1 Mga Adiꞌ 9 - Tagbanwa

Nagpatagaynep it ki Solomon it sumaꞌup i Ampuꞌang Diyus

¹ Iyan nakapabwat na ni Solomon i Templo ngayti nga papagsambaang balay it AMPUꞌANG DIYUS, baw sadili yang balay baw beken paꞌ nga ipagkupabwat ya,

² nagpatagaynep siꞌ it kanya i AMPUꞌANG DIYUS nga subung ngayti it duꞌun kanya it Gabaon.

³ Magpaꞌa-paꞌaat i inaat it kanya, “Kayti ibinggay ku nat imu i muꞌsa nga pagꞌangutun mu nga ipagpanalangin mu. Ipiyasiguru ku naytu nga ega basta-basta i balay ngaytu nga papagsambaan mit aken. Maneꞌteꞌ situ i ngaran ku seked it kaꞌnu-kaꞌnu. Talagang tatarimaen ku baw rarasan ku i itung balay it egay katupusan.

⁴ Baw ikaw gasiꞌ, basta maneꞌteꞌ nga kamatuudan i pagsirbi mut aken, subung naga it amaꞌ mu nga si David, baw basta buwaten mu i muꞌsa nga ipagpabwat kut imu baw sunudun mu i in unu nga urdin ku baw kaꞌirgan ku,

⁵ talagang ipasiguru ku nga seked it magtungtung-magꞌinapuꞌ maneꞌteꞌ talaga i pagkaꞌadiꞌ mi situt bangsa ngaytu nga Israel, uyun kat isiyanggup ku ngayan it amaꞌ mu nga si David.

⁶ Temed in mangindiꞌ ka it aken, u mangindiꞌ i mga anak mu, nga ega sumunud it kumpur mga urdin ku ka sumamba baw simirbi kamu na it bela-belag nga ega na aku,

⁷ siguradu nga palꞌiden ku i bangsa ngaytu nga Israel situt banwa ngaytu nga ibinggay kut kanira, baw tananan ku na i balay ngaytu nga papagsambaan it aken. Eeꞌ baꞌ, Templo ngaytu nga ipiyasiguru ku nga ega basta-basta baw inaat ku ngaytu nga maneꞌteꞌ i ngaran ku it egay katupusan. Baw ta, mga Israelita ngaytu, magbaraꞌ na nga susudi-sudiyen mana it beken nga mga bangsa.

⁸ Ipasuꞌrub na i Templo ngaytu. Ta siyu-siyu yan nga makapsag nga makalteg, makapanaꞌgey. Yanayan lamang, yan i maꞌampang nira, maat yan nira, ‘Unuka atkayan i binwat it AMPUꞌANG DIYUS it itu nga bangsa baw Templo ngaytu?’

⁹ Ta, tubagen sira nga magꞌaat, ‘Sabap it nangindiꞌ sirat AMPUꞌANG DIYUS nira nga nagpaliꞌwan it mga kagiyaringanan nira kat pagkaꞌuripen duꞌun it Egipto. Simnamba na sira baw nagsirbi na it belag nga pagsambaen nga ega na kanya, aypaꞌ ipiyabetang na sira it AMPUꞌANG DIYUS kat kakuriꞌan ngaytung atkaytu.’”