1 Samuel 13 - Tagbanwa

Siyabatan ni Samuel si Saul

¹ Nagtaꞌlib i pirang taꞌun nga adiꞌ na si Saul ngayti duꞌut Israel,

² tiningped yay makukulaꞌsi pang mga lalaki ka pamiliꞌan yat sundaluꞌun ya. Tulung ribuy kadakel it napiliꞌ ya. Piyabayaꞌ yat naꞌaduꞌut Micmas i duwang ribu, limnangbus sira duꞌut mamungsuꞌun nga duꞌut Betel. Iyan sang ribu, ipiyabayaꞌ yat anak ya nga si Jonatan nga naꞌaduꞌut Gabaa nga sakep it Benjamin. Iyan ega napiliꞌ ya, piyaꞌuliꞌ ya naga duꞌut kanya-kanyang balay.

³ Ta, riyumpakan baw diyaꞌeg ni Jonatan ngayti i pagkakampuwan it mga Filisteo nga duꞌut Gabaa ngayti. Nabaritaꞌ-baritaꞌ tu duꞌut kababanwaan it mga Filisteo. Ipagpamaritaꞌ-baritaꞌ na gasiꞌ ni Saul kat muꞌsang mga Israelita baw pagtaꞌwagen yay kadakel nga tumabang it pakibunuꞌ it mga Filisteo ngayti.

⁴ Pagkaꞌrut it mga Israelita it nasakep na ni Saul i sang kakampuwan nga mga Filisteo, baw naꞌrutan nira gasiꞌ nga pagꞌisgan na sirat mga iti ngayti, nagꞌurunyun na sira nga paꞌaduꞌun it ki Saul duꞌut Gilgal ka tumabang nat pakibunuꞌ.

⁵ Namagtingped na gasiꞌ i mga Filisteo ngayti nga lumaban naga sirat mga Israelita. Sarakayan ga nirat magpakibunuꞌ, tulung ribu, baw enem nga ribu i kadakel it mangangabayuꞌ. Ta magpanaw lamang nga sundaluꞌ, subung nat igis duꞌut baybayan i kadakel, ega na mabilang. Duꞌun nay piyagkampuwan nirat Micmas nga duꞌut lebatan nga ayun it Bet-aven.

⁶ Namuyaan it mga Israelita i nadulaꞌdugan nira ngayting kakuriꞌan ka masepetan na sira duꞌun kayti, aypaꞌ ka nanganya-kanya na sirat piyatataguꞌan. May nagpatataguꞌ duꞌun it kubkub, duꞌut mga bulauꞌ, duꞌut mga kali, baw duꞌun nat dadakulaꞌ nga mga batu. Duꞌun nay beken it matanip nga kadidikutan.

⁷ Iyan beken nandipag na duꞌut Jordan, naꞌaduꞌun nat Gad baw Galaad. Temed si Saul baw beken nagang sundaluꞌ ya, timnaꞌar naga sira duꞌut Gilgal. Pagsagkaꞌen na lamang it mga kaꞌibaan ngayti ni Saul i yegyeg nirat iꞌlam.

⁸ Pitung aldaw i kaꞌlay yat eꞌlat, uyun it inaat it kanya ni Samuel. Bawnga, iyan naꞌbut nay ikapitu ngayti, naꞌatrasu pay pangabut ni Samuel ngayti. Aypaꞌ ka magtekas-magtekas i mga kaꞌibaan ni Saul ngayti.

⁹ Aypaꞌ binwat ni Saul, isingkat ya nga tabanen duꞌut kanya i mga ramu-ramu nga antengen nga ipagsamba duꞌun it AMPUꞌANG DIYUS baw iyan ipagsamba gasiꞌ nga ipagꞌangut it kaꞌimbengan. Pagkapisiꞌ, inanteng ya nay mga iti ngayti.

¹⁰ Iguꞌ nga magkatiwas yay buwat ya ngayti, magꞌabut si Samuel. Siyusmu kanya ni Saul ka kiyumusta.

¹¹ Iningkut kanya ni Samuel nga magꞌaat, “Unuka binwat muy atkayan?” Katubag si Saul, maat ya, “Binwat ku na baꞌ ka mga kaꞌibaan ku, magkayaꞌmat nat tumanan it aken. Ka adeꞌdeng na situt amen i mga Filisteo, duꞌun nat Micmas. Beken it aldaw na nga upakat ta nga ibwat, tanud ku daꞌka na mabut.

¹² Ta it magregen aku nat sulungun kami nat mga Filisteo situt Gilgal ngaytu it ega paꞌ nakabwat it pagꞌantengen nga ipagsamba duꞌut AMPUꞌANG DIYUS, aypaꞌ kat panemdem ku, subuk pagregesen aku na nga buwaten i itu ngaytu.”

¹³ Maat ni Samuel it ki Saul, “Talagang dakulaꞌ nga kasalaꞌan i binwat mu ngayan ka ega imu nga buwaten yan. In siyunud mu lamang i ipiyagꞌaat ngayat imu it AMPUꞌANG DIYUS mu, kaꞌanak-anakan mu sana i magꞌadiꞌ situt Israel it seked it kaꞌnu-kaꞌnu.

¹⁴ Temed ta, sabap it binwat muy atkaytu ngaytu, ega nayan maneꞌteꞌ i pagkaꞌadiꞌ mu. May beken na nga napiliꞌ it AMPUꞌANG DIYUS nga kanya nay magꞌadiꞌ situt Israel sabap it ega mu ngaytu siyunud i mga ipiyagꞌaat ya ngaytit imu. Talagang pagsagyaan ya i napiliꞌ ya ngayti.”