1 Samuel 8 - Tagbanwa

Kaꞌirgan it mga Israelita, may adiꞌ na nirat kanira

¹ Iyan gurang na si Samuel ngayti, ipiyatindeg yay mga anak ya nga mga manigꞌukuman it bangsa nira ngayti nga Israel.

² Panganay nga anak ya si Joel, sumunud si Abias. Duwa sira ngayti i mga manigꞌukuman duꞌun it Beer-seba.

³ Temed ta, piyasyangan nira i adat it amaꞌ nira ngayti. Malupig siray kanira, baw magtanggap sirat ipagbegay nga pabur, baw ega kataldengan i ipagpapanaw nirat kanira.

⁴ Ta it atkayti, binwat it mga magu-magugurang nga mga Israelita ngayti, namagtiꞌme-tiꞌmesen, ka naꞌaduꞌun sirat ki Samuel nga duꞌun ngaytit Rama.

⁵ Pagꞌabut, maat nira, “Kayti, magurang ka naytu. Ta unu nay baraꞌan namen it mga anak mu ngaytu, piyasyangan na niray adat mut imu? Ta kayti, sana piliꞌan mu kami it esang magꞌadiꞌ it amen baw kanya na i mamaalaꞌ nga subung it beken ngaytung mga bangsa.”

⁶ Ega magkapakay si Samuel it iti ngayting sugi-sugid it mga taw ngayti. Aypaꞌ egay beken nga binwat ya, nanalangin kanya duꞌun it AMPUꞌANG DIYUS.

⁷ Tiyubag kanya it AMPUꞌANG DIYUS, nga magꞌaat, “Sunudun mu nay pagꞌangutun it mga taw ngayan, ka yay matuud, ega yan ikaw i pagdaꞌkuun nira, in daꞌga akuy pagdaꞌkuun nirang mamaalaꞌ it kanira.

⁸ Ka pagbuwaten nira ngaytut imu kayti, pagbuwaten nira naytut aken garing it pagpaliꞌwan kut kanira duꞌun it Egipto. Talagang katꞌesa pang lagi inindiꞌan nira na aku. Simnamba na sirat mga pagbete-beteꞌen nga diyus.”