1 Samuel 26 - Tagbanwa

Saꞌup siꞌ nga piyaltegan ni David si Saul it magayeng adat

¹ Iyan duꞌun si Saul it Gabaa may miyabut duꞌut kanya nga mga Zifeo. Isiyugid nira nga duꞌun si David magpatataguꞌ it bulud it Haquila, nga kat lebatang ayun it Jesimon.

² Pagkaꞌrut ni Saul, napanaw nga lagi kanya. Tulung ribu i mga ega babasta-bastaen nga mga sundaluꞌ ya nga piyabayaꞌ ya, ka tulusun nira si David ngayti.

³ Nagkampu sira duꞌun it umid it dalan nga duꞌun it bulud ngayti it Haquila. Na David ngayti, duꞌun sira it kapupuyangtan nga rugar. Pagkabaritaꞌ ni David it pagtulusun siꞌ kanya ni Saul,

⁴ may piyapanaw ya nga magbaklay-baklay. Pagkaꞌuliꞌ it mga piyapanaw ya ngayti, naꞌrutan ya nga talagang pagtulusun kanya nga matuud ni Saul.

⁵ Pagkaꞌrut ni David, napanaw kanya nga naꞌaduꞌun it pagkakampuwan na Saul ngayti. Timnaksiꞌ kanya, mamuyaan ya, paglilibutun si Saul it mga sundaluꞌ ya, baw pagꞌigaꞌan ni Saul ngayti, duꞌun it ulid it piyakapagbayaꞌen it sundaluꞌ ya nga si Abner, nga anak ni Ner.

⁶ Inupakat ni David i esang Heteo nga si Abimelec baw si Abisai, nga sulsug ni Joab nga anak ni Sarvia. Maat ya it kanira, “Siyuy mayaꞌ it aken duꞌun it kampu na Saul?” “Aken, mayaꞌ aku,” maat ni Abisai.

⁷ Pagdelem daꞌnay parbitik na David, duwa ni Abisai, it siminled duꞌun it kampu na Saul ngayti. Abutan nira, duꞌun naga si Saul magꞌigaꞌ, nga paglilibutun it mga sundaluꞌ ya, baw duꞌun kanya nagat ulid ni Abner. Magrurugsuk i besak ni Saul duꞌun it uluwan ya.

⁸ Maat ni Abisai ngayti it ki David, “Talagang ipiyagꞌildaw na it Ampuꞌang Diyus it imu i kalaban mu ngaytu. Unu, ireg mu nga tursadan ku na kanya it besak? Talagang kaꞌsa lamang tu, ega naytuy saꞌupun.”

⁹ Temed katubag si David, “Ayaw! Ega buwaten mu yan. Dakulaꞌ talaga nga kasalaꞌan i mimatay it taw nga ipiyatindeg it AMPUꞌANG DIYUS nga mangatengdanan.

¹⁰ Talagang pagsisiguruun ku nga AMPUꞌANG DIYUS na i baalaꞌ mimatay it kanya. Simpri, maski paꞌlayen mabut yan i aldaw nga matay kanya. U barang pagbunuꞌ i ipatay ya.

¹¹ Talagang ega yan kaꞌirgan it AMPUꞌANG DIYUS nga tedagat alima ku i ipiyatindeg ya nga mangatengdanan. Iyan lamang i buwaten ta, pisiꞌen i besak ya baw dadanuman ya ngaytu, bawnga mapanaw ta na.”

¹² Egay beken, pinsiꞌ ni David i besak ngayti nga magrurugsuk duꞌun it uluwan ni Saul baw dadanuman ngayti, bawnga napanaw na sira. Maski sang kataawan, egay nasulag it kadakel nira ngayti, ka piyaꞌlek it AMPUꞌANG DIYUS i igaꞌ nira. Aypaꞌ ka miyabut baw napanaw na ngayti na David, egay nakabatiꞌ nga maski sang kataawan.