1 Samuel 18 - Tagbanwa

Ininggitan ni Saul si David

¹ Natupus nay sugi-sugid na Saul duwa ni David. Ta garing kayti, talagang pagmaꞌalen si David ni Jonatan nga anak ni Saul ngayti nga adiꞌ. Yay matuud, raras yat ki David ngayti, subung nagat raras yat sadili ya nga bilug.

² Baw garing gasiꞌ sikayti, ega na piyaꞌuliꞌ ni Saul si David.

³ Sabap it talagang matuud i pagmaꞌal ni Jonatan it ki David ngayti, isiyanggup ya nga magꞌiba-iba sirang matuud it egay katupusan nga pagꞌiba-iba.

⁴ Keseg it sanggup ya ngayti, ibinggay ya nat ki David i pati pagpapakayen ya, gulamen ya baw beken paꞌ, baw mga paggamiten it magpakibunuꞌ, pati karis ya, panaꞌ ya baw sinturun ya. Ibinggay ya nang tanan.

⁵ Talagang magpandaꞌeg si David ngayti, maski ari parumpakan ni Saul. Ta it atkayti, egay beken, binwat na kanya ni Saul ngayti nga esang pagbayaꞌen nat mga sundaluꞌ ya. Nasagyaan it muꞌsang Israelita i pagtaꞌas it katengdanan ni David ngayti. May katengdanan it ega, talagang masasagya sira. Pati mga taawan duꞌun it pamalay-balay it adiꞌ ngayti, masagya gasiꞌ.

⁶ Ta pagkapatay ni David it ki Goliat, baw pagkatiwas nat pakibunuꞌ nirat mga Filisteo, miyuliꞌ nay adiꞌ ngayti nga si Saul baw mga sundaluꞌ ya duꞌut babalayan nira. Kat panguliꞌ nira ngayti, kada yan pesagen nira nga lansangan, susmuun sirat mga mamagkakantaꞌ-kantaꞌ nga may turugtugun baw mamagbabayliꞌ-bayliꞌ nga mga kabababayan nga taga duꞌun.

⁷ Magꞌaat i pagkantaꞌ-kantaꞌen nira, “Ribu-ribu i napatay it adiꞌ nga si Saul, iyan ki David nga napatay, piyuluꞌ-puluꞌ nga ribu.”

⁸ Pagkagneg ni Saul kayti, miniseg kanya ka ereꞌeret nga kaꞌinggit ya. “Ta yan palan in pagpuluꞌ-puluꞌun na ngayan nirang ribu i ki David nga napatay, aken desang ribu-ribu, daꞌga in atkayan palan, yamanay kurang, si David na ngaytuy kilalaen nirang adiꞌ.”

⁹ Unupat gimnaring duꞌun kayti, kat kadakulat inggit ya, belag nay panenyekan ya it ki David.

¹⁰ Pagꞌeyag siꞌ, riyangtan siꞌ si Saul it magpapulpug ngayti nga maraꞌe-raꞌet nga ipagpaꞌabut it AMPUꞌANG DIYUS. Aypaꞌ binwat ni David, timnugtug siꞌ it alpa ya ngayti, subung nat buwat ya ngaytit kaꞌlay. Pagseskelen ni Saul i besak yat nadnganan it riyangtan ngayti.

¹¹ Unupat kadwa bakalen ya si David, ka kuꞌimatayen ya. Gayen lamang nalyasan naga ni David.

¹² Magꞌiꞌlam si Saul it ki David ngayti ka natantuwan ya nga ega na kanya i pagtatarimaen it AMPUꞌANG DIYUS in daꞌga si David na ngayti.

¹³ Aypaꞌ ka isaꞌun lamang kapaꞌalaid duꞌun it kanya, binwat ya si David nga pagbayaꞌen it sang ribu nga mga sundaluꞌ. Pagpanguꞌnaan ni David i sang ribu ngayti it magpakibunuꞌ.

¹⁴ Baw yay matuud, maski ari-ari pakibunuꞌan na David, magpandaꞌeg sira, sabap it talagang pagtatarimaen kanyang pirmi it AMPUꞌANG DIYUS.

¹⁵ Ta sabap it atkayti na ngayti, subuk timnalaluꞌ i iꞌlam ni Saul it ki David ngayti.

¹⁶ Takaꞌ kat mga taw, puꞌsang mga taga Israel, nga ega lamang mga kaduguꞌ ya nga taga Juda, subrang pagmaꞌalen nira si David ngayti, sabap duꞌut mga pandaꞌeg ya kat maski siyu nga mga kakuntraꞌ nira.

¹⁷ Iyan atkayti na ngayti, maat ni Saul it ki David, “Ipaꞌasawa kut imu i anak ku nga akaꞌ nga si Merab in magsirbi ka it magayen situt aken baw sariyan mut pakibunuꞌ i bangsat taw nga magpakikuntraꞌ it AMPUꞌANG DIYUS.” Takaꞌ iyan talagay antap it nakem ni Saul, isaꞌun lamang mapatay si David it mga pagpakibunuꞌan ya ngayting mga Filisteo, isaꞌun maꞌawaꞌ na si David it egay ki Saul nga panubagan.