2 Corinto 1 - Tagbanwa

¹ Mga taga Corinto nga magsarig baw magpamayaꞌ it Ampuꞌang Diyus, baw beken nga ipiyapinpin it Ampuꞌang Diyus nga mga taawan ya na asan it muꞌsang prubinsiya it Acaya, wayan i surat namen, aku nga si Pablo nga esang apustul ni Cristo Jesus kat pabetang-betang it Ampuꞌang Diyus, baw si Timoteo nga sulsug tami kat pamayaꞌ.

² Ipagpanalangin namen nga sana asat imyu nga pirmi i ildaw baw kaꞌimbengan it nakem nga ipagbegay it Ampuꞌang Diyus nga Amaꞌ tami baw Ampuꞌan nga si Jesu-Cristo.

Pagtabangen tami nga banar it Ampuꞌang Diyus kat mga kakuriꞌan tami

³ Sana pirmi tami nga pagbantugun baw pagpasalamatan i Ampuꞌang Diyus, kanya nga Amaꞌ it Ampuꞌan tami nga si Jesu-Cristo. Baw kanya ngaytu, Amaꞌ tami gasiꞌ nga subrang maꞌildaw, baw pagpanggaringan it ega basta-bastang ipagkasagya it nakem.

⁴ Talagang daꞌtami pagpabaya-bayaꞌan ya kat mga kakuriꞌan tami, in daꞌga pagpasagyaen yay nakem tami, isaꞌun magkapasagya tami gasiꞌ it in siyu nga may kakuriꞌan. Ka in unuy ipagkasagya it nakem nga ipagbegay it Ampuꞌang Diyus it aten, iyan nagay ipagpasagya tami it nakem it mga maꞌiba ta nga magkakuriꞌan.

⁵ Ka yay matuud, maski sang unu i kadakel it kakuriꞌan nga pagsagkaꞌen tami sabap it pakilagpit tami it ki Cristo, subrang magbastanti i ipagkasagya it nakem nga pagtanggapen tami sabap naga it pakilagpit tat kanya.

⁶ Ta it atkayan, maski na maat magkakuriꞌan kami sabap it katengdanan namen ngaytu nga manigpangadal, kat ikagayen baw ikaribri mi tu. Baw paribasay pagpasagyaen kami it Ampuꞌang Diyus, magkapasagya kami gasit imyu isaꞌun masagkaꞌan mi gasiꞌ it magayen i nakem i mga kakuriꞌan nga paglabayen mi, nga subung gasiꞌ it amen.

⁷ Aypaꞌ ka mapaꞌgen nay inawar namen sabap it imyu, sabap magkaꞌrutan namen nga maski malabayan mi gasiꞌ i mga kakuriꞌan nga pagsagkaꞌen namen, pasagyaen kamu gasiꞌ it Ampuꞌang Diyus, subung nagat amen.

⁸ Mga sulsug kat pamayaꞌ, ipagbaritaꞌ namen it imyu i mga kakuriꞌan nga liyabay namen duꞌun it Asia. Talagang ega basta-basta nga matuud i nalabayan namen. Ega na talagay kasiguruwan namen nga maꞌgen kami paꞌ.

⁹ Tanud namen naꞌbut nay amen nga kapaladan. Palan, nakabetang kami lamang it atkayti isaꞌun daꞌkami sumarig it sadili namen nga kakayaan, in daꞌga guna lamang it Ampuꞌang Diyus, kanya nga manigꞌegen it maski miyatay na.

¹⁰ Talagang ipiyagribri ya kami mana kat pagleltegan namen na nga kamataynen. Baw pagsisiguruun namen nga banar nga pasigi nga iribri ya kami kat muꞌsa nga magꞌaꞌabut-aꞌabut nga ipagkagtas it ginawa.

¹¹ Temed pagꞌangutun namen nga ipasigi mi gasiꞌ i tabang mit amen kat panalangin. Ka in dakel i magpanalangin, pagtubag, simpri dakel na i magbantug baw magpasalamat duꞌun it Ampuꞌang Diyus sabap it tabang yat amen.

Panindeg ni Pablo nga may kasiguruwan naga it pagꞌampangen ya

¹² Ituy magbegay it kasagyaan kat nakem namen nga talagang magkatantuwan namen nga, kat tabang it Ampuꞌang Diyus, purus kamatuudan baw kagayenan i adat namen kat muꞌsang taw, subraꞌ na kamu. Ega maat may maraꞌe-raꞌet nga antap it nakem namen, nga subuk pagꞌadaten it taw situt banwa, in daꞌga magpangaꞌgenan kami kat keseg it tabang it Ampuꞌang Diyus nga ipagꞌildaw yat amen.

^13-14 Kat mga surat namen nga ipiyataban asat imyu egay subuk tagu-taguꞌ nga puntuꞌ, in daꞌga iyan nagang magkasepsepan it maski siyu nga magbasa. Kayti kurang paꞌ i pagkilala mi it adat namen, temed pagꞌiꞌinawaren namen nga mabut i aldaw nga kilalaen mi nga banar isaꞌun, pagꞌabut it aldaw nga pamaꞌuliꞌ it Ampuꞌan tami nga si Jesus, mabantug mi kami, subung naga gasiꞌ i imyu, mabantug namen kamu.

¹⁵ Ta, paribasay pagsisiguruun ku i kasagyaan mi in magkita-kitaen tami, napikir ku na nga lagi katꞌesa nga paꞌasan aku daꞌan it imyu it ega lamang kaꞌsa, isaꞌun ega lamang kaꞌsa gasiꞌ matabangan ku kamu kat pamayaꞌ mi.

¹⁶ Ka rima-rima ku, patuluy aku na asan it magburuꞌ nga paMacedonia, baw panguliꞌ ku, patuluy aku naga isaꞌun matabangan mi aku it panaw ku nga paJudea.

¹⁷ Ta kayti, it ega natabus kuy rima-rima ku ngayti, barang pagpikiren mi nga taw aku nga pageba-gebaꞌ. Barang tanud mi pabaꞌgu-baꞌgu i pagpikiren ku, subung it pagbuwaten it mga taw nga sadiling kaꞌirgan lamang i pagpikiren, nga kayti maat “eeꞌ”, mabwa-mabway maat siꞌ “ega”.

¹⁸ Temed talagang ega magꞌaꞌatkayan. Ka in magꞌuꞌunu ega maꞌambut i Ampuꞌang Diyus, atkayan nagay amen nga, kamatuudan nga muꞌsa i mga ipiyagꞌaat namen it imyu.

¹⁹ Ka iyan si Jesu-Cristo ngaytu nga Anak it Ampuꞌang Diyus, nga ipiyangadal namen nga tulu asat imyu, aku, si Silvano baw si Timoteo, ega maat “eeꞌ” kayti bawnga dedelem “ega” siꞌ. In daꞌga talagang kamatuudan i kanya.

²⁰ Yay matuud, muꞌsa nga isiyanggup it Ampuꞌang Diyus, duꞌut ki Jesu-Cristo i katumanan ya. Aypaꞌ, sabap it pagtuman ya ngaytu, pagkilalaen tami baw ipagpamatuud nga kamatuudan talagay kanya, kat ikabantug it Ampuꞌang Diyus.

²¹ Ampuꞌang Diyus ngaytu i magpapaꞌgen it amen, pati kamu gasiꞌ, isaꞌun magꞌuꞌunay i pamayaꞌ tami it ki Cristo, baw Ampuꞌang Diyus nagaytu i nagpatindeg it aten nga mga manigsirbi ya.

²² Piyapasaruman ya paꞌ kita it Espiritu Santo nga yay bilang markaꞌ yat aten, nga imandaꞌan it talagang mga taawan ya na kita. Baw Espiritu Santo ngaytu i ipiyauꞌna it Ampuꞌang Diyus isaꞌun masiguru tami nga mabut i aldaw nga kumplituun ya i kagayenan nga magꞌaꞌareg it aten.

²³ Ta kayti, ipagpamatuud ku, baw Ampuꞌang Diyus i sistigu ku nga matuud i pagꞌaaten ku ngaytu, nga sabap lamang it ega ireg ku nga madalaꞌan ku kamu ega daꞌan nagpaꞌasan aku. Ka in nagpaꞌasan aku it iting timpu, ega mapakay nga ega diyalaꞌan ku kamung banar.

²⁴ Ega maat ipagpatindeg namen nga mga agalen mi kami nga dapat mi nga sunudun kat pamayaꞌ mi. Ka pamayaꞌ mi ngaytu, nakaꞌunay na duꞌun it ki Cristo. Ireg namen lamang talaga nga tumabang it imyu isaꞌun masagya kamung banar kat pangaꞌgenan nga bagay it kamatuudang pamayaꞌ.