2 Mga Adiꞌ 2 - Tagbanwa

Tiyaban na si Elias duꞌun it langit [Mga 868 B.C.]

¹ Iyan miyabut nay aldaw nga pisiꞌen nat AMPUꞌANG DIYUS si Elias ngayti ka tabanen na duꞌun it langit, nga ripu-ripu i tumaban, nadnganan, magpanaw sira ni Eliseo nga garing duꞌut Gilgal.

² Mampang si Elias, maat ya, “Patuduꞌ ka na situ, ka pagpaꞌaduꞌunun aku it AMPUꞌANG DIYUS it Betel.” “Aaꞌ bilaꞌ,” maat ni Eliseo, “talagang pagdedngegen akut AMPUꞌANG DIYUS nga yay matuud, mintras egen ka, daꞌku pablag it imu.” Egay beken, nagbayaꞌ naga siray nagpaBetel.

³ Pagꞌabut nira, siyusmu sirat mga magꞌadal it pagkaprupitaꞌ duꞌun. Kaꞌampang sira, “Eliseo, unu ega magkaꞌrutan mu nga, agalen mu ngaytu, pisiꞌen na kayti it AMPUꞌANG DIYUS?” “Aaꞌ, magkaꞌrutan ku nayan,” maat ni Eliseo. “Ega na sariyen mit tingeg.”

⁴ Mampang siꞌ si Elias, maat ya, “Asi-asi pat imu, Eliseo, patuduꞌ ka na situ, ka pagpalangbusun aku it AMPUꞌANG DIYUS duꞌun it Jerico.” Katubag siꞌ si Eliseo, maat ya, “Talagang pagdedngegen aku it AMPUꞌANG DIYUS nga yay matuud, mintras egen ka, daꞌku pablag it imu.” Egay beken, duwa naga siray nagpaJerico.

⁵ Pagꞌabut nira siꞌ duꞌun, magbubulyug nay mga magꞌadal it pagkaprupitaꞌ nga minlep it ki Eliseo. Maat nira, “Unu, magkaꞌrutan mu na nga, agalen mu ngaytu, pisiꞌen na kayti it AMPUꞌANG DIYUS?” “Aaꞌ, eeꞌ, magkaꞌrutan ku na,” maat ni Eliseo. “Ega na sariyen mit tingeg.”

⁶ Maat siꞌ ni Elias it ki Eliseo ngayti, “Magayen patuduꞌ ka na situ, ka pagpalangbusun aku sit AMPUꞌANG DIYUS duꞌun it Jordan.” Katubag siꞌ si Eliseo, “Pagdedngegen it AMPUꞌANG DIYUS i ampang ku ngaytu. Talagang mintras egen ka, yay matuud, daꞌku pablag it imu.” Nagbayaꞌ naga siray napanaw.

⁷ Diyasun sira it sang bulyugan, ka limang puluꞌ sira nga mga prupitaꞌ. Ega na nanlangbus siray kanira, liyawag nira na lamang i duwa ngayti nga nakaꞌbut na duꞌut danum.

⁸ Limbas ni Elias i gulamen ya, liyulun ya, bawnga ipiyagripdas ya duꞌun it danum ngayti. Sakaling nabagiꞌ i danum ngayti, napraan i duꞌut piyagtengaꞌan. Sikayti nay piyanawan na Elias duwa ni Eliseo it dimnipag.

⁹ Pagkadipag nira, maat ni Elias, “Kayti isugid mut aken in unuy ireg mu nga buwaten ku it imu parabir aku pisiꞌen it AMPUꞌANG DIYUS.” Katubag si Eliseo, maat ya, “Ta in atkayay ampang mu, iyan bay ireg ku, ipasubli mu nagat aken i kakayaan mu ngayan nga ega basta-basta kang prupitaꞌ, isaꞌun matantuwan it beken nga akuy piniliꞌ nga sumubli it imu.”

¹⁰ “Aaꞌ,” maat ni Elias, “subuk mabeꞌgat i pagꞌangutun mu ngayan. Takaꞌ maski atkayan, basta maltegan mu na aku nga pagpisiꞌen na, maꞌimu nayan i pagꞌangutun mu ngayan. Temed in ega maltegan mu, ega siguruun mu nga maꞌimu.”

¹¹ Sigi nang sugi-sugid nirat mamagpanaw ngayti, bati-batiꞌan nira, nagpatngaꞌ duꞌut kanira i esang sarakayan it magpakibunuꞌ nga magdeleg na, pagguguyudun it mga kabayuꞌ nga mamagdeleg na gasiꞌ. Nakapagbelag na sira ka si Elias ngayti, tiyaban na duꞌut langit it ripu-ripu.

¹² Naltegan nga banar ni Eliseo, aypaꞌ nakagaꞌuy kanya. Maat ya, “Amaꞌ ku, Amaꞌ ku, nga makseg nga mandadaꞌeg situt bangsa tami nga Israel!” Nasipatan ya na si Elias. Kat kadakulat kasmek ya ginisay ya i pakayan ya garing duꞌut dibwat simnareg duꞌun it sagyaden.

¹³ Kiyuꞌmit ya i natdag naga nga gulamen ni Elias. Pagkakuꞌmit ya, nagpaꞌuliꞌ na kanya.

¹⁴ Pagꞌabut ya duꞌun it danum ngaytit Jordan, binwat yay subung it binwat ngayti ni Elias. Rinipdasan ya i danum it gulamen ngayti, dengan it miyampang nga magꞌaat, “Ari nay AMPUꞌANG DIYUS ni Elias?” Nabagiꞌ siꞌ i danum ngayti, pagpepraan siꞌ i duꞌut tengaꞌ. Dimnipag na kanya.

¹⁵ Pagkalteg it mga magꞌadal it pagkaprupitaꞌ nga taga Jerico ngayti nga mamaglalawag, maamaatan sira, “Talagang asan nat kanya i kakayaan ni Elias.” Siyusmu nira kanya ka piyanluudan nira.

¹⁶ Pagkapanluud nira, maat nira, “Limang puluꞌ baytuy kadakel namen ngaytu. Makukulaꞌsi kami paytu. Kayti in beteꞌ ireg mu, tulusun namen i agalen mu ngayan. Barang tiyaban lamang kanya it Espiritu Santo it AMPUꞌANG DIYUS bawnga itiyuduꞌ naga duꞌut in aring sagpaw it bukid u in ari kayang mga kelnaꞌ nga situt linibut.” Katubag si Eliseo ngayti, maat ya, “Ega na pasasawan mit tumulus.”

¹⁷ Temed ta, siging reges it kanya. Iyan naꞌlay na, ega na nadaꞌga ya. Aypaꞌ ka napanaw nay limang puluꞌ ngayti. Tulung aldaw i tiyulusan nirat ki Elias temed egay magkaparagan nira.

¹⁸ Pagꞌuliꞌ nira duꞌut ki Eliseo nga duꞌut Jerico ngayti, maat ni Eliseo it kanira, “Ta unuy inaat kut imyu nga ega na pariga-riga kamut tumulus ka ega yan maparagan mi?”

Piyagayen it Ampuꞌang Diyus i danum kat binwat ni Eliseo

¹⁹ Iyan duꞌun paꞌ ngaytit Jerico si Eliseo, maat it mga taw nga taga duꞌun, “Tabing galang it imu, subung nat magkaltegan mu, magayen talagay itung rugar. Salaꞌ ya mana, kasasarut i danum, aypaꞌ ka ega magayen i lugtaꞌ ya.”

²⁰ Katubag si Eliseo, maat ya, “Tabanen mi situt aken i esang karung nga baꞌgu. Bawnga betangan mi it dekeyeng asin.” Siyunud niray inaat ngayti.

²¹ Tiyaban ni Eliseo i karung ngayti it naꞌaduꞌun it pagtumbudan it danum ngayting ega magayen, bawnga iliyamaꞌ yay asin duꞌun. Maat ya, “Itu i inaat it AMPUꞌANG DIYUS. ‘Piyagayen ku nay danum ngaytu. Kayti ega naytu mapisiꞌan it sarut nga ipagkagated nat ginawa u iyan nga ega ipagpanggayen it luwak.’”

²² Ta, garing nga matuud sikayti, gimnayen nay danum ngayti, subung nat inaat ngayti ni Eliseo.