1 Samuel 23 - Tagbanwa

Piyakseg ni Jonatan i nakem ni David

¹⁴ Gimnaring it iting timpu, seked naꞌlay nang naꞌlay, sigi gang tiꞌes ni Saul it ki David. Kamatuudan, mintras egen kanya, ega pagpepdekan yat tumulus. Temed ta, paribasay ega ipagꞌintulut it Ampuꞌang Diyus, ega magkaparagan ya. Si David ngayti, binwat ya nga pagpatataguꞌan ya, duꞌut rugar nga maraꞌang i babalayan baw mabuludun nga duꞌut Zif.

¹⁵ Talagang ega magpepdek it keber-keber i seled ni David ka urut ya nga pagtiꞌsen nga banar kanya ni Saul.

¹⁶ Iyan kaꞌsa nga duꞌun kanyat Hores nga duꞌun nagat rugar ngaytit Zif, inaduꞌun kanya ni Jonatan nga anak ngayti ni Saul. Piyakseg yay nakem ni David kat pamayaꞌ ya it Ampuꞌang Diyus.

¹⁷ Maat i inaat yat kanya, “David, ayaw kat iꞌlam. Daꞌka yan maꞌimatay ni Amaꞌ. Ikaw yan i magꞌadiꞌ situt Israel. Pangadwa mana nga katengdanan i aken. Urut naytu ni Amaꞌ i itung mga bagay.”

¹⁸ Piyapaꞌgen nira siꞌ i upakat nga pagꞌiba-iba nira ngayti, nga pagdedngegen it AMPUꞌANG DIYUS. Pagkatupus it kumpur kusugi-sugiden nirang duwa, ki Jonatan ngayti miyuliꞌ na, ki David duꞌun nagat Hores ngayti.