1 Samuel 24 - Tagbanwa

Piyaltegan ni David si Saul it magayeng adat

¹ Kaꞌsa, pagkaꞌuliꞌ ni Saul garing miyusig it mga Filisteo, may simnugid duꞌut kanya nga, si David, duꞌun it rugar nga kapupuyangtan nga duꞌun it En-gedi.

² Pagkaꞌrut ya, miniliꞌ kanya it tulung ribu i mga ega babasta-bastaen nga sundaluꞌ ya. Iti i piyabayaꞌ ya it tumulus it ki David duꞌun it bukid nga pagpangaranan it Bukid it Mga Maklag nga Kambing.

³ Napsag it panaw nira i esang kubkub nga duꞌun it esang pagkurungan it mga tupa nga duꞌun it umid it dalan. Siminled si Saul duꞌun ka magrara i tinaꞌi ya. Egay uru-urut ya nga, palan, duꞌun it seled it iting kubkub na David namagpatataguꞌ.

⁴ Inaat si David it mga taawan ya, “Siguru katumanan na baytu it inampang ngayan it AMPUꞌANG DIYUS ngayan nga magꞌaat, ‘Ibgay kut imu i kalaban mu isaꞌun mabwat mu it in unuy ireg mu nga buwaten it kanya.’” Tiniꞌer ni David. Pagkapatpad ya minila-ilap kanya it sagyaden it pakayan ni Saul ngayti.

⁵ Temed pagkabwat ya kayti, timimbaw kat nakem ya nga ega magayen i binwat ya ka subung nat tinibabaꞌ ya i adiꞌ ngayti.

⁶ Aypaꞌ ka maat ni David it mga taawan ya, “Talagang ega yan kaꞌirgan it AMPUꞌANG DIYUS nga tibabaꞌen ku i agalen ku ngaytu u tedagan it alima ku. Ka AMPUꞌANG DIYUS i nagpatindeg it kanya kat pagkaꞌadiꞌ ya.”

⁷ Ta, kat iting inampang ya nasabatan naga ni David i mga kaꞌibaan ya ngayti nga kuꞌimatay it ki Saul. Aypaꞌ piyataꞌnan nira lamang nga napanaw si Saul ngayti.