2 Corinto 11 - Tagbanwa

Ipagpatantu ni Pablo i piyagbelagan nira it mga magpaꞌapu-apustul

¹ Sana dakulaꞌ nagay pasinsiya mi it aken in sigi nga pakisugi-sugid kut imyu nga subung aku nat engel-engel. Pataꞌnan mi lamang i isugid ku ngaytu.

² Ipagsugid kuytu kat kadakulat imun ku, nga subung nat imun it Ampuꞌang Diyus. Ka pagꞌimunan kuy mga magpangadal asan nga magpaneꞌag-teꞌag it pamayaꞌ mi. Ka kamu, kaꞌalimbawaan mi, esang umbay paꞌ nga babay nga ipiyakiꞌupakat ku it esang lalaki, nga lalaki ngayti, si Cristo. Ta it atkayan, simpri ega ireg ku nga subuk salyaen kamu it beken.

³ Magregen aku talaga nga in magꞌuꞌunu inakalan si Eva it dukul nga piyanakman ni Satanas, barang maꞌakalan kamu gasiꞌ i imyu it beken asan. Barang paꞌugad kamu nga ega na tingled duꞌut ki Cristo i pamayaꞌ baw pagsarig mi.

⁴ Sabap pagtanggapen mi i pangadal it maski siyu nga magꞌabut, maski belag kat ipiyangadal namen i pangadal nira sabap it ki Jesus. Pagpakimatuudun mi maski belag kat Espiritu Santo i ipagpangadal nira nga Espiritu, baw maski paggantiyan nira i Magayeng Baritaꞌ nga ipiyangadal namen it imyu.

⁵ Ipagpaliꞌwan it mga magpaꞌapu-apustul asan nga siray mga apustul nga banar nga ega nay kasubraꞌ. Temed maat it pabantug-bantug nat sadili, subung it daꞌku naga tuduꞌ it sang unu kat mga taw ngayan.

⁶ Sabagay maꞌaat aku nga daꞌku makaꞌrut mampang, temed talagang magkasepsepan kung banar i ipagpangadal ku. Daꞌga baꞌ ipiyatantu kuytut imyu it ega lamang kaꞌsa?

⁷ Ta, paribasay daꞌku naga nagpatangdan pagpangadal ku ngayan asan it imyu it Magayen ngaytung Baritaꞌ, barang ipagpaliꞌwan it beken nga binwat kuy atkayan sabap egay kapulusan it ipagpangadal ku. Temed ega. Nagpatimawaꞌ aku isaꞌun makabetang kamu it mataꞌas ka mga taawan nat Ampuꞌang Diyus. Ta, unu, maꞌaat nga kasalaꞌan kuytu?

⁸ Iyan magpangadal aku ngayan asat imyu pagtabangen aku it beken nga mga gurupu it mga magpamayaꞌ kat mga kakurangan ku. Subung bat magkaꞌagawan ku na sira kat panabang ku lamang it imyu.

⁹ Ta basaꞌan in pagkurangen aku asan, ega nagay nasasaw ku nga maski siyu, ka tiyabang aku it mga miyabut nga sulsug kat pamayaꞌ nga taga Macedonia. Talagang seked kayti pagꞌinturun ku nga banar nga ega mabwat aku nga kasasawan mi kat in unu nga mga bagay. Sana mapasigi kuy atkaytu naga nga buwat.

¹⁰ Paribasay manigsirbi aku ni Cristo baw purus kamatuudan i kanya, matuud i pagꞌaaten ku ngaytu. Eeꞌ baꞌ, talagang ega maꞌawaꞌ situt aken i ipagpatuꞌgud ku ngaytu nga, kat pangadal ku kat muꞌsang mga rugar kat sakep it Acaya, ega magpatangdan aku.

¹¹ Ega maat pagbuwaten kuy atkaytu sabap egay raras kut imyu. Talagang magkaꞌrutan tu it Ampuꞌang Diyus nga pagrarasan ku kamu nga banar.

¹² Temed ipasigi kuytuy daꞌku ngaytu magpatangdan isaꞌun matantuwan mi nga ega matuud i ipagpatuꞌgud it beken asan nga, kanirang pagsirbi kunuꞌ, ega nagay piyagbelagan it amen. Sabap kat kanirang pagsirbi, ega matuduꞌ i patangdan.

¹³ Mga taw ngayan, kat mga pagꞌaaten baw pagbuwaten nira, ipagpaliꞌwan nira nga mga matuud sira nga apustul ni Cristo. Temed egay kamatuudan ya kayan. Mamagpaꞌapu-apustul lamang yan.

¹⁴ Egaytu dapat nga maliluꞌan i panluku nira ngaytu, sabap magpasbung sira naga it pagbayaꞌen nira nga si Satanas. Ka si Satanas ngaytu, maski gimpuꞌun kanya it karaꞌe-raꞌetan, paglukuun yay mga taw isaꞌun ipabetang nira kanya nga esang anghil nga garing duꞌun it kaꞌyagan nga duꞌun it Ampuꞌang Diyus.

¹⁵ Aypaꞌ ega maliluꞌan mi i pagꞌaaten it mga magpaꞌapu-apustul asan nga maat, mga manigsirbi sira it Ampuꞌang Diyus nga magtaban it mga taw duꞌut kataldengan, arit mga manigsirbi sira ni Satanas. Iyan talagay baraꞌan nira, rigaen it Ampuꞌang Diyus uyun duꞌun it karaꞌe-raꞌetan ngaytu nga pamagbuwaten nira.

¹⁶ Saꞌupun ku siꞌ i inaat ku, ega sana pikiren mi nga engel-engel aku sabap it pabantug-bantug ku it sadili ku. Temed maski atkayan beteꞌ i tandes mi, tanggapen baw pikiren mi i pagꞌaaten ku ngaytu subung it buwat mi duꞌut mga beken ngayti nga pagpagnegan mi.

¹⁷ Itu, paꞌaaten ku ngaytu nga pabantug-bantug, egaytu garing duꞌun it Ampuꞌan, in daꞌga bilang landi-landi tu it esa nga engel-engel.

¹⁸ Temed eget naytu it pangadal kut imyu. Paribasay dakel i magpabantug-bantug sabap it kabetangan nira situt banwa, pabantug-bantug aku nagay aken isaꞌun pagnegan mi i pangadal ku.

¹⁹ Siguru pataꞌnan mi naga i kaꞌengel-engel ku ngaytu nga landi-landi sabap, masagya kamu nga pagpataꞌnan i buwat it mga engel-engel asan, lamang ipagpaliꞌwan mi nga masesepsep kamu na nga mga taw!

²⁰ Ka ungaytu, pagtanggapen mi sirat masagya maski pagꞌuripnen kamu, pagꞌubsan kamut kusas, paglukuun kamu, pagregesen nga pasakep it paꞌaaten nira nga pudir nira, baw maski pagtampalingen kamu na.

²¹ Temed aku, magꞌeyaꞌ akung banar ka ega atkayan i binwat kut imyu pagpaꞌasan ku! Sayang ka nakman aku lamang, ega maꞌiseg nga subuk kanira! Takaꞌ, in unuy ipagkapalandi-landi nira, ipagkapalandi-landi ku nagay aken. (Talagang sugi-sugid ku ngaytu, subung naytu it sugi-sugid it esang engel-engel.)

²² Ka unu sira, mga Hebreo? Hebreo aku nagay aken. Unu baꞌ, mga duguꞌ sira ni Israel? Yanagay aken nga duguꞌ. Ta unu, mga tungtung-inapuꞌ sira ni Abraham? Ta, aku, tungtung-inapuꞌ ya naga.

²³ Ta mga unu sira, mga manigsirbi ni Cristo? (Sugi-sugid ku ngaytu, sugi-sugid naytu it esa nga magpulpug.) Temed subraꞌ aku nga magayen nga manigsirbi ni Cristo, subraꞌ paꞌ it kanira. Subraꞌ talagay aken nga paꞌres, ka in pira nang bisis aku mapirisu, rinipdasan it ega lamang kaꞌsa, baw talagang pirmi na nga magpangibit-kibit mana kat kamataynen.

²⁴ Limang bisis aku na timnanggap it tagtulung puluꞌ may siyam nga mga ripdas kat alima it mga Judio.

²⁵ Tulung bisis ku na nga liyabay i panriga nga biyalbag, baw kaꞌsa i panriga nga pagbuntalan it batu. Tulung bisis ku na gasiꞌ malabayan nga nasalsag i barkuꞌ nga pagsasakayan ku, baw kaꞌsa nagꞌapun-naglinag i lutaw-lutaw ku duꞌut tengat laud.

²⁶ Kat pirmi ngaytu nga panaw-panaw ku talagang ega esa-esang kagagated i magkaparagan ku, kat mga danum, mga manigpanrangpas, kat mga kaduguꞌ ku nga Judio, baw kat mga ega Judio. Mga kagagated kat siyudad, kat rugar nga kapupuyangtan, kat dagat, baw kat pamuwat-buwat it mga maat sulsug kat pamayaꞌ, arit ega.

²⁷ Talagang nalabayan ku gasiꞌ i subraꞌ nga kakuriꞌ baw kalpuꞌ, pirmi nga pagꞌelken, ereꞌeret nga paggetmanan baw kuꞌinum, baw subraꞌ nga maramig ka egay tantung masagmen.

²⁸ Ta, dungag paꞌ it muꞌsa ngaytu, talagang pagregnan ku it delem-aldaw i kabetangan it mga magpamayaꞌ kat paꞌari-aring banwa.

²⁹ In beteꞌ may maglubay nga pamayaꞌ, subraꞌ nga masakit kat seled ku. Baw in may nakapakursud kat kasalaꞌan, talagang magkaꞌabat i kaꞌiꞌisgan ku.

³⁰ Temed in kaꞌilangan ku nga pabantug-bantug, iyan talagay ipabantug-bantug ku, mga bagay nga magpatantu nga, in aken nga sadili, egay kaya ku.

³¹ Talagang, daꞌkuytu magꞌambut. Magkaꞌrutan tu it Ampuꞌang Diyus, kanya nga Ampuꞌan baw Amaꞌ it Ampuꞌan tami nga si Jesu-Cristo. Sana bantugun kanya it egay katupusan.

³² Ituy esang magpatantu it kurang i aken nga kakayaan, ka iyan kaꞌsa nga duꞌun akut Damasco, binwat it gubirnadur nga ipiyatindeg it adiꞌ nga si Aretas, piyatandaꞌan yat sundaluꞌ i puwirtaꞌan it siyudad ka ipagpadakep ya aku.

³³ Temed iringgud akut mga kaꞌibaan ku duꞌun it supakan bawnga ipiyalapas duꞌun it lalawagan it balay nga pagꞌiꞌistaran ku, ka itiyuꞌnay aku duꞌun it sang balit kutaꞌ. Iyan i ikiyapalagyu ku.