1 Tesalonica 2 - Tagbanwa

Buwat na Pablo duꞌun it Tesalonica baw tiyanaꞌan ya

¹ Talagang maꞌyag it imyu, mga sulsug namen kat pamayaꞌ, nga ega desang karigaan i paꞌasan namen ngayan it imyu.

² Ega gasiꞌ nataguꞌ it imyu in magꞌuꞌunu kami piyakuriꞌan baw tinibabaꞌ duꞌun it Filipos. Temed maski atkayan na, ibinggay it amen it Ampuꞌang Diyus i pagmaꞌiseg it nakem, isaꞌun kapangadal naga asan it imyu i Magayen ngaytung Baritaꞌ, maski dakulaꞌ siꞌ nga pakikuntraꞌ it mga kaꞌibaan mi.

³ Talagang kamatuudan i ipiyangadal namen ngayan asat imyu. Ega maat may antap it nakem namen nga maraꞌway u aꞌakal lamang.

⁴ In daꞌga, yay matuud, siyukdanan baw napakay kami it Ampuꞌang Diyus nga kaꞌuyutan it mga taw nga piyakarguꞌan ya nga manigpangadal it Magayen ngaytung Baritaꞌ. Aypaꞌ ka magpangadal kami, nga ega maat taw i pagpasagyaen namen, in daꞌga Ampuꞌang Diyus, nga egay magkataguꞌ it kanya kat pikir baw nakem ta.

⁵ Magkaꞌrutan tu it Ampuꞌang Diyus baw maꞌyag gasiꞌ it imyu nga, pangadal namen, egay uyut nga ampang nga magpaꞌdung it taw baw ega gasiꞌ desang piyaribaran namen it kupamirak kami.

⁶ Ega gasiꞌ kanget it nakem namen i tuꞌgudun kami it taw, maski kamu u in siyu pang beken,

⁷ maski na maat dakulaꞌ i pudir namen sabap kami, mga piyaꞌapustul naga ni Cristo. In daꞌga, kabilangan namen asat imyu, subung it esang inaꞌ nga madiyu-diyu baw mapiyabayaꞌ-bayaꞌ it mga anak ya.

⁸ Eeꞌ baꞌ, kat kadakulaꞌ it raras namen it imyu, iyan talagay kasagyaan namen, ega desang ipangadal it imyu i Magayen ngaytung Baritaꞌ nga garing duꞌun it Ampuꞌang Diyus, in daꞌga ipirinda namen i pati ginawa namen sabap lamang it imyu. Ka talagang pagrarasan namen kamu.

⁹ Siguru ega payan nalipatan mi, mga sulsug namen kat pamayaꞌ, i namuyaan mi nga delem-aldaw papaꞌres talagay buwat namen, isaꞌun mintras ipagpangadal namen it imyu i Magayen ngaytung Baritaꞌ, magkapanulus kami gasiꞌ it ipagkaꞌgen namen, isaꞌun daꞌkami mabwat nga kasasawan it maski siyu.

¹⁰ Kamu i kapamatuud kaytu. Atnagay Ampuꞌang Diyus, magkaꞌrutan ya gasiꞌ in magꞌuꞌunuy pangaꞌgenan baw adat namen asan it imyu nga mamagpamayaꞌ na. Purus magayen baw mataldeng i namuyaan mi, nga egay naꞌiway mi it amen.

¹¹ Ka daꞌga baꞌ, iyan i namuyaan mi nga pabetang namen it kada esat imyu, subung nat pabetang it amaꞌ it mga anak ya?

¹² Pagpaksegen namen baw pagpasagyaen i mga nakem mi, baw pagpadisiran namen kamu nga mangaꞌgenan it pangaꞌgenan nga bagay talaga it mga taawan it Ampuꞌang Diyus, kanya nga miniliꞌ it imyu isaꞌun mabagiꞌan kamu duꞌun it kaꞌadiꞌan ya it ega basta-bastang kabantugan.

¹³ Itu paꞌ gasiꞌ i pirmi namen nga pagpasalamatan duꞌun it Ampuꞌang Diyus. Iyan ipiyangadal namen ngayan asan it imyu i ampang ya ngaytu, talagang tiyanggap mi baw piyakimatuud mi nga ampang talaga it Ampuꞌang Diyus, ega kat taw lamang. Ka ampang yaytu nga matuud, aypaꞌ ka dakulay paglapusan it ampang ya ngaytu kat pangaꞌgenan mi nga namayaꞌ nat kanya.

¹⁴ Ka daꞌga baꞌ, mga sulsug namen kat pamayaꞌ, nakasbung kamu nat mga taga Judea nga mamagpamayaꞌ it Ampuꞌang Diyus, iyan mga nagpakilagpit nga matuud it ki Cristo Jesus? Ka pagpakuriꞌan kamu it mga kabanwa mi sabap it pamayaꞌ mi, subung nagat mga taga Judea ngayti nga piyakuriꞌan it mga kabanwa nira nga mga Judio.

¹⁵ Mga Judio naga i minimatay it mga prupitaꞌ it tagnaꞌ, baw kayti, minimatay it pati Ampuꞌan nga si Jesus. Baw mga Judio naga i magpakuriꞌ it amen. Unuka ega atkayan it pagkuntraꞌen nira nga banar i kaꞌirgan it Ampuꞌang Diyus? Subung baꞌ it kalaban sira it muꞌsang katataawan.

¹⁶ Kamatuudan, pati pangadal namen ngaytu it Magayeng Baritaꞌ duꞌun it mga taw nga ega Judio isaꞌun makanira gasiꞌ i karibriyan, talagang maseked-seked gasiꞌ nga pagpaaren it mga Judio ngaytu. Talagang karaꞌe-raꞌetan nay nakapnuꞌ, nga kayti subrang-subraꞌ na. Aypaꞌ ka naꞌbut nay miguꞌ na nga banar it bilug nira i iseg it Ampuꞌang Diyus.

Talagang ireg na Pablo nga kapaꞌuliꞌ naga duꞌun it Tesalonica

¹⁷ Ta, in amen, mga sulsug kat pamayaꞌ, sabagay daꞌkami na asan it imyu kayti, temed pikir namen, yay matuud ya, subuk asan naga. Baw garing it nakalꞌid kami na ngayan asan it imyu, nga kat nakem namen atnat piyatayan kami, ereꞌeret na talagay iwas namen it imyu, maski maat ega paꞌ naꞌlay. Talagang ega magpepdek i kupaꞌuliꞌ namen asat imyu.

¹⁸ Talagang kupaꞌuliꞌ kami nagang kupaꞌuliꞌ asan it imyu. Aken, manu-manu yan maat mapanaw na. Temed matuud nga ega magkatupusan si Satanas it ipagbaer ya nga ega ipagkatabus namen.

¹⁹ Simpri, kupakikita kami sit imyu, ka sabap it imyu, dakulaꞌ nga banar nga kasagyaan namen. Baw talagang pagꞌiꞌinawaren namen nga maneꞌteꞌ i pamayaꞌ mi, nga yay kat ikasagya baw ikabantug namen in madap tami na duꞌun it Ampuꞌan tami nga si Jesu-Cristo, kat pamaꞌuliꞌ ya situ.

²⁰ Eeꞌ baꞌ, sabap nagat imyu, talagang ega basta-bastang kasagyaan namen, baw dakulaꞌ nga pagbantug namen duꞌun it Ampuꞌang Diyus.