taꞌun i kaꞌlay it kiyulungan nira ngayti.

³ Iyan naꞌbut nay ikasiyam nang aldaw it ikaꞌpat nga bulan it ikasang puluꞌ may esa ngayti nga taꞌun it pagꞌadiꞌ ni Sedequias, gintem na nga banar i mga taw ngayti nga pamagkukulungun. Talagang ega nay magkaparagan nira nga magkakaꞌen.

⁴ Kat iting aldaw nakatabus nay mga taga Babilonia ngayti it timibag it kutaꞌ it Jerusalem ngayti. Pagkamuya ni Sedequias it may natibag na, pagdelem miyalagyu na kanya, kaꞌibaan it muꞌsang mga sundaluꞌ ya. Liniꞌwanan nira, duꞌut puwirtaꞌan nga duꞌun it piyagtengaꞌan it duwa ngayting kutaꞌ nga duꞌut tepad it kaluwa-luwakan it adiꞌ. Nakalapas sira maski palinibut it Jerusalem ngayti i mga Caldeo ngayti nga taga Babilonia. Pamalagyu nira, naꞌaduꞌun manggid it ayun it Araba.

⁵ Temed pagkaꞌrut it mga taga Babilonia, inusig niray namagpalagyu ngayti. Naꞌbutan nira duꞌun it daranasan it Jerico. Nagtariwanak nay mga kaꞌibaan ni Sedequias ngayti.

⁶ Pagkadakep it ki Sedequias, tiyaban na kanya duꞌun it adiꞌ ngayti nga si Nabucodonosor nga duꞌun it Ribla. Biyetanganan kanya it ukuman duꞌun.

⁷ Inimatay it mga Caldeo ngayti i mga anak ni Sedequias kat adapan ya. Bawnga kanya ngayti, linwatan it mata. Pagbabayukun nat kadina nga tumbaga i tiyaban duꞌun it Babilonia.

⁸ Iyan ikapitu nang aldaw it ikalimang bulan, nga ikasang puluꞌ baw siyam nga taꞌun it pagꞌadiꞌ ni Nabucodonosor, sinled na i Jerusalem ngayti ni Nabuzaradan nga pagbayaꞌen it mga sundaluꞌ it adiꞌ ngaytit Babilonia.

⁹ Siyuriban nira i Templo ngayti nga papagsambaang balay it AMPUꞌANG DIYUS. Siyuriban nira gasiꞌ i mabakas ngayting balay it adiꞌ, baw kadaklan gasiꞌ it mga babalayan it taga Jerusalem. Talagang egay ipiyaꞌped nira, pati mga dadakulaꞌ baw magagayeng balay, piyanuriban nira na.

¹⁰ Baw iyan kutaꞌ it siyudad ngayti, imbus nat timibag it mga sundaluꞌ nga kaꞌibaan ni Nabuzaradan ngayti.

¹¹ Diyakepan ya na i mga naꞌped paꞌ nga mga Israelita duꞌun it Jerusalem baw iyan namagsukuꞌ duꞌun it adiꞌ nira ngayti nga taga Babilonia.

¹² Yamanay itiyuduꞌ ya duꞌun, may pira mana nga kaꞌasawaan nga iyan mga makukuriꞌ, ka yamanayti manluwa-luwak baw marigra it mga ubasan.