2 Cronica 21 - Tagbanwa

⁴ Esa paꞌ nga karaꞌe-raꞌetan nga binwat ni Joram ngayti pagkasubli yat pagkaꞌadiꞌ, siyari yat paꞌimatay it tarep basiꞌ i mga sulsug ya baw beken nga mga magpamaalaꞌ nga may katengdanan duꞌun it Juda ngayti, isaꞌun subraꞌ nga masiguru ya i pagꞌadiꞌ ya.

¹² Ta, it atkayti na, nakatanggap si Joram ngayti it surat nga garing duꞌun it ki Elias nga prupitaꞌ. Magꞌaat i duꞌut surat, “Maat bay AMPUꞌANG DIYUS it kagiyaringanan mu nga si David, ‘Ega na giyuru mu i mataldeng nga adat it amaꞌ mu nga si Josafat baw apuꞌ mu nga si Asa, nga nakauꞌnat imu it nagꞌadiꞌ situt Juda.

¹³ In daꞌga, yay giyuru mu, karaꞌe-raꞌetan nga pagꞌadaten it mga adiꞌ duꞌun it Israel. Kiyumbinyu mu na kat karaꞌe-raꞌetan i Juda baw mga taga Jerusalem, nga subung nat binwat it pamalay-balay ni Acab. Kabilangan it buwat mi ngaytu nga muꞌsa, babay nga magpamungad it atay it asawa ya ka magsarit pangunlalaki. Siyari mu pat imatay i mga sulsug mu nga, adat nira, magayen paꞌ it imu nga adat.

¹⁴ Aypaꞌ ka rigaen talaga it AMPUꞌANG DIYUS it ega basta-basta i mga sinakepan mu, mga asawa mu, baw mga anak mu. Baw matari-tariwanak paꞌ i muꞌsa nga mga kusas mu.

¹⁵ Dungag paꞌ sikayan, sumarut ka it egay pasubrang eget, nga ikabutbut it tinaꞌi mu in maꞌlay na.’”

¹⁹ Ta, pagtaꞌlib it duwang taꞌun, nabutbutan na nga matuud kanya it tinaꞌi sabap it sarut ya ngayti. Bawnga natay kanya it daꞌnay magkasugid nga sakit. Dungag ya paꞌ, ega maat giyalang kanya it mga sinakepan ya it panggalang nga subung it binwat nira pagpatay it mga nakauꞌna it kanya it nagꞌadiꞌ, nga magꞌapuy sira it dakulaꞌ.

²⁰ Tulung puluꞌ baw duwa i idad ni Joram it nakapagꞌadiꞌ na ngayti kanya. Walung taꞌun i pagꞌadiꞌ ya duꞌun it Jerusalem. Pagpatay ya egay nasmek nga maski siyu. Ilimbeng nira kanya duꞌun it pagpangaranan ngayti it Siyudad ni David, temed ega duꞌun it mga matataꞌas nga mga kalelbengan it mga adiꞌ.