2 Corinto 6 - Tagbanwa

¹ Ta, it kami, mga manigbuwat na kat buwaten ngaytu it Ampuꞌang Diyus, maseked-seked gasiꞌ nga ipagpakiꞌupakat namen it imyu, kamu nga timnanggap na it ildaw it Ampuꞌang Diyus. Ega sana desang kalabtaꞌen mi i ildaw ya ngaytu, ka in atkayan limiꞌwan nga egay kapulusan.

² Ka dedemdemen mi i inaat it Ampuꞌang Diyus duꞌun it isiyurat ngaytit tagnaꞌ nga magꞌaat, “Kat timpu nga ipiyabetang ku nga tamaꞌ, siyambungan ku na i panalangin mi. Tiyubag ku kamu kat aldaw nga ipiyagtirminu ku nga aldaw it panribri.” Aypaꞌ mandangep kamung matuud duꞌun it kanya ka kayti nay tamaꞌ ngayang timpu nga paꞌaaten ya. Kayti na ngaytu i aldaw nga ipagpanribri yat mga taw.

Kadakulat paꞌres na Pablo it pangadal it Magayeng Baritaꞌ

³ Talagang pagꞌinturun namen nga egay mabwat namen nga subuk kakekleban it maski siyu, isaꞌun ega masudi-sudi i pangadal namen it Magayeng Baritaꞌ.

⁴ In daꞌga pagsiguruun namen nga iyan adat lamang nga bagay it mga manigsirbi it Ampuꞌang Diyus i magkamuyaan situt amen kat maski unu nga pagbuwaten baw paglabayen namen. Nga magkamuyaan tu kat kadakulaꞌ it paneꞌteꞌ namen, kat mga kakuriꞌan, mga kagipitan, baw mga ega basta-bastang karigaan,

⁵ kat mga nalabayan namen nga rinipdasan, pinirisu, baw liniputan it reetat taw nga daꞌna magꞌulibas nga iseg, baw kat buwat namen nga subrang makuriꞌ nga uyut i eꞌlek baw getem.

⁶ Makilalaan gasiꞌ nga, kami, matuud nga manigsirbi it Ampuꞌang Diyus kat magayeng pangaꞌgenan namen, kat pagkilala namen it Ampuꞌang Diyus baw kasepsep namen it kamatuudan nga garing duꞌut kanya, baw kat adat namen nga mapiyalulus baw maꞌildaw kat masigkataw namen. Makilalaan gasiꞌ kat keseg it tabang it Espiritu Santo it amen, kat kamatuudang raras namen it muꞌsa,

⁷ kat pangadal namen it kamatuudan, baw kat guna it Ampuꞌang Diyus kat pangaꞌgenan namen. Iyan kataldengan namen kat panleteg it Ampuꞌang Diyus, yay bilang ipaglaban namen nga basiꞌ baw iyan na gasiꞌ i ipagsagang namen kat mga kalaban namen.

⁸ Talagang nalabayan namen na i pagdayawun baw pagpamuwat-buwatan it panranggaꞌ it amen, paglibaken baw pagtuꞌgudun, pagꞌaaten kami na nga maꞌambut, lamang kamatuudan i pagsugiden namen.

⁹ Ipagpabetang kami nat beken nga egay kakapulusan nga mga taw, temed pagkilalaen kaming banar it Ampuꞌang Diyus. Magpanaytay kami manat sang naay nga buꞌuk, temed maski atkayan, egen kami naga seked kayti. Maski na maat pagtaldengen kami it Ampuꞌang Diyus, kat ikagayen namen naga. Ega naga pagꞌimatayen ya.

¹⁰ Talagang kasesmekan na nga buwat, takaꞌ daꞌga magꞌuꞌunay i kasagyaan namen? Subuk makuriꞌ kami na nga makuriꞌ temed dakel i magkapamanggad namen it kamanggadan nga egay kaꞌawaꞌan. Situt banwa egay sadili nameng kusas takaꞌ ipiyasiguru nat amen i muꞌsang kagayenan nga duꞌut langit.

¹¹ Mga taga Corinto, kat kadakulaꞌ talagat raras namen it imyu, muꞌsa nga kat seled namen, ipagpalbaw namen na.

¹² Talagang pagmaꞌalen namen kamu nga banar temed imyu, maramig i pagmaꞌal mit amen.

¹³ Ipagpabetang ku na kamu nga mga anak ku na. Sana, it daꞌku naytu magꞌaliꞌ-aliꞌ it imyu, belsan mi naga aku it pagmaꞌal mi nga ega awam nga pagmaꞌal.

Kaꞌilangan, mga magpamayaꞌ, ega pakikumbiꞌlid it mga ega magpamayaꞌ.

¹⁴ Mga kasulsugan, daꞌga baꞌ in duwang karamu-ramuwan i iꞌaradu mu it esa-esay singkaw, ega magkabaraꞌan in sangbat i kabayuꞌ, sangbat i bakaꞌ? Atkayan naga, mga magpamayaꞌ it ki Cristo, ega magkabaraꞌan in pakikumbiꞌlid sira it iyan ega magpamayaꞌ. Ka unu, magbayaꞌ i kataldengan baw karaꞌe-raꞌetan u atnaga i kaꞌyagan baw kadleman?

¹⁵ Unu, mapakay nga magꞌuyun si Cristo baw si Belial, u mga magpamayaꞌ it ki Cristo baw mga taw nga magpandaꞌga it kanya?

¹⁶ Unuytu, egay piyagbelagan it papagsambaang balay it Ampuꞌang Diyus baw papagsambaang balay it pagbete-beteꞌen nga diyus? Talagang dakulay piyagbelagan ya. Ka kita ngaytu i bilang balay it Ampuꞌang Diyus nga talagang egen it egay kaskedan, ka daꞌga baꞌ kanya naga i nagꞌaat, “Manaꞌidan aku duꞌut kanira baw mangaꞌgenan aku nga maꞌiba-iba nira nga pirmi. Aku na i Ampuꞌang Diyus nga sirbiyan nira, baw sira, buwaten ku na nga taawan ku.”

¹⁷ Maat siꞌ it Ampuꞌang Diyus, “Aypaꞌ ka paꞌalaid kamu nat karaꞌe-raꞌetan it mga taw ngayti. Pablagan mi na sira. Talagang ayaw kamut paꞌuyu-uyut it mga pagbuwaten nirang maraꞌway kat panleteg ku. Iyan, yan i ikatanggap ku it imyu.

¹⁸ Mabut i aldaw nga, aku, Amaꞌ mi na, baw kamu, babay, lalaki, ipabetang ku nayan nga mga anak ku.” Yanay inaat it Ampuꞌang Diyus nga landaw nga guna.