1 Samuel 15 - Tagbanwa

Inawaꞌan nat Ampuꞌang Diyus si Saul it pagkaꞌadiꞌ ya

¹ Kaꞌsa maat ni Samuel it ki Saul, “Daꞌga basaꞌan itiyaꞌeg it aken it AMPUꞌANG DIYUS nga landaw nga gunaan nga paturuꞌan i ulu mut lana, baw ipasiguru ka nga adiꞌ it Israel? Kayti pagnegan mu i inampang ya nga ipagpaꞌabut ya situt imu.

² Ituy ipagpaꞌaat yat aken. Maat ya, ‘Talagang pakuriꞌan ku i mga Amalecita sabap it piyakibunuꞌan nira i mga taawan ku ngaytu nga mga Israelita, iyan magpanaw paꞌ sira nga garing duꞌut Egipto.

³ Aypaꞌ kayti rumpakan mu i mga Amalecita. Puuꞌun mu sirang muꞌsa. Panranggaꞌen muy muꞌsang mga kusas nira, egay sanguꞌan nga maski unu. Imatayen mu sirang muꞌsa, babay, lalaki, gumaring kat gurang nang gurang, sareg it paduduꞌun. Pangimatayen mu gasiꞌ i muꞌsa nga mga ayep nira, mga bakaꞌ, tupa, kamelyo, mga kabayuꞌ nga asno. Abaa, muꞌsa bang ayep egay ipaꞌped.’”

⁴ Egay beken, tiningped ni Saul duꞌut Telaim i sundaluꞌ it Israel. Bilangen yay muꞌsa ngayting mga sundaluꞌ, duwang gatus nga ribu. Puyray sang puluꞌ nga ribu nga ginmaring duꞌut Juda.

⁵ Piyanguꞌnaan yay kadakel ngayti, naꞌaduꞌun na sirat siyudad it Amalec. Nagrenren sira duꞌut esang mintang nga adeꞌdeng na duꞌut siyudad ngayti ka mapaꞌ na sira duꞌun.

⁶ Temed piyapaꞌaduꞌunan daꞌan ni Saul i mga Cineo nga magraragit mga Amalecita duꞌut iting siyudad, ka ipiyaꞌaat ya nga limꞌid siray kanira duꞌun. Inaat sira nga, “Pablag nat mga Amalecita isaꞌun daꞌkamu makaꞌuyut it kanira, sabap piyaltegan mi kami it magayeng adat iyan magpanaw kami paꞌ ngayan nga garing duꞌut Egipto.” Pagkaꞌru-kaꞌrut it mga Cineo ngayti, dimnali-daliꞌ na sirat limꞌid.

⁷ Pagkalꞌid it mga Cineo ngayti, ta yapay siyulung na niray mga Amalecita. Piyakibunuꞌan niray mga Amalecita ngayti garing duꞌun it Avila miyabut duꞌun it Sur, kat lebatang ayun it Egipto.

⁸ Piyangimatay niray muꞌsang mga Amalecita ngayti temed adiꞌ nira nga si Agag, diyakepan nira lamang.

⁹ Ega gasiꞌ inimatay nira i magagayeng mga bakaꞌ, tupa baw beken nga matatabaꞌ nga ayep duꞌun. Iyan lamang i piyangimatay nira, iyan nga ega nay maꞌargan.

¹⁰ Ta it atkayti, maat siꞌ it AMPUꞌANG DIYUS it ki Samuel,

¹¹ “Sayang na lamang i pagpiliꞌ ku it ki Saul nga magꞌadiꞌ, sabap tiyalikudan ya naga aku. Ega siyunud yay mga ipiyagꞌaat kut kanya.” Pagkagneg ni Samuel kayti, nasmek kanya nga banar. Naglinag naga kanya nga magpasanguꞌ-sanguꞌ duꞌun it AMPUꞌANG DIYUS sabap it ki Saul ngayti.

¹² Pagkadedelman, miyadle-adlem si Samuel nga kimita it ki Saul. Takaꞌ daꞌsira nagparag nga lagi sabap naꞌaduꞌun si Saul it Carmelo ka magbuwat kanya duꞌun it sadili yang piyakaꞌarandeman nga kabantugan. In maꞌman na, lumangbus kanya duꞌun it Gilgal.

¹³ Tiyundug ni Samuel si Saul ngayti. Pagkalteg ni Saul it ki Samuel, kiyumusta yang lagi bawnga maat ya, “Siyunud kung muꞌsa i inaat it AMPUꞌANG DIYUS.”

¹⁴ Temed maat ni Samuel, “Ta, in siyunud mu, unuka may magkagnegan ku nga tingeg it mga tupa baw ngaaꞌ it mga bakaꞌ?”

¹⁵ Maat i tubag ni Saul, “Mga rangpasan nira yan duꞌut mga Amalecita, ka buwat it mga taawan ku, pinsiꞌ i kumpur magagayeng mga tupa baw mga bakaꞌ ka buwateng isamba duꞌun it AMPUꞌANG DIYUS mu. Iyan ega nay mapulus, piyangimatay namen na, baw itiyuduꞌ namen naga duꞌun.”

¹⁶ Maat ni Samuel ngayti, “Pagnegan mu i ipiyagꞌaat it AMPUꞌANG DIYUS it aken kat delem.” “Unu makay inaat ya?” maat ni Saul.

¹⁷ Maat ni Samuel, “Iyan tagnaꞌ, ikaw mismu i nagpakilala nga timawaꞌ ka. Kayti ikaw nay ulu-ulu it mga Israelita, sabap piniliꞌ ka na it AMPUꞌANG DIYUS baw piyaturuꞌan kat lana isaꞌun kapagꞌadiꞌ ka.

¹⁸ Inurdinan ka nga sulungun mu i mga Amalecita nga maraꞌe-raꞌet i adat kat panleteg it AMPUꞌANG DIYUS. Baw ipiyagbenge-bengel nga puuꞌun mi sira. Egay ipaꞌped.

¹⁹ Ta unuka liyaban muy urdin it AMPUꞌANG DIYUS? Unuka piyagꞌaga-agawan mi na i panrangpas? Yay matuud, binwat mu ngaytung ituꞌun, dakulaꞌ siꞌ nga kasalaꞌan duꞌun it AMPUꞌANG DIYUS.”

²⁰ Katubag si Saul, maat ya, “Siyunud ku nagay AMPUꞌANG DIYUS. Inaduꞌun kuy pagtaꞌgan yat aken. Diyakepan ku si Agag nga adiꞌ it Amalecita. Piyuuꞌ kuy muꞌsang mga Amalecita.

²¹ Sabagay piniliꞌ it mga taawan ku i piyakamagayen nga mga tupa baw mga bakaꞌ, ega ipiyaꞌuyut nirat mimatay it beken ngayting piyangimatay nira. Temed binwat niray atkayan ka tabanen nira duꞌun it Gilgal, ka buwaten nga isamba duꞌun it Ampuꞌang Diyus mu.”

²² Temed maat siꞌ ni Samuel ngayti, “Unuy pikir mu, unuy subrang magkaꞌirgan it AMPUꞌANG DIYUS, iyan pagꞌantengen nga ramu-ramu nga ipagsamba tat kanya u pagsunud tat pagꞌaaten ya? Yay matuud, pagsunud tat kanya, yay subraꞌ paꞌ nga mataꞌas. Magayen nagang buwat i magꞌanteng it tupa pati tabaꞌ ya, nga ipagsamba duꞌun it AMPUꞌANG DIYUS. Temed yay subraꞌ pang magayen nga buwat, magpagneg baw magsunud it pagꞌaaten ya.

²³ Ka paglaban ngaytut kanya, ega nagay piyagbelagan it karaꞌe-raꞌet it magpanaꞌwag it mga maraꞌe-raꞌet. Baw iyan adat nga mapiyasubraꞌ-subraꞌ, subung naga it buwat nga magsamba it pagbete-beteꞌen nga diyus. Ta it ega piyamayaꞌ mu i AMPUꞌANG DIYUS, bibasen ya na ikaw kat pagꞌadiꞌ mu kat piniliꞌ ya nga mga taw.”

²⁴ Pagkagneg ni Saul kayti, maat ya, “Matuud na. Nagkasalaꞌan aku na. Ka ega nga matuud siyunud ku i ipiyagꞌurdin it AMPUꞌANG DIYUS baw iyan nga mga itinggun mut aken. Nabwat ku bay atkaytu ka miniꞌlam akut mga taawan ku, aypaꞌ siyunud ku na i kaꞌirgan nira.

²⁵ Kayti pagꞌangutun ku nagay kaꞌildawan mu nga pasinsiyaen mu naga aku baw ibaan mu naga aku it manamba duꞌun it AMPUꞌANG DIYUS.”

²⁶ Katubag si Samuel, “Ega na mapakay nga maꞌibaan ku paꞌ ikaw it manamba ka ega na siyunud mu i urdin it AMPUꞌANG DIYUS, baw binibas ya na ngayan ikaw kat pagkaꞌadiꞌ mu it Israel.”

²⁷ Nanalikud na si Samuel ka mapanaw na. Temed piyamgutan ni Saul i sagyaden it pakayan ni Samuel ngayti, unupat narasik nat napeꞌtek nga lagi.

²⁸ Pagkaꞌanu kayti mampang si Samuel, maat ya, “Atkayan kayti i binwat it AMPUꞌANG DIYUS. Subuk kaꞌalimbawaan it riyasik ya na i pagkaꞌadiꞌ mu, ka inawaꞌ ya na situt imu. Ipiyatindak ya na duꞌut esang kabanwa mu nga subrang magayen paꞌ it imu i adat.

²⁹ Ka mabantug ngaytu nga AMPUꞌANG DIYUS it bangsa ngaytu nga Israel, talagang matuud i muꞌsang pagꞌaaten ya baw ega pabaꞌgu-baꞌgu seked it kaꞌnu-kaꞌnu. Ega kanya subung it taw nga magꞌalang-alang.”

³⁰ Kaꞌampang siꞌ si Saul, maat ya, “Talagang nagkasalaꞌan aku na baytung matuud, temed asi-asi pat imu, ireg ku kayti ngaytu, begayan aku nagat maski dekeyeꞌ mana nga paggalang kat adapan it mga ginuꞌu baw kadakel it mga Israelita. Bayaꞌen mu naga aku nga muliꞌ nga sumamba it AMPUꞌANG DIYUS mu.”

³¹ Aypaꞌ inibaan naga ni Samuel si Saul ngayti nga simnamba it AMPUꞌANG DIYUS.

³² Bawnga maat ni Samuel, “Tabanen mi situt aken si Agag ngayan nga adiꞌ it mga Amalecita.” Makinday na si Agag ngayti nga madap it ki Samuel, sabap kat nakem ya, “Siguru ega naga imatayen aku.”

³³ Pagꞌabut mampang si Samuel, maat ya, “Kayti in magꞌuꞌunu mu inimatay i dakel nga pagtaw, atkayan ka naga imatayen kayti.” Unupat kiyeleng-keleng na ni Samuel si Agag ngayti duꞌun it sarungaan it papangantengan it ipagsamba duꞌut AMPUꞌANG DIYUS nga duꞌun ngaytit Gilgal.

³⁴ Pagkatiwas kayti, miyuliꞌ siꞌ si Samuel duꞌut Rama, ki Saul ngayting inuliꞌan duꞌut Gabaa.

³⁵ Gimnaring sikayti, ega na magpakikita si Samuel it ki Saul, ka nasmekan ya nagay atkayting mga kaꞌulugan. Kat AMPUꞌANG DIYUS, pagsayangen yay pagkapiliꞌ ya ngaytit ki Saul nga magꞌadiꞌ.