2 Corinto 7 - Tagbanwa

¹ Ta kayti, mga pagmaꞌalen ku, it ipiyagsanggup it aten i mga itu ngaytung bagay, kaꞌilangan nga limpiyuꞌun i bilug baw nakem ta kat muꞌsang kasalaꞌan, ka pagraꞌwayen it Ampuꞌang Diyus i mga kasalaꞌan it taw. Sana, paꞌresan tami nga mangaꞌgenan nga paggalangen it may iꞌlam i Ampuꞌang Diyus seked it mataldeng na it kaꞌustuꞌang kataldeng i pangaꞌgenan tami.

Pagsagyaan ni Pablo nga dakulay liyapusan it surat yat tagnaꞌ duꞌut mga taga Corinto

² Subung nat inaat ku, mga kasulsugan, sana pasagyaen mi siꞌ i nakem mi sabap it amen. Ka daꞌga baꞌ egay namuyaan mi it yanaytuy kaꞌlay nga may binwatan namen it maraꞌe-raꞌet, egay ipiyakursud namen kat kasalaꞌan, u liyuku namen?

³ Ega maat pagꞌampangen ku i atkaytu nga pagbetanganan kamu it ukuman. Ka subung nat inaat ku, maꞌal namen na nga maꞌal kamu. Matay, maꞌgen, sang tamiyan talaga.

⁴ Talagang pagsisiguruun ku nay kagayen it pamayaꞌ mi. Pagdaya-dayawun ku duꞌut beken, baw yay ikinseg it nakem ku. Yay matuud, maski dakulay magkalabayan kung kakuriꞌan, talagang subrang-subraꞌ i kasagyaan kat nakem ku.

⁵ Ka, iyan duꞌun kami it Macedonia, daꞌkami naga pagpapaꞌnaen it kakuriꞌan. Ka paꞌari-ari banta-bantaen naga, baw pirming pagregnan namen kamu nga barang mangindiꞌ kamu it pamayaꞌ mi.

⁶ Temed maski siyu it aten nga magkakuriꞌan, ega naga talaga pagpabaya-bayaꞌan it Ampuꞌang Diyus. Kamatuudan, piyasagya ya kami ka miyabut mana si Tito ngayti nga pagregnan namen.

⁷ Baw ega lamang pagꞌabut ngayti ni Tito i nakapasagya it amen, in daꞌga pati ipiyagbaritaꞌ yat amen nga in magꞌuꞌunu simnagya i nakem ya sabap it imyu. Ka itiyuturan ya nga magpaꞌbut kamu nga magpaꞌbut it aken. Itiyuturan ya gasiꞌ nga magkasmekan mi nga banar i mga binwat mi nga ega magayen nga tiyaldeng ku, baw in magꞌuꞌunu pagpanindegan mi aku kat mga magtibabaꞌ it aken asan. Aypaꞌ pagkabaritaꞌ ku, simnagya akung banar.

⁸ Ka maski na maat nakabgay it imyu it kasmek i surat ku ngayan nga ipiyataban ku asat imyu, kayti ega pagsinguliꞌen ku i mga isiyurat ku nga mga sugi-sugid. Sabagay sininguliꞌ ku naga i surat ku ngayan, iyan naꞌrutan ku nga nakabgay it imyu it kasmek it maski ega naꞌlay.

⁹ Takaꞌ kayti, masagya nay nakem ku. Ega maat pagsagyaan kuy nasmek kamu, in daꞌga iyan i pagsagyaan ku nga, kasmek mi ngayan, iyan i timnaban it imyu nga sininguliꞌan baw inindiꞌan mi i mga kasalaꞌan mi. Kasmek mi ngayan, uyun kat kaꞌirgan it Ampuꞌang Diyus. Aypaꞌ maꞌunu maranggaꞌ i pamayaꞌ mi it surat ku ngayti, isan yan dakulay liyapusan ya.

¹⁰ Sabap iyan kasmek nga uyun kat kaꞌirgan it Ampuꞌang Diyus, magtaban it taw it magsinguliꞌ baw magpangindiꞌ it kasalaꞌan nira, nga liꞌwan ya, karibriyan nga ega alang-alang. Temed iyan kasmek nga begay it banwa ngaytu, ipagdesen lamang it ulu aypaꞌ, liꞌwan ya, kamatayneng panriga nga egay kaskedan.

¹¹ Ka letganan mi lamang in unuy liyapusan kat kaꞌgenan mi it kasmek mi ngayan nga uyun kat kaꞌirgan it Ampuꞌang Diyus. Daꞌga nagmapaꞌres kamu nga banar nga maꞌukumanan i ega ngayan magayeng binwat asan it imyu nga siyangpit ku kat surat ku, isaꞌun makilalaan nga ega na pagbaliwalaꞌen mi in daꞌga pagraꞌwayen mi na. Talagang riyaꞌway mi i sadili mi, baw iniꞌlaman mi i barang kaꞌuyut kamu gasiꞌ it rigaen. Inawar mi nga banar nga sagyaan ku siꞌ kamu aypaꞌ siyarunga mi it magayen i mga aꞌayusun asan, baw biyetanganan mi it ukuman i iyan dapat nga ukumanan. Talagang ipiyatantu mi na nga ega nay turubagen mi kat kasalaꞌan nga binwat it taw ngayan asan.

¹² Aypaꞌ natanyag na in unuka talaga piyatabanan ku kamu it surat katꞌesa. Ega maat isiyurat ku sabap lamang it kanya ngayti nga nagkasalaꞌan, u iti, nabwatan ya it kasalaꞌan, in daꞌga isaꞌun matantuwan mi kat panleteg it Ampuꞌang Diyus nga dakulaꞌ naga i paggalang baw pagdemdem mi it amen.

¹³ Aypaꞌ ka ituy minggay it amen it dakulaꞌ nga kasagyaan. Baw subraꞌ nga dimnakulaꞌ i kasagyaan namen sabap it kasagyaan ni Tito, ka iyan asan kanyat imyu, talagang piyasagya mi i nakem ya.

¹⁴ Iyan ega paꞌ nakagaring sini si Tito, talagang pagdaya-dayawun ku kamu duꞌut kanya. Ta kayti, ega naga saꞌan desang magkaꞌeyaꞌan aku it mga inaat ku ngayan ka tiyuman mi na i muꞌsa. Aypaꞌ in magꞌuꞌunu purus matuud i muꞌsa nga pagsugiden namen it imyu, natanyag na nga matuud gasiꞌ i ipagtuturan ku ngaytit ki Tito nga pagdayaw kut imyu.

¹⁵ Kayti, subraꞌ na nga pagmaꞌalen kamu ni Tito, ka magkademdeman ya nga piyagnegan mit magayen baw siyunud mit may dakulang iꞌlam i muꞌsa nga ipiyagsasar yat imyu.

¹⁶ Aypaꞌ masagyang-masagya aku na ka nasiguru ku na nga iyan nay magdadaꞌeg kat nakem mi, kubwat it tamaꞌ nga pagbuwaten.