2 Corinto 5 - Tagbanwa

¹ Subung nagaytut bilug ta, ka magkaꞌrutan ta nga maski natay na i pandenaꞌ ngaytung bilug nga bilang pagtataꞌidan ta situt banwa, mabut i aldaw nga begayan tat panlangit nga bilug, nga ega nay kamataynen seked it kaꞌnu-kaꞌnu, nga ega taw i nagbuwat in daꞌga Ampuꞌang Diyus.

² Baw yay matuud, talagang magkakuriꞌan tami mintras situ pat pagtataꞌidan tami ngaytu nga bilug. Aypaꞌ ka pagꞌeꞌlaten ta na nga banar nga magantiyan it mataꞌidan ngaytu duꞌut langit,

³ isaꞌun in subuk makapapakay nat aten i itu ngaytu, daꞌna maꞌaat nga subuk maglelbas i kiyarurwa tami ka egay bilug ya.

⁴ Ta kayti it situ tami pat banwa subuk daꞌta magkabaraꞌan sabap it mga kalubayan baw kakurangan it pandenaꞌ ngaytung bilug ta. Egaytu maat pagpaꞌbutun tami i kamataynen isaꞌun awaꞌan ta it bilug ta ngaytu, in daꞌga iyan i pagpaꞌbutun tami nga banar, nga magantiyan i bilug ta kayti it ega basta-bastang bilug nga panlangit. Ta sikayan, kaꞌgenan tami ngaytung may kaskedan, magantiyan na it kaꞌgenan nga egay kaskedan.

⁵ Ka talagang kita, ipiyasiguru it Ampuꞌang Diyus nga mga taawan ya isaꞌun makatanggap tami it itu ngaytu nga kagayenan. Kanya naga ngaytu nga Ampuꞌang Diyus i garing kaytu. Kamatuudan, piyapasaruman ya kita it Espiritu Santo, nga yay pauꞌna ya.

⁶ Aypaꞌ, kami ngaytu, egay kalubayan it nakem namen maski unu nga kakuriꞌan i mabut. Pagpaꞌbutun nameng banar i kagayenan duꞌut langit ka magkaꞌrutan namen nga mintras situ kami pat banwa daꞌkami kasagpun it banwa it Ampuꞌan nga duꞌut langit.

⁷ Talagang pagsisiguruun namen nga maꞌaten i kagayenan ngaytu kat pagdadarapaꞌen. Yay ipagpadaꞌeg namen kat nakem namen, maski ega paꞌ magkaltegan it mata namen.

⁸ Aypaꞌ maski kamataynen i mabut makseg nagay nakem namen nga tananan i pandenaꞌ ngaytung bilug isaꞌun kasagpun namen nay Ampuꞌan nga duꞌut langit. Baw iyan gasiꞌ i subraꞌ namen nga masagyaan.

⁹ Aypaꞌ ka iyan talagay pagpaꞌresan namen, masagyaan ya kami nga pirmi mintras situ kami pat banwa, baw in duꞌun kami nat langit.

¹⁰ Sabap, yay matuud, mabut i aldaw nga kada esat aten, talagang ipaꞌadap it ki Cristo nga Manigꞌukuman, isaꞌun matanggap tami i tumbas nga uyun kat in unuy binwat ta, magayen u maraꞌe-raꞌet, situt banwa ngaytu.

Magkagayen nay taw baw Ampuꞌang Diyus sabap it binwat ni Cristo

¹¹ Ta, paribasay magkaꞌrutan namen nga kaiꞌlaman talaga i pangukuman ngaytut Ampuꞌan, pagpaꞌresan namen nga kabigen i mga katataawan nga pasakep it kanya. Magkaꞌrutan talaga it Ampuꞌang Diyus nga egay maraꞌe-raꞌet nga antap it nakem namen kat pangadal namen ngaytu, baw pagꞌiꞌinawaren ku nga natantuwan gasiꞌ tu it nakem mi.

¹² Sana ega naga pikiren mi nga pagꞌampangen namen i atkaytu ka magpatuꞌgud kami siꞌ it imyu, in daꞌga isaꞌun mabgayan kamu it kataldengan nga ipanindeg mi it amen baw ikatubag mi it mga taw nga magpanibabaꞌ it amen asan. Iyan nga mga taw, iyan lamang i pagdayawun nira kat taw, mga kat liꞌwan nga magkaltegan. Sana iyan i dayawun nira, magayen nga kat nakem baw adat it taw.

¹³ Ka in kat pabetang it beken asan subuk engel-engel kami, ega kat ulu namen yan sabap kat ikabantug it Ampuꞌang Diyus i pagsirbi namen. Baw in tarunus i pikir namen, simpri kat ikagayen mi naga yan.

¹⁴ Talagang kat muꞌsang pagbuwaten namen, yay magdadaꞌeg kat nakem namen, iyan nga kadakulat raras ni Cristo it aten. Ka in sangbat nga taw, natay nga biyatuꞌan yay muꞌsang taw, aypaꞌ kamataynen ya ngayti, ipagpabetang na nga kamataynen it puꞌsa.

¹⁵ Ta, natay kanya nga biyatuꞌan yay muꞌsang taw isaꞌun, kita nga subuk iba ya it inggen it paꞌuliꞌ, sana mangaꞌgenan tami na nga ega na sadiling kaꞌirgan i paglabiyen in daꞌga kaꞌirgan na it kanya ngayti nga natay sabap it aten, baw naꞌgen naga it paꞌuliꞌ.

¹⁶ Aypaꞌ kayti, ega na ipagpabetang namen nga magayen u ega i maski siyu in sabap lamang it mga kat liꞌwan nga bagay nga magkaltegan. Sabagay tagnaꞌ atkayan naga i pabetang ku it ki Cristo. Temed kayti, talagang ega na atkayan.

¹⁷ Ta, atkayan naga, in siyu-siyu nga talagang maglalagpit na it ki Cristo, mabaꞌgu i muꞌsang-muꞌsa ya. Kaꞌalimbawaan ya, giyuna it sumaꞌup, aypaꞌ ega na i tagnaꞌ ngayti nga karaꞌe-raꞌetan kat pangaꞌgenan ya ka nabaꞌgu na.

¹⁸ Ampuꞌang Diyus tu talaga i garing it muꞌsa ngaytu, ka sabap it kamataynen ni Cristo ipiyabetang ya na kita nga mga iba-iba ya na, ega na kakuntraꞌ. Bawnga riyumraan ya kami nga mga manigpaꞌuliꞌ it taw duꞌut kanya, isaꞌun sira gasiꞌ i ipabetang nga mga iba-iba it Ampuꞌang Diyus.

¹⁹ Ipagpanulduꞌ namen nga, kat kamataynen ni Cristo inabriyan it Ampuꞌang Diyus i dalan it ipagkagayen it taw duꞌut kanya. Ka sabap it kamataynen ngaytu ni Cristo, mapakay na nga ipabetang it Ampuꞌang Diyus i taw nga ega nay kakasalaꞌan nira. Baw ipiyakarguꞌ ya it amen i pangadal it kamatuudan sabap it ituꞌun ngaytu.

²⁰ Aypaꞌ kami ngaytu, mga taraꞌgen ni Cristo, nga subung baꞌ it Ampuꞌang Diyus na i magpakiꞌupakat it mga katataawan nga kami i pagsarigan ya nga manigpanuturan it ampang ya. Talagang maseked-seked i ipagpakiꞌupakat namen it mga taw nga pasakep sirat Ampuꞌang Diyus isaꞌun magkagayen na sira duꞌut kanya.

²¹ Ka, maski egay kakasalaꞌan ni Cristo, ipiyabetang kanya it Ampuꞌang Diyus nga makasalaꞌan sabap it aten nga mga taw, isaꞌun mapakay nga ipabetang ya kita nga mataldeng kat panleteg ya sabap it kamataynen ni Cristo ngayti.