2 Cronica 29 - Tagbanwa

Ipiyaꞌayus siꞌ ni Ezequias i Templo baw ipiyapanaw ya siꞌ i Pistaꞌ it Tiyaꞌliban

³ Kat uꞌnang bulan paꞌ lamang it pagꞌadiꞌ ni Ezequias, piyaꞌabriyan ya siꞌ i mga salakwatan it Templo baw ipiyabwat ya nga piyanggayen-gayen siꞌ.

⁴ Uꞌna, tiningped ya i mga sasirduti baw mga katabang nira nga mga Levita duꞌun it lebatan nga ayun it Templo ngayti.

⁵ Pagkatingped maat ya, “Kamung mga Levita, buwaten mi kayti i ipiyagꞌurdin nga panlimpiyuꞌ it sadili mi baw panlimpiyuꞌ gasiꞌ it Templo ngaytu nga papagsambaan it mga kagiyaringanan mi duꞌun it AMPUꞌANG DIYUS. Pangawaꞌen mi i muꞌsang mararaꞌway kat panleteg it Ampuꞌang Diyus situt ega ngaytu basta-basta nga papagsambaan.

⁶ Talagang, mga kagiyaringanan tami, nagkasalaꞌan sira nga purus na karaꞌe-raꞌetan i binwat nira kat panleteg it AMPUꞌANG DIYUS tami. Inindiꞌan na nira kanya, pati Templo ya ngaytu. Talagang biyaliwalaꞌ na nira.

⁷ Iyan mga salakwatan nga pagseldan, isiyari na nira it siradu. Kaꞌlay ngaytu, ega na pagpagketan nira i mga titidawan duꞌun it seled, baw ega na magꞌanteng sira it kamangyan. Baw ega na gasiꞌ magpamgay sira duꞌun it Ampuꞌang Diyus it bangsa nga Israel it mga pagꞌantengen nga ipagsamba duꞌun it Ega Basta-bastang Seled.

¹⁰ Ta kayti, yay napikir ku, ipasiguru tami siꞌ it sumaꞌup i sadili ta kat kamatuudan nga pagsirbi it kanya, isaꞌun maꞌawaꞌ i iseg ya it aten.”

¹⁵ Aypaꞌ tiningped na it mga Levita ngayti i kapuꞌsaan it mga kabilug nira nga mga tungtung-inapuꞌ ni Levi, ka siyunud niray inaat it adiꞌ nga ipiyanakem it AMPUꞌANG DIYUS it kanya. Binwat niray ipiyagꞌurdin nga panlimpiyuꞌ it sadili nira, bawnga linimpiyuꞌ nira gasiꞌ i Templo it AMPUꞌANG DIYUS.