1 Samuel 1 - Tagbanwa

In magꞌuꞌunu ipiyanganak si Samuel [Mga 1105 B.C.]

¹ Duꞌun it esang mamungsuꞌun nga rugar nga pagpangaranan it Ramataim-zofim nga duꞌun it Efraim, may magtataꞌid duꞌun nga esang lalaki nga pagpangaranan it ki Elcana. Amaꞌ ya si Jeroham, apuꞌ ya si Eliu nga anak ni Tohu. Nanganak it ki Tohu ngayti, si Zuf nga Efrateo.

² Duway i asawa ni Elcana ngayti, si Ana baw si Penina i mga ngaran. Magpanganak si Penina ngaytit kanya, temed ki Ana ega.

³ Kada taꞌun magpaꞌaduꞌun si Elcana it Silo ka duꞌun i papagsambaan nirat AMPUꞌANG DIYUS nga landaw nga gunaan, ka muwat it ipagsamba nga may uyut nga pagꞌantengen. Yay mga sasirduti duꞌun, duwang mga anak ni Eli nga si Ofni baw si Finees.

⁴ Iyan nagꞌimatay na kanyat ramu-ramu nga ipagsamba, may pagkaꞌnen naga. Pagbagiꞌ-bagiꞌ yan ni Elcana, pagteptepen yat pamgay si Penina baw muꞌsang mga anak ya, babay, lalaki.

⁵ Temed ki Ana ngayti, duwang dubli i kanyang magkatanggap nga bagiꞌ sabap it subrang pagmaꞌalen ni Elcana si Ana ngayti maski ega paꞌ inildawan kanyat AMPUꞌANG DIYUS nga manganak.

⁶ Ta sabap it atkayti ngayti nga ega kanya magpanganak, pirmi kanya nga pagtibabaꞌen it duway ya ngayti nga si Penina.

⁷ Atkayti nang atkayti i buwat ni Penina it duway ya ngayti it taꞌun-taꞌun, kada paꞌaduꞌun sirat balay nga papagsambaan nirat AMPUꞌANG DIYUS nga duꞌun ngaytit Silo. Talagang pagraꞌe-raꞌetan nang banar it nakem ni Ana nga ipagkasgaw ya na, ega na ipagkakaꞌen ya.

⁸ Kada yan mamuyaan ni Elcana, ingkutun ya, “Ana, unu siꞌ i magkasgawan mu? Maski kaꞌen daꞌka na magkakaꞌen. Unu bayan ka atkayan ka? Unu, ega subrang pagsagyaan muy pagmaꞌal kut imu, subraꞌ pat kasagyaan mu in nanganak kat sang puluꞌ i lalaki?”

⁹ Iyan kaꞌsa nga duꞌun siꞌ sirat Silo ngayti, pagkakaꞌen nira, timnindeg si Ana dayun it napanaw, ka manalangin kanya duꞌun it balay nga papagsambaan nira ngayti it AMPUꞌANG DIYUS. Duꞌun it salakwatan magꞌaꞌdung i sasirduti nga si Eli.

¹⁰ Atnat magkalme-kalmes si Ana ngayti nga magpanalangin duꞌun it AMPUꞌANG DIYUS.

¹¹ Maat i panalangin ya, “AMPUꞌANG DIYUS nga landaw nga gunaan, in beteꞌ sanguꞌan mu aku ngayning timawaꞌ nga uripen mu baw ildawan mu nga ega naga pabaya-bayaꞌan mu aku, ka in beteꞌ ildawan mu lamang aku it anak nga laa-lalaki, talagang ibgay ku kanya it imu mintras egen kanya baw ega ipabuꞌlug ku i buꞌuk ya.”

¹² Kaꞌlay ngaytit magpanalangin si Ana, sigi nga sesyek ni Eli.

¹³ Magkimuꞌ-kimuꞌ i baꞌbaꞌ ni Ana temed egay magkagnegan nga pagꞌampangen ya. Ka panalangin ni Ana ngayti, kat nake-nakem ya lamang. Ta, tandes tu ni Eli, maglangu.

¹⁴ Aypaꞌ inlep ya bawnga inaat, “Tamaꞌ na daꞌan yan. Muliꞌ ka na ka migaꞌ isaꞌun masmasan kat langu mu ngayan.”

¹⁵ “Tabing galang it imu, daꞌku baytu maglangu,” maat i tubag ni Ana ngayti, “ka iyan bay matuud, ega bay naꞌinum ku nga irimnun kayti. Takaꞌ magpaꞌildaw-ildaw aku baytu duꞌut AMPUꞌANG DIYUS, sabap it kabetangan ku ngaytu nga bibinsiren aku mana it beken nga yanay magkarunggukan ku it kaꞌlay ngaytu.

¹⁶ Tabing galang it imu, Agalen ku, ega naga ipabetang mu aku nga esang babay nga maraꞌway i adat. Ipagdangep kuytu duꞌun it AMPUꞌANG DIYUS i magkasusaan ku ngaytu nga kabetangan ku.”

¹⁷ Pagkaꞌrut ni Eli kayti, maat ya, “Ta in atkayan palan, pasagyaen mu nay nakem mut muliꞌ. Sana ibgay it Ampuꞌang Diyus tami nga mga Israelita i pagꞌangutun mu ngayan.”

¹⁸ Kaꞌampang si Ana, maat ya, “In maat atnakayan, agalen ku, aku manay daꞌgay tumbas in wayti na nga magmatuud i inaat mu ngayan.” Ta, masagya na si Ana ngayti. Nakakaꞌen na kanyat magayen.

¹⁹ Pagkadedelman, inadle-adlem nira nga banar i pagsamba nirat AMPUꞌANG DIYUS. Pagkatiwas nira miyuliꞌ sirang lagi duꞌut Rama. Ta pagꞌabut it ki Ana nga idar, inildawan kanya nga matuud it AMPUꞌANG DIYUS nga dumarugmatiꞌ na.

²⁰ Pagkaꞌbut it pananakit nat beteng, sumakit lalaki. Pangaranan ya, si Samuel, ka maat ya, “Ildaw tut aken nga inangut ku duꞌun it AMPUꞌANG DIYUS.”

Bilang ibinggay na ni Ana it Ampuꞌang Diyus si Samuel

²¹ Pagsaylu sit taꞌun, naꞌaduꞌun siꞌ na Elcana it Silo, ka sumamba siꞌ sirat AMPUꞌANG DIYUS. Subung nat pagbuwaten nira it taꞌun-taꞌun, magsamba sira it may pagꞌantengen nga ramu-ramu. Baw iting taꞌun, puyrat pagꞌantengen nira ngayting ipagsamba, may antengen yang ramu-ramu nga pagtuman yat esang isiyanggup ya.

²² Temed ega miyayaꞌ si Ana. “Esa-esa ga,” maat ni Ana it asawa nira ngayti nga si Elcana, “daꞌku daꞌay aken kabayaꞌ kayti. Asan manay ibayaꞌ ku in medek nay waꞌwaꞌ ngaytut duduꞌ. Ka in ega na magduduꞌ kanya, talagang ibgay ku na kanya duꞌut AMPUꞌANG DIYUS. Mintras egen kanya, duꞌun nat balay nga papagsambaan i taꞌid ya, sabap iyan i sanggup ku duꞌut AMPUꞌANG DIYUS basta begayan ya lamang akut anak.”

²³ “Ta in atkayan,” maat ni Elcana, “in unuy pagpikiren mu nga magayen, iyan i buwaten mu. Daꞌga in atkayan, mayaꞌ ka mana in medek nay waꞌwaꞌ ngaytut duduꞌ. Sana tabangen ka it AMPUꞌANG DIYUS isaꞌun matuman i isiyanggup mu ngayti duꞌut kanya.” Ta, ega na daꞌan nga matuud miyayaꞌ si Ana it dekeyeꞌ pay waꞌwaꞌ ngayti.

²⁴ Iyan daku-dakulaꞌ na si Samuel nga ega na magduduꞌ baw magkablag na, idiyuꞌlung nang matuud na Ana duꞌun it balay ngayti nga papagsambaan nga duꞌun ngaytit Silo. Timnaban sirat sangbat i tudu nga bakaꞌ nga tulung taꞌun pay idad, subrat sang tamping i arina baw sang dadanuman i irimnun.

²⁵ Iyan naꞌimatay baw nabwat nira na nga pasalamat i taban nira ngayting bakaꞌ, idiyuꞌlung nira na duꞌut sasirduti ngayti nga si Eli i waꞌwaꞌ ngayti.

²⁶ Pagꞌabut nira, maat ni Ana, “Agalen ku, in magkademdeman mu nagay tagnaꞌ ngayan baw magkakilalaan mu naga aku, aku na ngaytu i babay ngayang magtitindeg asat tepad mu nga magpanalangin duꞌun it AMPUꞌANG DIYUS.

²⁷ Iyan basaꞌan i ipagpanalangin ku duꞌun it kanya nga ildawan ya aku it anak. Ta kayti, waꞌwaꞌ na ngaytu i ipiyagꞌildaw yat aken.

²⁸ Aypaꞌ kayti, uyun kat isiyanggup ku, subuk ipagbegay ku naytu kanya duꞌun it AMPUꞌANG DIYUS nga magsirbi it kanya mintras tu egen i anak ku ngaytu.” Ta, simnamba nat AMPUꞌANG DIYUS si Samuel ngayti duꞌun.