2 Corinto 9 - Tagbanwa

¹ Ta, in pasar it tabang ngaytu nga itabang it mga sulsug tami kat pamayaꞌ, ega na kaꞌilangan nga isurat ku paꞌ nga sulagen ku kamu.

² Sabap magkaꞌrutan ku na nga siguradu nga kutabang kamu. Talagang pagdaya-dayawun ku kamu sini it Macedonia. Pagꞌaaten ku nga, kamu nga taga Acaya, garing paꞌ it katꞌesa nga taꞌun, alistu kamu nga megay it tabang mi. Aypaꞌ dakel talaga i subuk nasulag kat paꞌres mi ngaytu nga magkutabang gasiꞌ.

³ Aypaꞌ ka piyauꞌna ku na asan i mga sulsug tami ngaytu isaꞌun daꞌku maꞌeyaꞌan it pagdaya-dayawun ku ngaytu kamu, baw isaꞌun maꞌitsu na nga lagi i mga itabang mi, nga subung nat inaat ku.

⁴ Ka barang desa aku nga maꞌeyaꞌan, ega na aaten ku nga pati kamu, in beteꞌ may mga taga Macedonia ngayni nga mayaꞌ it aken baw mamuyaan nira nga ega paꞌ itsu kamu.

⁵ Aypaꞌ ka inupakat ku i mga sulsug tami ngaytu nga muꞌna na sira asan, isaꞌun maꞌitsu mi nga lagi i tabang ngayan nga isiyanggup mi. Ta daꞌga, in atkayan, limiꞌwan nga masasagya kamu i magbegay, ega desang magkaregesan i nakem ka maꞌimet?

Kaꞌirgan it Ampuꞌang Diyus nga itsu tami nga pirmi baw masagyay nakem nga magbegay it kumpur ikabgay ta nga tabang

⁶ Kabilangan it pagbegay it tabang, subuk ipagtugdaꞌ, nga in dekeyeꞌ, simpri dekeyeꞌ naga i mapatbasan. Takaꞌ in dakulaꞌ simpri, mapatbasan, dakulaꞌ naga.

⁷ Iyan i magayen, in magbegay tat tabang, megay i kada esa it kat sadili ya nga napikir, mayaꞌngan i nakem, baw ega desang magkaregesan lamang. Sabap iyan talagay kaꞌirgan it Ampuꞌang Diyus, begay-matag.

⁸ Ka talagang magkabwat it Ampuꞌang Diyus nga pabastantiyan kamu nga pirmi it muꞌsang bagay, nga ega lamang tamaꞌ nga pirmi kat muꞌsang pagkaꞌilanganen mi, in daꞌga bastanti kamu gasiꞌ it magamit mi it muꞌsang pagbuwaten nga magayen.

⁹ Ka subung nat inaat ngayan it isiyurat nga ampang it Ampuꞌang Diyus ngayang magꞌaat, “Masagya kanya nga magbegay it tabang ya duꞌun it mga makukuriꞌ. Talagang seked it kaꞌnu-kaꞌnu ega malipatan i magayen ngaytu nga pagbuwaten ya.”

¹⁰ Ka in magꞌuꞌunu magbegay i Ampuꞌang Diyus it biꞌni nga ipagluwak, baw pagpaksegen ya isaꞌun magbaraꞌ nga magkakaꞌen, atkayan naga pabastantiyan ya kita it ipagkabgay ta duꞌut beken nga may kaꞌilangan. Baw subung it paksegen it Ampuꞌang Diyus i subuk ipagluwak ta ngaytu nga ipagtabang it beken, isaꞌun dakulay paglapusan it kaꞌildaw ta ngaytu it masigkataw ta.

¹¹ Aypaꞌ pagsisiguruun ku nga, sabap it tabang ngaytu nga ibgay mi, pabastantiyan kamuy imyu it Ampuꞌang Diyus it muꞌsa nga mga bagay, isaꞌun subraꞌ nga dakel i matabangan mi. Baw limiꞌwan gasiꞌ nga dakel i pasalamat duꞌun it Ampuꞌang Diyus sabap it tabang mi nga tabanen namen duꞌut kanira.

¹² Ka itu, tabang mi ngaytu it mga sulsug tami kat pamayaꞌ, ega lamang tu desang makatabang it kanira kat mga kakurangan nira, in daꞌga magbaraꞌ tu gasiꞌ nga dakulang ikabantug it Ampuꞌang Diyus.

¹³ Ka itu, mayaꞌngan ngaytung mayaꞌngan kat nakem mi nga begay mi it tabang, magpamatuud tu nga kamatuudan i pamayaꞌ mi. Aypaꞌ ka, mga tumanggap it tabang mi ngaytu, bantugun niray Ampuꞌang Diyus sabap it magayen ngaytung pagsunud mi it Magayeng Baritaꞌ pasar it ki Cristo, baw sabap it magayen nga pakiꞌiba-iba mi it kanira baw muꞌsang kasulsugan mi kat pamayaꞌ.

¹⁴ Baw beken paꞌ, ipagpanalangin nira kamu it maꞌal nga maꞌal nira na kamu sabap it subraꞌ nga kaꞌildaw mi, nga ipiyagꞌildaw nagat imyu it Ampuꞌang Diyus.

¹⁵ Temed may ipiyagꞌildaw yat aten nga talagang subraꞌ it muꞌsa. Dapat nga dakulaꞌ i pasalamat ta duꞌun it Ampuꞌang Diyus sabap it ipiyagꞌildaw ya ngaytu nga talagang ega masugid i kagayen ya.