2 Mga Adiꞌ 20 - Tagbanwa

Pagsarut ni Ezequias nga piyagayen naga kanya it Ampuꞌang Diyus

¹ Kat iti nga timpu simnarut it maꞌget i adiꞌ ngaytit Juda nga si Ezequias. Biyaꞌnaw kanya it prupitaꞌ nga si Isaias baw maat i ipiyagꞌaat ni Isaias ngayti it kanya, “Maat bay ipagpasugid it AMPUꞌANG DIYUS, ‘Asikasuun mu nat magayen i pamalay-balay mu ka ega naytu gumayen i sarut mu ngaytu. Itu naytu i imu nga ipatay.’”

² Pagkagneg ni Ezequias, naglised kanya ngayti nga magbubuntul, ka nanarunga duꞌun it dingding bawnga nanalangin.

³ “AMPUꞌANG DIYUS,” maat ya, “sanguꞌan mu naga aku ngayni nga nangaꞌgenan nga magsunud it imu it kamatuudan. Magkaltegan mu nga talagang pagbuwaten ku it tingled i nakem ku i kumpur mga bagay nga uyun it kaꞌirgan mu.” Siminggaw kanya nga banar kat kadakulaꞌ it kasmek ya.

⁴ Prupitaꞌ ngayti nga si Isaias, napanaw na. Temed ega paꞌ nakaliꞌwan kanya it kutaꞌ it pamalay-balay ngayti it adiꞌ, miyabut siꞌ duꞌut kanya i ampang it AMPUꞌANG DIYUS nga magꞌaat,

⁵ “Paꞌuliꞌ ka, Isaias, baw aaten mu si Ezequias ngayti nga pagbayaꞌen it mga taawan ku ngaytu, ‘Iyan AMPUꞌANG DIYUS it kagiyaringanan mu nga si David, ituy ipagsugid ya it imu. “Nagnegan ku i panalangin mu baw naltegan ku i timnuruꞌ nga luwaꞌ mu. Aypaꞌ ka pagayenen ku naga ikaw. Kamatuudan, pagꞌikatlung aldaw semled ka na duꞌun it Templo nga sumamba it aken.

⁶ Ildawan ku ikaw nga ipalad ku it imu nga, kaꞌgenan mu, kumaꞌlay paꞌ it sang puluꞌ baw lima nga taꞌun. Baw ega lamang iyan, iribri ku paꞌ ikaw baw siyudad ngaytu nga Jerusalem kat alima it adiꞌ it Asiria. Panindegan kuytu sabap it aken nga kabantugan baw sabap it magayen nga pagsirbi it aken ni David nga adiꞌ it tagnaꞌ.”’”

⁷ Pagpaꞌuliꞌ ni Isaias duꞌun it ki Ezequias, itiyaꞌeg yat mga katabang duꞌun it balay it adiꞌ ngayti nga minek sira it buwaꞌ it igos, ka yanay ipagtapel duꞌun it bageꞌ it adiꞌ ngayti. Ta, it atkayti nga pagbuwaten gimnayen nga matuud i sarut ni Ezequias.

⁸ Pagkagneg ni Ezequias it inaat ngayti ni Isaias, miningkut kanya nga magꞌaat, “Unu yan i imandaꞌan nga ibgay it AMPUꞌANG DIYUS nga gumayen aku naga nga matuud, nga magtaꞌlib i tulung aldaw semled aku siꞌ duꞌun it Templo nga sumamba it kanya?”

⁹ Katubag si Isaias, maat ya, “Ari manggid nga imandaꞌan kat duwa ngaytu i ireg mu, unu, pasalu i aninu kat tatakes it uras u padibwat it mga sang puluꞌ nga balaꞌed?”

¹⁰ “Bilaꞌ,” maat i tubag ni Ezequias, “madali-daliꞌ bayan it aninu ngayan i pasalu it mga sang pulung kabalaꞌdan, temed talagang makuriꞌ padibwat it atkayan ngayan nga kuntraꞌ it adat ya.”

¹¹ Egay beken, nanalangin si Isaias, bawnga ipiyadibwat it AMPUꞌANG DIYUS it sang puluꞌ nga kabalaꞌdan i aninu ngayti duꞌun it tatakes it uras nga binwat ni Acaz.