2 Mga Adiꞌ 23 - Tagbanwa

¹⁵ Maski papangantengan ngayti baw papagsambaan duꞌun it mungsuꞌ it Betel, nga ipiyabwat ni Jeroboam nga anak ni Nabat, kanya nga nagpakursud it bangsa nira nga Israel kat kasalaꞌan, ipiyaranggaꞌ gasiꞌ ni Josias. Inanteng yay papagsambaan ngayti baw ipiyasari yat parmek i kumpur ega magkaꞌanteng. Inanteng ya gasiꞌ i piyakaꞌarigi nga ladawan it tiyaw-taw nga si Ashera.

¹⁶ Ta it magpanigmata si Josias, may naltegan ya nga mga lebeng duꞌun. Pagkalteg ya, isingkat ya nga pangaliyen ka antengen i mga tuꞌlang duꞌun it papangantengan ngayti nga binwat ni Jeroboam. Iti ngayti, timnuman it ipiyagꞌaat it AMPUꞌANG DIYUS nga ipiyasugid ya it esang prupitaꞌ it tagnaꞌ paꞌ nga timpu. Kat iti nga binwat, ipiyabetang ya na nga marignaꞌ i iting papangantengan, ka inantengan it tuꞌlang it taw.

²⁵ Talagang, kat mga nakauꞌna it ki Josias ngayti it nagꞌadiꞌ, baw kat mga nakasunud it kanya, ega talagay maski siyu nga nakasbung it kanya kat pagpasakep yat AMPUꞌANG DIYUS. Ka talagang nagpasakep kanya it ega desang awam in daꞌga kat nakem baw pikir ya nga tingled, baw kat muꞌsang keseg ya, uyun duꞌun it inaat it mga urdin nga ipiyaꞌalima it AMPUꞌANG DIYUS it ki Moises.

Panriga it Ampuꞌang Diyus sabap it karaꞌe-raꞌetan ni Manases, talagang egay kaꞌawaꞌan

²⁶ Temed maski atkayti na i kagayen it adat ni Josias, ega maat magꞌulibas i iseg it AMPUꞌANG DIYUS it mga taga Juda ngayti, sabap it karaꞌe-raꞌetan ngayti nga siyarit buwat ni Manases.

²⁷ Aypaꞌ, maat it AMPUꞌANG DIYUS, “Pangimugawun ku na kat adapan ku i Juda, nga subung it binwat ku it Israel. Ipamuntal ku naga gasiꞌ i siyudad it Jerusalem, pati Templo ku nga piyaꞌiguꞌan ku it inaat ku nga duꞌun ipabetang ku nga pagsambaan it aken.”

²⁹ Iyan adiꞌ paꞌ si Josias duꞌun it Juda, napikir it adiꞌ it Egipto nga si Neco nga paꞌaduꞌun it kadanuman it Eufrates ka rumpakan yay adiꞌ it Asiria. Pagkaꞌbut ni Neco duꞌun it Meguido nga sakep it Israel, piyakibunuꞌan kanya ni Josias. Temed ega nandaꞌeg si Josias ngayti, napatay ga kanya.

³⁰ Tiyaban si Josias ngayti it mga kaꞌibaan ya ka duꞌun nagat sadili ya nga lelbengan nga duꞌun it Jerusalem i limbengan it kanya. Bawnga, kat kaꞌirgan nagat mga taga Juda, piyaꞌidan it lana i anak ya nga si Joacaz ka igiyanti nira kat pagkaꞌadiꞌ.

Pagꞌadiꞌ ni Joacaz baw ni Joaquim duꞌun it Juda [Mga 609 seked it 597 B.C.]

³² Temed, kat pagꞌadiꞌ ni Joacaz ngayti, karaꞌe-raꞌetan ga kat panleteg it AMPUꞌANG DIYUS i siyari yat buwat, subung naga it kadaklan it mga kagiyaringanan ya.

³³ Temed ta, napeꞌtek i pagkaꞌadiꞌ ya ka, binwat it adiꞌ it Egipto nga si Neco, inawaꞌ ya si Joacaz ngayti it pagkaꞌadiꞌ duꞌun it Jerusalem baw pinirisu ya it pagpapanglawan duꞌun it Ribla, nga duꞌun it banwa nga Hamat. Bawnga pagpabgayen ya na i Juda it dakulang berebgayan, nga tulung ribu baw duwang gatus nga kilu i pirak, baw tulung puluꞌ baw epat nga kilu i bulawan.

³⁴ Beken paꞌ nga binwat it adiꞌ it Egipto, riyumraan ya nga magꞌadiꞌ duꞌun it Juda, si Eliaquim nga anak naga ni Josias. Giyantiyan yay ngaran ni Eliaquim ngayti, si Joaquim na. Bawnga, pagꞌuliꞌ ya, piyabayaꞌ ya na si Joacaz ngayti duꞌun it Egipto. Duꞌun na i piyatayan ni Joacaz it kanya.

³⁷ Ta, kat pagꞌadiꞌ ni Joaquim ngayti, karaꞌe-raꞌetan gasiꞌ i siyari yat buwat, subung nagat kadaklan it mga kagiyaringanan ya.