2 Cronica 1 - Tagbanwa

² Kaꞌsa tiniꞌmes ni Solomon i muꞌsang may katengdanan duꞌut Israel, subung it mga pagbayaꞌen it mga sundaluꞌ ya baw beken paꞌ, pati mga ginuꞌu it mga Israelita ngayti.

³ Piyabayaꞌ yay kadakel ngayti duꞌut mungsuꞌ nga duꞌun it Gabaon, sabap duꞌun i Tabirnakulu ngayti nga papagsambaan nirat AMPUꞌANG DIYUS nga ipiyabwat ni Moises ngayting manigsirbi it AMPUꞌANG DIYUS, iyan duꞌun paꞌ i mga Israelita it rugar ngayti nga kapupuyangtan.

⁴ Lamang may iti paꞌ ngayti, ega na duꞌun i Kaban ngaytit Pakiꞌupakat it AMPUꞌANG DIYUS, ka pinsiꞌ nat adiꞌ it tagnaꞌ nga si David duꞌut Kiryat-jearim. Ipiyaꞌugad ya na duꞌut ipiyabwat ya nga balay nga magkapuru-purun duꞌut Jerusalem.

⁵ Takaꞌ duꞌun pat sarungaan it Tabirnakulu ngayti i tumbaga ngayting binwat nga papangantengan it ramu-ramu nga ipagsamba, iti nagang binwat ni Bezalel nga anak ni Uri, baw apuꞌ ni Hur. Aypaꞌ duꞌun naga simnamba baw nanalangin duꞌut AMPUꞌANG DIYUS si Solomon baw mga Israelita ngayti nga piyabayaꞌ ya.

⁶ Inlep ni Solomon i papangantengan ngayti duꞌut adapan it AMPUꞌANG DIYUS. Sang ribu i mga ramu-ramu nga ipiyaꞌimatay baw ipiyaꞌanteng ya nga ipagsamba duꞌun it AMPUꞌANG DIYUS.