2 Mga Adiꞌ 11 - Tagbanwa

Karaꞌe-raꞌetan ni Atalia baw pagꞌadiꞌ ni Joas duꞌun it Juda [Mga 856 seked it 812 B.C.]

¹ Pagkaꞌrut ni Atalia, nga inaꞌ it adiꞌ nga si Ocozias, nga inimatay nay anak ya ngayti, binwat ya, ipiyaꞌimatay yay muꞌsang kaꞌanakan it anak ya ngayti nga si Ocozias ka kupagꞌadiꞌ kanya.

² Temed magayen i binwat ni Josaba, nga kanyay sulsug nga babay ni Ocozias baw anak it adiꞌ nga si Joram. Binwat ya, itiyaguꞌ ya duꞌut esang seled i esang anak ni Ocozias nga si Joas, pati manigꞌepet it kanya. Aypaꞌ ega naga nakaꞌuyut si Joas it pangimatay ngayti ni Atalia.

³ Bawnga ipiyagꞌugad na kanya duꞌun it Templo. Seledan it enem nga taꞌun itiyaguꞌ nira si Joas duꞌun, mintras adiꞌ ngayti si Atalia.

⁴ Pagꞌikapitu nga taꞌun ipiyatawag it sasirduti nga si Joiada i mga pagbayaꞌen it mga guwardiya duꞌut balay it adiꞌ, ka may ipiyakiꞌupakat yat kanira. Pagꞌabut nira duꞌun it Templo, piyasanggup ya sira nga tabangen nira kanya kat pagkubwaten ya, bawnga ipiyalteg yat kanira si Joas ngayti nga ipagtaguꞌ nirat kaꞌlay.

¹² Pagkaꞌbut it piyagꞌupakatan nga aldaw, ipiyaliꞌwan ya na si Joas nga anak it adiꞌ nga si Ocozias. Inanuꞌan yat kuruna i ulu ni Joas, dengan it binggayan it magsusurat nga ampang it Ampuꞌang Diyus. Bawnga piyaturuꞌan ni Joiada it lana i ulu ni Joas ka ipiyaꞌdung kanya kat pagkaꞌadiꞌ. Subuk giyaw-giyaw i kadakel it natingped, magraraꞌkup, maggagaꞌuy nga magꞌaat, “Sana tarimaen nga pirmi it Ampuꞌang Diyus i adiꞌ tami ngaytu!”

¹³ Pagkagneg ni Atalia it atnat giyaw-giyaw i mga guwardiya baw katataawan duꞌun it Templo, inaduꞌun ya nga lagi.

¹⁵ Temed isingkat ni Joiada it mga pagbayaꞌen it mga guwardiya nga magꞌaat, “Ipaliꞌwan mi kanya baw pangimatayen mi i kumpur kumampiꞌ it kanya.” Ka paribasay sasirduti si Joiada, ipiyagꞌaat ya nga lagi nga ega mapakay nga imatayen si Atalia duꞌun it seled it Templo.

¹⁶ Aypaꞌ diyakep nira si Atalia ngayti nga miyalagyu na. Duꞌun it pagpasledan it mga kabayuꞌ nga duꞌun it piyakakamaꞌyagan it mabakas nga balay it adiꞌ i natakdan nira. Pagkadakep, inimatay na.