2 Mga Adiꞌ 1 - Tagbanwa

² Kaꞌsang aldaw, sakaliꞌ nga naꞌulug si Ocozias duꞌun it papaꞌaray-arayan duꞌun it ikadwang ruknuꞌ it mabakas nga balay ya duꞌun it Samaria. Talagang nagated kanya nga banar. Aypaꞌ may piyapanaw ya nga paruri duꞌun it pagbete-beteꞌen nga diyus it mga Filisteo nga si Baalzebub, nga duꞌun it lansangan it Ecron, in unu, gumayen paꞌ kanya u ega na.

³ Temed inaat it anghil it AMPUꞌANG DIYUS i prupitaꞌ nga si Elias nga taga Tisbe. Inaat ya nga susmuun i mga piyapanaw ngayti it adiꞌ nga si Ocozias baw aaten sira nga, “Unuka duꞌun i pagparuriyan mi it ki Baalzebub nga pagbete-beteꞌen nga diyus duꞌut Ecron? Unu, ega nay Ampuꞌang Diyus situt Israel?

⁴ Baw isugid mi it ki Ocozias ngayti nga maat it AMPUꞌANG DIYUS, ega na gumayen i gated ya ngayan. Siguradu nga yanayan i ipatay ya.” Egay beken, napanaw na si Elias ngayti.

Pagpatay ni Ocozias baw pagꞌadiꞌ ni Joram duꞌun it Israel [Mga 864 seked it 857 B.C.]

¹⁷ Ta, subung nat inaat ngayti it AMPUꞌANG DIYUS, ipiyatay na nga matuud ni Ocozias ngayti nga adiꞌ i nabetangan ya ngayti. Ta, it egay anak ya nga sumubli, sulsug ya nga si Joram i simnubli it pagkaꞌadiꞌ ya duꞌun it Israel. Kat iti nga timpu duwang taꞌun na nga adiꞌ duꞌun it Juda i ipiyagkaJoram ya nga anak ni Josafat.