2 Mga Adiꞌ 18 - Tagbanwa

³ Talagang, pagꞌadiꞌ ni Ezequias ngayti, purus magayen kat panleteg it AMPUꞌANG DIYUS. Sabap yay siyunud ya, magayeng inadat it kagiyaringanan ya nga si David.

⁴ Ipiyaranggaꞌ ya i mga papagsambaan duꞌun it mga mungsuꞌ baw ipiyaranggaꞌ ya paꞌ i mga pagsambaen nga mga ladawan it mga pagbete-beteꞌen nga diyus, pati mga piyakaꞌarigi nga ladawan ni Ashera. Ipiyarmek ya na gasiꞌ i ipiyabwat naga ngayti ni Moises nga dukul nga tumbaga i binwat sabap, seked it iting timpu, pagꞌantengan nira paꞌ it kamangyan baw piyangaranan nira nat Nehustan.

⁵ Pamayaꞌ baw pagsarig ni Ezequias it AMPUꞌANG DIYUS, kamatuudan talaga, nga ega masbungan it maski siyu nga namagꞌadiꞌ nga beken duꞌun it Juda, iti mga siyunudan ya baw mga simnunud gasiꞌ it kanya it nagꞌadiꞌ.

⁶ Talagang mapaꞌgen i pamayaꞌ ya it AMPUꞌANG DIYUS. Ega nangindiꞌ kanya, baw papaꞌres i pagsunud yat mga urdin nga ipiyaskel it AMPUꞌANG DIYUS it ki Moises.

^7a Aypaꞌ ka tiyabang kanya it AMPUꞌANG DIYUS nga nanggayen i muꞌsang binwat ya.

Siyakep it mga taga Asiria i Israel [Mga 721 B.C.]

⁹ Iyan ikaꞌpat nang taꞌun it pagꞌadiꞌ ni Ezequias duꞌun it Juda, baw pitung taꞌun na gasiꞌ i pagꞌadiꞌ ni Oseas duꞌun it Israel, inaduꞌun it adiꞌ it Asiria nga si Salmanasar i Samaria ngayti nga puꞌun nga siyudad it Israel ka kiyulung nira.

¹⁰ Nagpanaw it tulung taꞌun, nasakep yay Samaria ngayti. Kat iting timpu, enem nang taꞌun i pagꞌadiꞌ ni Ezequias. Ki Oseas ngayti, siyam nang taꞌun i kanya nga pagꞌadiꞌ.

¹¹ Iyan mga Israelita ngayti, siyari nat dakepan it adiꞌ ngayti it Asiria. Piyabayaꞌ na sira duꞌun it Hala baw duꞌun it Habor nga duꞌun it kadanuman it Gozan. Iyan beken, duꞌun it mga lansangan it mga taga Media i piyatakenaꞌan.

¹² Nakabetang ti sirat atkayti ka egay pagdenggen nira nga ampang it AMPUꞌANG DIYUS nira, in daꞌga riyanggaꞌ ga niray ipiyakiꞌupakat yat kanira. Magsisigi gay laban nira it muꞌsang mga urdin it AMPUꞌANG DIYUS baw mga kataldengan ya nga ipiyaskel ya nagat ki Moises. Ega lamang desang paglabanen, ka maski pagneg, daꞌsira na kupagneg.