2 Cronica 30 - Tagbanwa

¹ Pagkaꞌman it muꞌsa, inimbitar ni Ezequias duꞌun it Templo nga duꞌut Jerusalem i muꞌsang Israel baw Juda, ka magpistaꞌ siꞌ sira it Pistaꞌ it Tiyaꞌliban, nga sumamba it AMPUꞌANG DIYUS it bangsa nira nga Israel. Pati mga kuyunang mga tungtung-inapuꞌ ni Efraim baw ni Manases, inimbitar ya gasiꞌ.

¹⁰ Inaduꞌun it mga tiyaꞌeg i muꞌsang mga lansangan nga duꞌun it Efraim baw duꞌun it Manases. Inabut nira seked duꞌun it kuyunang mga tungtung-inapuꞌ ni Zabulon. Temed pamagselman ga sira.

¹¹ Takaꞌ daꞌga, may pira nagang kataawan nga gimnaring duꞌun it mga kuyunan nga Aser, Manases, baw Zabulon nga nagpalulus baw nanragiꞌ nagat pistaꞌ ngayti duꞌun it Jerusalem.

¹² Temed miyuꞌsat manragiꞌ it pistaꞌ i taga Juda, sabap piyanakman sira it Ampuꞌang Diyus nga magꞌurunyun sira, nga sumunud it urdin nga ipiyanakem it AMPUꞌANG DIYUS it adiꞌ nira ngayti baw mga katimbang ya.

¹³ Kat ikadwang bulan, talagang dakel nga banar i naꞌaduꞌun it Jerusalem ka magpistaꞌ sira it Pistaꞌ it Tinapay nga Egay Ipagpaꞌalsa.

¹⁴ Yay pamapuꞌun nira, piyangawaꞌ nira i kadakel it mga papangantengan it ipagsamba nga duꞌun it Jerusalem ngayti, mga papangantengan nga pagꞌantengan it kamangyan duꞌun it mga pagbete-beteꞌen nga diyus. Inawaꞌ nira bawnga ibiyuntal duꞌun it sapaꞌ it Cedron.

²¹ Seledat pitung aldaw masasagya sira nga banar nga magpistaꞌ it Pistaꞌ ngayti it Tinapay nga Egay Ipagpaꞌalsa. Aldaw-aldaw, mga sasirduti baw mga Levita, egay paꞌna it pagbantug nira it AMPUꞌANG DIYUS nga pagtugtugan nira gasiꞌ it dakulang tingeg i keseg it guna ya.

²⁶ Talagang dakulaꞌ nga kasagyaan nira duꞌun it Jerusalem ngayti. Garing it timpu paꞌ ni Solomon egay namuyaan nga kasagyaan nga atnakayti nga kadakulaꞌ.