1 Samuel 16 - Tagbanwa

¹ Naꞌlay nga kasmek ni Samuel it iti ngayti. Ta it atkayti, maat it AMPUꞌANG DIYUS it kanya, “Ega naga mategelan mut kasmek i pagꞌawaꞌ ku ngaytut pagkaꞌadiꞌ duꞌut ki Saul. Ipnuꞌun mu i pagbebtangan mut lana baw tabanen mu it paꞌaduꞌun it ki Jesse nga duꞌut Betlehem, ka piniliꞌ kuy esang anak ya nga magꞌadiꞌ.”

² Katubag si Samuel, maat ya, “Magꞌuꞌunu yan i ikaꞌaduꞌun ku, it siguradu yan nga imatayen aku ni Saul in maꞌrutan yay inaduꞌun ku?” Maat it AMPUꞌANG DIYUS it kanya, “Tumaban ka it sangbat i dumaraga nga bakaꞌ. Aaten mu nga magbuwat ka it ipagsamba it aken duꞌun.

³ Pagꞌabut mu duꞌun imbitaren mu si Jesse. Bawnga itulduꞌ kut imu in unuy buwaten mu baw in siyuy paturuꞌan mut lana.”

⁴ Egay beken, siyunud ni Samuel i taꞌeg ngaytit AMPUꞌANG DIYUS it kanya. Naꞌaduꞌun kanya nga matuud it Betlehem. Pagꞌabut ya duꞌun, siyusmu kanyat mga ginuꞌu duꞌut iti nga lansangan. Magꞌerꞌer nay ampang nirat miningkut, maat nira, “Unu naytuy enged mu ngaytu, ikagayen namen naga?”

⁵ “Aaꞌ, eeꞌ,” maat i tubag ni Samuel, “naꞌasitu aku ka magꞌanteng it ipagsamba duꞌun it AMPUꞌANG DIYUS. Ipasiguru mi i sadili mi nga kanya na, bawnga paragiꞌ kamu it buwat ku ngaytu.” Ipiyasiguru ya gasiꞌ na Jesse, sang siraan magꞌaꞌanak, duꞌun it Ampuꞌang Diyus, ka yanayti, inimbitar ya gasiꞌ sira duꞌut pagbuwat ya ngaytit pagsamba duꞌun it AMPUꞌANG DIYUS.

⁶ Iyan miyabut na na Jesse baw mga anak ya, naltegan ni Samuel si Eliab nga panganay ni Jesse. Liniling ya it magayen, kat nake-nakem ya, “Siguru yanaytuy piniliꞌ it AMPUꞌANG DIYUS nga magꞌadiꞌ.”

⁷ Temed maat it AMPUꞌANG DIYUS it kanya, “Ega letganan mu i kalawas ya baw kagayen it tindeg ya. Ega kanya i piniliꞌ ku. Ka aku, ega yay pagletganan ku, pagkinataw, nga subuk imyung mga taw nga pagkinataw i pagletganan. Pamataw i kat taw nga pagletganan temed aken, kat nakem ya i paglilingen ku.”

⁸ Pagkataꞌlib ni Eliab ngayti, si Abinadab siꞌ i tiyaꞌwagan ni Jesse, ka yan siꞌ i piyasarimbay duꞌut sarungaan ni Samuel. Temed nangeyeng-keyeng si Samuel, baw maat ya, “Ega gasiꞌ kanya i piniliꞌ it AMPUꞌANG DIYUS.”

⁹ Sunud siꞌ nga tiyaꞌwagan ni Jesse si Samma, temed atkayti nagay inaat ni Samuel nga ega iti i piniliꞌ it AMPUꞌANG DIYUS.

¹⁰ Napuꞌsa ni Jesse it tumaꞌwag i pitung kataawan nga mga anak ya, temed egay piniliꞌ it AMPUꞌANG DIYUS duꞌut kanirang muꞌsa.

¹¹ Pagkateptep it pitu ngayti, miningkut si Samuel it ki Jesse, maat ya, “Unu, ega nay anak mi nga beken? Unu, sira na lamang ngayan nga muꞌsa?” “May sangbat paꞌ bayang anak namen, si David, nga yanay kiyaꞌpusan,” maat ni Jesse ngayti. “Duꞌun kanya magꞌeper it mga tupa namen.” Maat ni Samuel, “Magayen ipapisiꞌ mu. Ega daꞌan buwaten tami i ipagsamba ngaytu nga pagꞌantengen basta ega paꞌ miyabut kanya.”

¹² Egay beken, pinsiꞌ i iting anak na Jesse. Kanaꞌkan kanya, magayeng pamimilugan, pasalu-padibwat magayen nga pagletganan. Maat it AMPUꞌANG DIYUS it ki Samuel, “Kanya na i piniliꞌ ku. Paturuꞌan mu na kanya it lana.”

¹³ Aypaꞌ kinwat ni Samuel i pagbebtangan ngaytit lana, bawnga piyaturuꞌan ya nay ulu ni David ngayti kat adapan it mga sulsug ya ngayting muꞌsa. Garing sikayti pagsasaruman nang pirmi si David it Espiritu Santo it AMPUꞌANG DIYUS nga magpakseg it kanya. Ki Samuel, miyuliꞌ na kanya duꞌun it Rama.

Siminled si David it pagsirbi it ki Saul

¹⁴ Tiyananan na si Saul it Espiritu Santo it AMPUꞌANG DIYUS, bawnga pagpataꞌnan na kanyat AMPUꞌANG DIYUS ngayti nga baꞌnaw-baꞌnawun it esang maraꞌe-raꞌet nga magpakuriꞌ it kanya.

¹⁵ Inaat si Saul it mga manigsirbi ya, “Subuk pagpataꞌnan ka nat AMPUꞌANG DIYUS nga pakuriꞌan ka it esang maraꞌe-raꞌet.

¹⁶ In ireg mu, tulusan namen ikaw it esang makaꞌrut tumugtug it turugtugun. Bawnga in rangtan ka siꞌ it pabetang ngaytut imu it Ampuꞌang Diyus, patugtugun mu na kanya, isaꞌun malinga-lingay nakem mu.”

¹⁷ “Eeꞌ,” maat ni Saul, “magayen in atkayan. Sigi, tumulus kamu na.”

¹⁸ May esa kat taawan ya nga mangaꞌwaꞌen paꞌ nga nakasugid nga magꞌaat, “Si Jesse nga taga Betlehem, may esa nga anak ya nga talagang magkaꞌrut tumugtug, baw maꞌiseg kanyang taw nga ega lilipi-lipiyen. Makaꞌrut mampang baw kanaꞌkan nga lalaki. Temed subrat muꞌsa, duꞌut kanya nga pirmi i AMPUꞌANG DIYUS.”

¹⁹ Egay beken, may piyapanaw ni Saul nga naꞌaduꞌut ki Jesse nga tinggunan ya nga magꞌaat, “Papaꞌasiniyen mut aken i anak mu nga si David nga manigꞌeper ngayan it tupa mi.”

²⁰ Ega diyaꞌga ni Jesse i tugun ngayti ni Saul. Piyapanaw ya na si David. Piyataban ya paꞌ kanyat irimnun nga punuꞌ i pagbebtangan, esay uꞌuybun it kambing baw sang kakabayuꞌan i nanindeg it tinapay nga iꞌabut it ki Saul.

²¹ Pagꞌabut ya duꞌun, simnirbi na si David it ki Saul, baw talagang siyagyaan ni Saul si David ngayti. Binwat kanya nga esa it mga manigtaban it ipagpakibunuꞌ ya.

²² Piyasugidan ni Saul si Jesse nga magꞌaat, “Pataꞌnan mu na sinit aken si David ngayni ka kasasagyaan ku na kanya.”

²³ Kada yan rangtan si Saul, pagtugtugan kanya ni David it turugtugun ngayting alpa. Ta in atkayti subuk magkalinga-linga si Saul, magliꞌid nga lagi i maraꞌe-raꞌet ngayti nga ipagpaꞌabut duꞌun it kanya it AMPUꞌANG DIYUS, langkuy gumayen siꞌ i nakem ya.