1 Tesalonica 1 - Tagbanwa

¹ Mga pagmaꞌalen nameng mga sulsug kat pamayaꞌ nga asan it Tesalonica nga mga taawan na it Ampuꞌang Diyus nga Amaꞌ tami, kamu nga maglalagpit nat Ampuꞌan nga si Jesu-Cristo, wayan i surat namen, aku nga si Pablo, si Silas baw si Timoteo. Ipagpanalangin namen nga sana asat imyu nga pirmi i ildaw baw kaꞌimbengan it nakem nga ipagbegay it Ampuꞌang Diyus.

Pagpasalamatan na Pablo i pamayaꞌ it mga taga Tesalonica

² Talagang pirmi kami nga magpasalamat duꞌun it Ampuꞌang Diyus sabap it imyu, baw pirmi namen kamu gasiꞌ nga pagsangpiten kat panalangin namen.

³ Sabap pagdedemdemen namen nga pirmi i buwat mi nga buwaꞌ it pamayaꞌ mi, mga paꞌres mi nga magbayaꞌ it raras mit esa may esa, baw pagsagkaꞌ mit kakuriꞌan it magayen i nakem. Pagsagkaꞌ mi ngaytu, tanaꞌan ya, mapaꞌgen nga paniguru mi. Ka pagsisiguruun mi nga, sabap it pagsarig baw pamayaꞌ mi it Ampuꞌan tami nga si Jesu-Cristo, maribri kamu asan it umur nat banwa, nga duꞌun kamu na it adapan it Ampuꞌang Diyus nga Amaꞌ tami.

⁴ Mga sulsug namen kat pamayaꞌ, nga pagrarasan it Ampuꞌang Diyus, dakulaꞌ gasiꞌ i pasalamat namen duꞌut kanya sabap urut namen talaga nga piniliꞌ ya kamu nga mataawan ya na.

⁵ Kamatuudan, iyan Magayen ngaytung Baritaꞌ pasar it ki Jesu-Cristo nga ipiyangadal namen asan it imyu, egaytu ampang-inampang na lamang, in daꞌga ipiyamatuud tu it guna it Espiritu Santo, aypaꞌ ka piyakimatuud mi. Namuyaan mi in magꞌuꞌunuy pangaꞌgenan namen asan it imyu, nga kat ikagayen mi.

⁶ Ta, giyuru mi i amen ngaytu nga adat, ka magpasbung kamu na gasiꞌ it Ampuꞌan. Maski talagang piyakuriꞌan kamu, temed tiyanggap mit masagya i ampang it Ampuꞌang Diyus nga ipiyangadal namen. Eeꞌ baꞌ, tiyanggap mi it may kamatuudang kasagyaan nga begay it Espiritu Santo.

⁷ Aypaꞌ sikayan, kamu na i magkaguruwan it muꞌsang mga magpamayaꞌ nga asan it prubinsiya it Macedonia baw duꞌun gasiꞌ it Acaya.

⁸ Ka pasigi mi nga ipagpanuturan i ampang ngaytut Ampuꞌan, nga ega lamang desang asan it prubinsiya ngayan nga Macedonia baw Acaya, in daꞌga, duꞌun it paꞌari-aring rugar, nga matanug nay pamayaꞌ mi. Aypaꞌ maski ega na ibaritaꞌ namen duꞌut kanira i pasar it imyu,

⁹ sabap sira na mismu i magsugid it in magꞌuꞌunuy pangaꞌgenan baw pangadal namen asan it imyu. Ipagsugid nira gasiꞌ in magꞌuꞌunu inindiꞌan mi na i pamagsambaen mi nga mga pagbete-beteꞌen nga diyus, sabap natantuwan mi na nga iyan talagay dapat nga sirbiyan, matuud ngaytu nga Ampuꞌang Diyus nga talagang egen.

¹⁰ Maat paꞌ nira, pagꞌelaten mit maseked-seked i pamaꞌuliꞌ it Anak ya nga si Jesus, kanya ngaytu nga inggen ya it paꞌuliꞌ. Paꞌuliꞌ kanya nga matuud nga garing duꞌun it langit, baw sabap it panribri ya it aten, ega na malabayan tami i magꞌaꞌabut nga iseg it Ampuꞌang Diyus.