2 Corinto 3 - Tagbanwa

Subraꞌ nga kagayen it baꞌgung pakiꞌupakat it Ampuꞌang Diyus kat katataawan

¹ Barang tu tanud mi pagtuꞌgudun namen na lamang i sadili namen isaꞌun tanggapen mi. Unu baꞌ, subung kami it beken nga kaꞌilangan paꞌ i surat nga ipalteg it imyu nga pamatuud it kagayen it adat nira, u surat nga pamatuud mi it adat nira nga ipalteg duꞌun it beken nga pangadalan nira?

² Temed kami ngaytu, ega kaꞌilangan namen i atkayan, ka kamu na i piyakasurat nga pamatuud it amen. Talagang magkatantuwan namen i pagbaꞌgu it pangaꞌgenan mi baw itu gasiꞌ i magpamatuud kat muꞌsang taw it kagayen it buwat namen asat imyu.

³ Talagang maꞌyag nga kabilangan mi kayti, subuk surat nga si Cristo i tagsurat, baw kami ngaytu i subuk susurat nga giyamit ya. Baw iyan pagbaꞌgu na it pangaꞌgenan mi, yay subuk isiyurat ya, nga egay beken nga subuk ipiyagseket, Espiritu Santo nga ipiyapasarum it Ampuꞌang Diyus nga egen it egay kaskedan. Baw siyuratan it surat ya ngaytu, ega kat dapiꞌpis nga batu nga subuk mga urdin ni Moises, in daꞌga kat nakem mi.

⁴ Kat panleteg it Ampuꞌang Diyus ega magꞌeyaꞌ kami magꞌampang it atkaytu sabap, magayen ngaytung liyapusan it pangadal namen, kat keseg lamang it tabang ni Cristo it amen.

⁵ Ka in kat sadi-sadili namen na lamang ega talagay kakayaan namen nga mabwat i itu ngaytu. Ipiyagꞌildaw tu it amen it Ampuꞌang Diyus.

⁶ Ampuꞌang Diyus ngaytu i nagpatindeg it amen nga manigpangadal it baꞌgung pakiꞌupakat ya kat katataawan. Baꞌgu ngaytung pakiꞌupakat, ega subuk mga magsusurat nga ipiyagꞌurdin it Ampuꞌang Diyus, nga in kat buwat, pagsunudun naga it mga taw temed, in kat nakem, alaid sira kat kaꞌirgan ya. Talagang in atkayan, kamatayneng panriga nga egay kaskedan i liꞌwan ya. Temed in kamatuudan i pagsunud tami it kaꞌirgan it Ampuꞌang Diyus, nga ega lamang kat buwat in daꞌga kat nakem talaga nga tingled, liꞌwan ya, kaꞌgenang egay kaskedan.

⁷ Iyan tagnaꞌ ngayting pakiꞌupakat it Ampuꞌang Diyus, magsugid tu it kamatayneng panriga nga egay kaskedan, ka ega magkasunud it mga taw i mga urdin ya ngayti nga magsusurat kat dapiꞌpis nga batu. Temed maski atkayan, naltegan nagat katataawan i kabantugan it Ampuꞌang Diyus kat pagbegay yat mga urdin ngayti. Ta unu paꞌ it daꞌna magkasarungsung it mga Israelita i magsinggat nga rupa ni Moises maski magkaparaw na. Ta it naltegan i kabantugan it Ampuꞌang Diyus kat dalan ngayti nga kamatayneng panriga nga egay kaskedan i liꞌwan ya,

⁸ daꞌga subraꞌ na nga mamuyaan i kabantugan ya kat baꞌgu ngaytung pakiꞌupakat, nga pagsasaruman nat Espiritu Santo i mga piyakiꞌupakatan ya?

⁹ Eeꞌ baꞌ, in naltegan i kabantugan it Ampuꞌang Diyus kat dalan ngayti nga magpalbaw it panriga it kasalaꞌan, daꞌga subraꞌ paꞌ nga magkamuyaan i kabantugan it Ampuꞌang Diyus kat dalan ngaytu nga magkabgay it kataldengan kat panleteg ya?

¹⁰ Yay matuud, may kabantugan naga it tagnaꞌ ngayting dalan it pagsunud it mga urdin. Temed kayti, subuk ega nay kabantugan ya in ipasbung ta na it subraꞌ paꞌ nga kabantugan it baꞌgu ngaytung pakiꞌupakat.

¹¹ Talagang, in binggayan it Ampuꞌang Diyus it kabantugan i tagnaꞌ ngayti nga kat pabetang-betang ya mabut nga maꞌawaꞌ naga, daꞌga subrang-subraꞌ i kabantugan it baꞌgu ngaytu nga egay kaꞌawaꞌan ya?

¹² Ta, sabap it natantuwan nameng banar i kagayen nga daꞌnay kasubraꞌ it baꞌgu ngaytung dalan it karibriyan, ipagrapar namen it may pagmaꞌiseg it nakem.

¹³ Egaytu subung it ki Moises nga piyayumyuman yay rupa ya isaꞌun ega maltegan it mga Israelita i magkaparaw na nga singgat kat rupa ya.

¹⁴ Temed ta it piyadsen talagay ulu nira. Kamatuudan, seked kayti atkayan naga i mga Judio nga mga tungtung-inapuꞌ nira nga, basta pagbasaen nira i tagnaꞌ ngayting pakiꞌupakat, subuk may ipagpayumyum paꞌ, ka subuk paglingben pat kanira i kamatuudang pagpapuntuꞌan. Ka maꞌawaꞌ lamang i ipaglingeb ngaytu in mamayaꞌ baw pakilagpit sira it ki Cristo.

¹⁵ Eeꞌ baꞌ, talagang seked kayti, kada pagbasaen i mga kasuratan nga ipiyasurat it Ampuꞌang Diyus it ki Moises, subuk pagpayumyuman paꞌ i pikir nira.

¹⁶ Temed in mamayaꞌ baw pakilagpit sira it Ampuꞌan magkaꞌawaꞌ naytuy ipagpayumyum ngaytu.

¹⁷ Ampuꞌan nga pagsangpiten kaytu, sang kagina-ginawaan it Espiritu Santo. Baw basta pagsasaruman tami it Espiritu Santo ngaytu nga ipiyapasarum it Ampuꞌan, liꞌwan ta na kat pamegbeg it kasalaꞌan baw pagkaꞌuripen tat pagsunud it mga urdin ni Moises isaꞌun maribri.

¹⁸ Ta, it kayti nga naꞌawaꞌ na i subuk ipiyayumyum it rupa tami, magkamuyaan ta na i kabantugan it Ampuꞌan, temed ega paꞌ subung it kabantugan ya nga maltegan kat pagdadarapaꞌen. Kabilangan it magkamuyaan kayti, subung paꞌ it magkaltegan duꞌut ega maꞌyag nga salamin. Baw paribasay subuk pirmi tami nga magkamuyaan i kabantugan ya, kat guna it Espiritu Santo nga ipiyapasarum it Ampuꞌan, magsisigi na nga magkabaꞌgu i adat tami, nga magpasbung tami nang muꞌsa it kanya kat kabantugan ya ngaytu.