2 Corinto 8 - Tagbanwa

Panulduꞌ sabap it pagbegay it tabang kat mga magkakuriꞌan

¹ Kayti, mga sulsug ku kat pamayaꞌ, ireg ku na nga ibaritaꞌ it imyu i kagayen it binwat it mga gurupu it mga magpamayaꞌ nga duꞌun it Macedonia, kat keseg it ildaw it Ampuꞌang Diyus it kanira.

² Ka maski pagsukdanan nga banar i pamayaꞌ nira it ega lulugud-lugudun nga kakuriꞌan, temed palan, subrang kadakulaꞌ it kasagyaan nira, baw subraꞌ na nga kakuriꞌ nira, yay timnaban it kanira kat ega basta-bastang kaꞌatag duꞌut beken.

³ Talagang ipagpamatuud ku ngaytu nga ega lamang ipiyagbegay nira i kumpur magkakayaan nira, in daꞌga piyasubraꞌan nira paꞌ. Baw egaytu riyeges sira, talagang sadili niraytu nga ireg.

⁴ Kamatuudan, maseked-seked nga inupakat nira kami nga begayan sirat rugar nga makatabang it mga sulsug nira kat pamayaꞌ nga kat kagipitan.

⁵ Baw subraꞌ paꞌ kat pagꞌiꞌinawaren namen i binwat nira, ka ega lamang nagbegay it atkayang kadakulat pirak in daꞌga, uyun kat kaꞌirgan it Ampuꞌang Diyus, matuud na nga ipiyasiguru nira daꞌan i sadili nira, uꞌnay duꞌun it Ampuꞌan, bawnga situt amen gasiꞌ.

⁶ Ta, it atkayti i binwat it taga Macedonia ngayti, inupakat namen na si Tito nga paꞌuliꞌ kanya asat imyu, nga tumabang it imyu isaꞌun makapatabus mi na i kubgay mi it ildaw. Ka daꞌga baꞌ kanya naga i timnabang it imyu katꞌesa nga papuꞌun it riminut it tabang nga maat ibgay mi?

⁷ Talagang pagdaya-dayawun kamu na nga mga taw. Pagdaya-dayawun kamu na kat pamayaꞌ mi, kat kasepsep baw kat paꞌyag mi it ampang it Ampuꞌang Diyus, kat paꞌres, baw iyan nga pagmaꞌal mi it amen. Sana paꞌresan mi naga nga pagdaya-dayawun kamu gasiꞌ kat pagbegay ngaytut kaꞌildawan.

⁸ Ega maat pagꞌurdinan ku kamu. Ipagsugid ku lamang it imyu in magꞌuꞌunu-unu i panabang it beken nga mga sulsug mi kat pamayaꞌ isaꞌun, in buwaten mi gasit imyu, sikayan masiguru in sang unu na talaga i kamatuudan it imyu nga kararas.

⁹ Ka daꞌga baꞌ magkaꞌrutan mi na in sang unu talaga i kadakulaꞌ it kaꞌildaw it Ampuꞌan tami nga si Jesu-Cristo, nga maski ega babasta-bastaen i kabantugan baw kataꞌasan ya duꞌut langit, nagpabalyu nga subuk timawaꞌ nga miskin isaꞌun, kat pagkamiskin ya ngayti, magmanggaden kamu it kagayenan nga duꞌun it langit.

¹⁰ Ta kayti, itu i maꞌaat ku nga, kat aken lamang, kat ikagayen mi nga buwaten. Tabusun mi na i napapuꞌnan mi na ngayan katꞌesang taꞌun. Ka kamu talagay uꞌna-uꞌna nga ega lamang nagpapuꞌun in daꞌga uꞌna-uꞌna gasiꞌ nga minireg it atkaytung pagbuwaten.

¹¹ Aypaꞌ, yay magayen, tabusun mi na. Iyan paꞌres mi it pagpapuꞌun mi, sana manupusan. Temed iyan ibgay mi, simpri uyun kat in unuy kaya mi nga kabgay.

¹² Sabap, basta magbegay ta it masagyang-masagyay nakem it kumpur kaya ta nga ibgay, pagsagyaan na it Ampuꞌang Diyus. Ega maat pagtulusun ya paꞌ nga megay it ega na kaya ta.

¹³ Egaytu maat ireg ku nga mayaꞌnganan i beken baw mabeꞌgatan kamu nay imyu.

¹⁴ Temed ireg ku nga sugiden, it may bastanti mi kayti, magayen talaga, tabangen mi i mga may kakurangan. Ka in beteꞌ kamu siꞌ i may kakurangan, baw sira siꞌ i bastanti, simpri sira siꞌ yan i tumabang it imyu. Ta daꞌga, in atkayan, surubung kamu nga muꞌsa nga ega pagkurangen?

¹⁵ Subung tut inaat ngayan duꞌun it isiyurat nga ampang it Ampuꞌang Diyus nga magꞌaat, “Iyan minsiꞌ it dakulaꞌ, ega naga simnubraꞌ, baw iyan minsiꞌ it dekeyeꞌ, ega naga gasiꞌ kimnurang.”

Na Tito i paꞌaduꞌunun ni Pablo nga masikasu it pagbegay it tabang nira

¹⁶ Talagang magpasalamat aku duꞌun it Ampuꞌang Diyus sabap binggayan ya si Tito it kutabang nga banar it imyu, subung naga it aken nga kutabang.

¹⁷ Ka ega lamang desang siyanggupan yat masagya i pakiꞌupakat kut kanya in daꞌga eꞌres talaga i kupaꞌasan yat imyu, beken it kaꞌirgan ya naga gasiꞌ nga paꞌasan.

¹⁸ Ipiyabayaꞌ ku gasiꞌ it kanya i esang sulsug kat pamayaꞌ nga kilalang-kilala it muꞌsang mga magpamayaꞌ sabap it panindeg ya it Magayen nga Baritaꞌ.

¹⁹ Ega lamang iyanꞌen, piniliꞌ kanya it mga gurupu it magpamayaꞌ nga, kanya, kaꞌibaan namen kat buwaten namen ngaytu nga magpanduꞌlung it tabang duꞌut mga kat kagipitan. Pagsirbi namen ngaytung ituꞌun, kat ikabantug it Ampuꞌan baw magpakilala nga kutabang kami nga kutabang it mga makukuriꞌ.

²⁰ Talagang pagꞌinturun namen nga banar nga egay mapatikdan it maski siyu nga masalaꞌan nira it pamaalaꞌ namen it yaytung kadakulat bagay, ipiyamagbegay ngaytu.

²¹ Pagpaꞌresan namen talaga nga mabwat namen tu it maꞌayus, nga ega lamang desang kat panleteg it Ampuꞌan, in daꞌga pati kat mga taw gasiꞌ.

²² May ipiyabayaꞌ namen gasiꞌ nga esa pang sulsug kat pamayaꞌ. Namuyaan namen nga, kanya ngaytu, mapaꞌres kat buwaten it Ampuꞌan. Ta kayti, subraꞌ kanya nga magꞌireg paꞌasan it imyu it nasiguru ya nang banar nga kutabang kamu.

²³ Ki Tito ngaytu, kanya i kaꞌiba-iba ku baw katabang kat buwaten ku ngaytu nga magsirbi it imyu. Ta, pasar gasiꞌ it mga sulsug tami ngaytu nga mga kaꞌibaan ya, piniliꞌ tu sira it mga gurupu it magpamayaꞌ sini nga bilang ganti nira, baw kat ikabantug ni Cristo i pangaꞌgenan nira.

²⁴ Aypaꞌ ipatantu mit kanira i matuud nga kararas mi, isaꞌun mamuyaan it muꞌsang mga magpamayaꞌ nga daꞌkami nagkamaliꞌ it pagdaya-dayawun namen ngaytu kamu.