2 Cronica 24 - Tagbanwa

¹⁵ Piyaꞌlay talaga si Joiada. Sang gatus baw tulung puluꞌ nga taꞌun i idad ya bawnga natay kanya.

¹⁶ Limbengan it kanya, duꞌun it paglebngan it mga adiꞌ nga duꞌun it Siyudad ni David, sabap nagsirbi kanya it kamatuudan duꞌun it Templo it AMPUꞌANG DIYUS, baw purus ipagkagayen it bangsa nira nga Israel i binwat ya.

¹⁷ Temed, iyan ega nay si Joiada, miyadap duꞌun it ki Joas ngayti i mga punuꞌan duꞌun it Juda. Nanluud sira duꞌun it adapan ya ka may ipagpakiꞌupakat nirat kanya. Ineeꞌ it adiꞌ i pakiꞌupakat ngayti.

¹⁸ Aypaꞌ nangindiꞌ na i mga taw it pagsamba duꞌun it Templo it AMPUꞌANG DIYUS it mga kagiyaringanan nira. Piyaꞌuliꞌan nira siꞌ i pagsamba it mga piyakaꞌarigi nga ladawan it pagpangaranan it Ashera baw mga beken nga tiyaw-taw nira. Aypaꞌ, sabap it kasalaꞌan nira ngayti, inabut siꞌ i taga Juda baw Jerusalem it iseg it Ampuꞌang Diyus.

¹⁹ Temed maski atkayti na, may tiyaꞌeg ga lamang it AMPUꞌANG DIYUS nga mga prupitaꞌ isaꞌun, mga taw ngayti, paꞌuliꞌ naga nga sumunud it kanya. Ipiyagsasar it kanira in unuy mabetangan nira sabap it kasalaꞌan nira ngayti temed piyasngelan nira ga.