2 Mga Adiꞌ 17 - Tagbanwa

² Temed pagꞌadiꞌ ni Oseas ngayti, maraꞌe-raꞌet kat panleteg it AMPUꞌANG DIYUS, maski maat ega naga nakasbung it karaꞌe-raꞌetan it mga nakauꞌna it kanya it nagꞌadiꞌ duꞌun it Israel ngayti.

¹³ Ega maat biglaꞌ nga nakabetang sira it atkayti sabap, mga Israelita ngayti, pati mga taga Juda gasiꞌ, naꞌlay na nga pagpaꞌimbandaan sira it AMPUꞌANG DIYUS nga ipagpasugid ya it muꞌsang mga prupitaꞌ. Magꞌaat i ipagpasugid ya, “Beteꞌ indiꞌan mi nay mga karaꞌe-raꞌetan mi ngayan. Yay magayen, mangaꞌgenan kamu uyun duꞌun it mga urdin nga ipiyapanaw ku kat timpu it mga kagiyaringanan mi nga ipiyasugid ku gasiꞌ it mga prupitaꞌ.”

¹⁴ Temed ega inintindi nira. Maꞌunu intindiyen nira, namagpasngel ga sira nga subung it mga kagiyaringanan nira nga ega na talaga simnarig baw magpamayaꞌ it AMPUꞌANG DIYUS nira.

¹⁵ Talagang piyasngelan nira i mga urdin ya baw mga paꞌimbanda yat kanira. Baw diyaꞌga nira i pakiꞌupakat ya it mga kagiyaringanan nirat tagnaꞌ. Yay siyari nirat samba, mga pagbete-beteꞌen nga diyus nga egay kapulusan. Unupat nagbalyu gasiꞌ sira nga ega nay kapulusan kat panleteg it AMPUꞌANG DIYUS. Nagpaꞌuyun na sira nga banar it mga bangsa kat linibut nira, lamang garing paꞌ it tagnaꞌ ipiyagbenge-bengel na nga lagi it AMPUꞌANG DIYUS nga ega paꞌuyunan nira.

¹⁷ Beken paꞌ nga pagꞌadaten nira, pagꞌantengen na nira nga ipagsamba i mga anak nira, babay, lalaki. Magsari sira gasiꞌ it pangabang it mga mamimintuꞌ nga may kepetan baw mga katungkulan. Talagang, kat panleteg it AMPUꞌANG DIYUS, purus na karaꞌe-raꞌetan i kat pangaꞌgenan nira, aypaꞌ naꞌangut na nira nga banar i iseg ya.

¹⁸ Aypaꞌ ka, kat kadakulaꞌ it iseg ya, subuk piyangimugaw ya sirang muꞌsa kat adapan ya, nga ipiyalugut ya na nga madakepan sira it beken nga bangsa. Yamanay naꞌped, kuyunang mga tungtung-inapuꞌ ni Juda.

¹⁹ Takaꞌ, Juda ngaytu, ega naga gasiꞌ namagsunud it mga urdin it AMPUꞌANG DIYUS nira, gimnuru na sira it karaꞌe-raꞌetan it Israel.

²⁰ Aypaꞌ ka miyabut i timpu nga inindiꞌan na gasiꞌ sira it AMPUꞌANG DIYUS. Piyalabay ya na sira it kakuriꞌan baw ipiyagbegay na sira kat alima it mga kalaban nira, isaꞌun subuk maꞌawaꞌ gasiꞌ sira kat adapan ya.

²³ Ta, atkayti ngayti naꞌawaꞌ duꞌun it sadili nirang banwa i mga Israelita nga taga Samaria, uyun duꞌun it ipiyasugid it AMPUꞌANG DIYUS it mga prupitaꞌ nga manigsirbi ya. Piyanaban sira duꞌun it Asiria, nga duꞌun sira seked it kayti ngaytu. Ega na nakaꞌuliꞌ.

²⁴ Bawnga, binwat it adiꞌ ngayti it Asiria, piyataꞌid ya duꞌun it Samaria i beken nga taga Babilonia, taga Cuta, taga Ava, taga Hamat, baw taga Sefarvaim. Piyataꞌid ya sira duꞌun it mga lansangan it Samaria, nga ganti it mga Israelita nga diyakepan ya.