2 Mga Adiꞌ 24 - Tagbanwa

¹ Kat timpu it pagꞌadiꞌ ya, siyakep i Juda it adiꞌ it Babilonia nga si Nabucodonosor. Seledat tulung taꞌun pagsasakpen si Joaquim it adiꞌ ngayti. Temed pagꞌikatlung taꞌun nagpakidaꞌeg na kanya.

² Temed, binwat it AMPUꞌANG DIYUS, dakel i piyanakman ya nga manrumpak it ki Joaquim ngayti, isaꞌun maranggaꞌ nga banar i Juda, uyun kat ampang ya nga ipiyasugid ya it mga manigsirbi ya nga mga prupitaꞌ. Aypaꞌ sigi-sigi nga rumpak it mga Caldeo nga taga Babilonia, mga taga Siria, mga taga Moab, baw mga taga Ammon.

³ Talagang, makuriꞌ ngaytu nga nabetangan it Juda, ipiyaꞌabut it AMPUꞌANG DIYUS isaꞌun subuk ipaꞌawaꞌ ya sira kat adapan ya, sabap it ega basta-basta ngayti nga karaꞌe-raꞌetan nga binwat ni Manases it tagnaꞌ.

Pagꞌadiꞌ ni Joaquin duꞌun it Juda [Mga 598 B.C.]

⁶ Ta, duꞌun siꞌ it Juda, pagpatay ni Joaquim gimnanti it kanya kat pagkaꞌadiꞌ, anak ya nga si Joaquin.

⁹ Temed, kat pagꞌadiꞌ ya, karaꞌe-raꞌetan naga kat panleteg it AMPUꞌANG DIYUS i siyarit buwat ni Joaquin ngayti, subung nagat binwat it amaꞌ ya.

Siyakep it taga Babilonia i Juda

¹⁰ Ta, kat iting timpu kiyulung nat mga sundaluꞌ it adiꞌ it Babilonia nga si Nabucodonosor i Jerusalem ngayti.

¹¹ Pagtaꞌlib it pirang bulan, miyabut si Nabucodonosor duꞌut mga sundaluꞌ ya ngayti nga magkukulung it Jerusalem.

¹² Pagꞌabut ya, simnukuꞌ nga lagi si Joaquin ngayti nga adiꞌ it Juda, kaꞌibaan it inaꞌ ya, mga katimbang ya, mga pagbayaꞌen it sundaluꞌ ya, baw muꞌsang mga taawan ya nga matataꞌas i duguꞌ. Diyakepan na sira it adiꞌ ngayti nga si Nabucodonosor. Ikawalu na nga taꞌun it pagꞌadiꞌ ni Nabucodonosor ngayti.

¹³ Riyangpas ya i muꞌsang mga kamanggadan duꞌun it pamalay-balay it adiꞌ ngayti baw mga marerga nga kagamitan duꞌun it balay ngayting papagsambaan nirat AMPUꞌANG DIYUS. Piyanranggaꞌ ya paꞌ i mga bulawan nga garamiten nga ipiyabwat nagat adiꞌ it tagnaꞌ nga si Solomon, duꞌun it Templo ngayti nga papagsambaan nira, subung nat ipiyasugid nagat AMPUꞌANG DIYUS it tagnaꞌ paꞌ.

¹⁴ Piyabayaꞌ ya na nga dakepan i muꞌsang taga Jerusalem ngayti, mga matataꞌas i duguꞌ, mga bantug nga mamumunuꞌ, baw muꞌsa nga mga karpintiru baw mananalsal nga ega basta-basta i kakayaan. Kadakel nira, miyabut it sang puluꞌ nga ribu. Talagang subuk ega nay ipiyaꞌped duꞌun, ka yamanay ipiyaꞌped, mga makukuriꞌ nga mga raꞌyat.

¹⁵ Piyabayaꞌ na ni Nabucodonosor duꞌun it Babilonia si Joaquin ngayti, mga asawa ya, inaꞌ ya ngayti, mga pagbayaꞌen baw muꞌsa nga mga bantug nga taw duꞌun it Jerusalem ngayti.

Pagꞌadiꞌ ni Sedequias duꞌun it Juda [598 seked it 586 B.C.]

¹⁷ Parabir gimnaring si Nabucodonosor nga muliꞌ duꞌun it Babilonia, ipiyaꞌdung ya nga magꞌadiꞌ duꞌun it Juda si Natanias. Giyantiyan ya nay ngaran, si Sedequias na. Si Sedequias ngayti, amayan ni Joaquin ka sulsug it amaꞌ ya.

¹⁹ Temed, kat pagꞌadiꞌ ya, karaꞌe-raꞌetan naga i siyarit buwat ni Sedequias ngayti. Ega naga piyasyangan ya i mga maraꞌway nga buwat ni Joaquin ngayti nga diyakepan.

^20a Unupat nakabetang i Jerusalem baw Juda it atkayti ngayti sabap nasaꞌliyan nang banar i Ampuꞌang Diyus. Aypaꞌ ka subuk ipiyamuntal ya na sira kat adapan ya.

Diyaꞌeg it daꞌeg manuk i Jerusalem [586 B.C.]

^20b Iyan may pira na nga taꞌun nga pagꞌadiꞌ ni Sedequias duꞌun it Jerusalem ngayti, kiyuntraꞌ ya nay adiꞌ ngaytit Babilonia.