1 Mga Adiꞌ 3 - Tagbanwa

Inangut ni Solomon duꞌun it Ampuꞌang Diyus nga kumaꞌrut kanya nga banar

¹ Nagkakampiꞌ na na Solomon baw adiꞌ it Egipto iyan inasawa ya i anak it adiꞌ ngayti it Egipto. Tiyaban na ni Solomon i babay ngayti duꞌun it Siyudad ni David ngayti. Duꞌun nay piyataꞌidan ya, mintras ega paꞌ naꞌman i kanyang mabakas nga balay baw balay nga papagsambaan nira it AMPUꞌANG DIYUS, baw kutaꞌ gasiꞌ nga ipagpalibut nat Jerusalem ngayti.

² Iyan mga Israelita, pagꞌantengan nirat mga ipagsamba nira, duꞌun lamang it mga papangantengan nga binwat nira duꞌun it mga kamumungsuꞌan, sabap kat iting timpu ega pay ipiyatindeg nga Templo nga Papagsambaang Balay it AMPUꞌANG DIYUS.

³ Talagang dakulaꞌ nga pagmaꞌal ni Solomon it AMPUꞌANG DIYUS baw siyunud yang banar i mga ipiyan-gun ngayti it amaꞌ ya nga si David. Takaꞌ lamang atkayti, duꞌun nagat mga papangantengan nga duꞌut mga mungsuꞌ i pagꞌantengan yat mga ramu-ramu nga ipagsamba.

⁵ Iti nagang delem nga duꞌun paꞌ kanya it Gabaon ngayti, nagpatagaynep it kanya i AMPUꞌANG DIYUS nga magpaꞌa-paꞌaat, “Unu i ireg mu nga ibgay ku it imu nga ildaw ku? Isugid mut aken kayti.”

⁶ Katubag si Solomon, maat ya, “Inildawan mu nga banar baw siyanguꞌan it kamatuudan i amaꞌ ku nga si David sabap it naneꞌteꞌ gasiꞌ i kanyang pagsirbi it imu, masunud kanya nga banar baw mataldeng kat panleteg mu. Ta kayti ipiyasigi mu naga i ildaw mu it kanya, kayti nga piyapagꞌadiꞌ mu naga nga sumubli it kanya i sang kataawan nga anak ya.

⁷ Kayti, AMPUꞌANG DIYUS ku, piyapagꞌadiꞌ mu aku nga ganti ni Amaꞌ, temed ta, banwaen aku paꞌ baw talagang egay kakayaan ku.

⁸ Ipiyatindeg mu aku nga mamaalaꞌ kat mga taw ngaytu nga piniliꞌ mu, kat mga taw ngaytu nga ega na magkapuurat kabilang i kadakel.

⁹ Sana pagꞌangutun ku nga pabastantiyan mu aku it kasepsep isaꞌun kapagꞌadiꞌ akut magayen kat mga taawan mu ngaytu, baw isaꞌun magkakilalaan ku i mataldeng baw maraꞌe-raꞌet. Sabap siyuy makakaya it magꞌadiꞌ kat mga taw ngaytu nga piniliꞌ mu nga ereꞌeret na ngaytu nga kadakel?”

¹⁰ Ta, ikiyasagya it Ampuꞌang Diyus i pagꞌangutun ngayti ni Solomon.

¹¹ Aypaꞌ ka maat i tubag it kanya it Ampuꞌang Diyus, “Ta it atkayan nga ega yay inangut mu, paꞌlayen ka situt banwa, u begayan it kamanggadan, u pandaꞌeg mut mga kalaban mu, in daꞌga iyan i inangut mu, pagkamasepsep baw kakayaan nga mangukuman,

¹² kayti ibgay kuytut imu i pagꞌangutun mu ngaytu. Begayan ku ikaw it talagang ega basta-bastang kasepsep nga maski mga taw paꞌ ngayti it tagnaꞌ u mga taw paꞌ nga sumunud it imu, egay makasbung.

¹³ Baw begayan ku naga ikaw it iyan mga bagay nga ega inangut mu nga subung it kamanggadan baw kabantugan nga ega gasiꞌ masbungan it maski siyu pang adiꞌ nga kadengan mu.

¹⁴ Basta mangaꞌgenan ka ga it uyun kat kaꞌirgan ku, baw sunudun mu gat magayen i mga urdin ku baw in unu-unu nga mga taꞌeg ku, nga subung naga it pagsunud it amaꞌ mu nga si David, talagang ildawan ku naga ikaw nga paꞌlayen ka naga situt banwa.”

¹⁵ Sikayti nasulag na si Solomon. Pagkasulag ya, natantuwan ya nga piyakisugi-sugidan kanya it Ampuꞌang Diyus duꞌun it tiyagaynep ya ngayti. Pagkaꞌuliꞌ ya duꞌun it Jerusalem, naꞌaduꞌun kanya it sarungaan it Kaban ngaytit Pakiꞌupakat ka nagbuwat kanya it ipagsamba nga pagꞌantengen baw pasalamat nga pagsamba nga may pagꞌantengen gasiꞌ. Bawnga nagpasimpan kanya it dakulaꞌ nga pagkaraꞌnen ka piyasagya ya i muꞌsang mga taawan ya.

Mataldeng nga pangukuman ni Solomon

¹⁶ Ega naꞌlay may naꞌaduꞌun it adiꞌ ngayti nga si Solomon nga duwang kababayan nga panulus niray bilug nira.

¹⁷ Pagꞌabut nira maat it sang kataawan, “Agalen ku, aku baw itu nga babay, sang kabala-balayan kami lamang. Kayti nanganak aku it aken, lalaki i anak ku.

¹⁸ Pagꞌikatlung aldaw nanganak gasiꞌ it kanya, nagsubung kami na nga may anak. Yanayti, duwa-duwa kami lamang duꞌut iti nga balay, egay iꞌiba namen nga maski siyu.

¹⁹ Iyan kaꞌsang delem natay i anak it itu nga babay ka siguru napuꞌut.

²⁰ Ta kayti, binwat ya it ararem paꞌ ngayay delem, pagbangu-bangun ya, pinsiꞌ yay aken ngaytung anak bawnga igiyanti ya i kanya ngaytung anak nga patay na duꞌun it ulid ku.

²¹ Pagbangun kut nangyag na, maat paduduꞌun kuy anak ku ngaytu, mamuyaan ku, unu pay paduduꞌun it palan miyatay mana. Pagꞌimuyaꞌ kut magayen, maꞌanuꞌan ku ega anak kuyti i itiꞌen.”

²² Kaꞌampang i sang kataawan ngayting babay, maat ya, “Bilaꞌ, ambut mu! Ega yan matuud i pagꞌaaten mu ngayan. Aken baytung anak i egenen ngaytu. Iyan miyatay ngayti, iyan i imu.” “Bilaꞌ ega,” maat i uꞌna ngayting miyampang, “miyatay ngayti i imung anak. Aken yan i egenen ngayan.” Iti nang iti i pagdadaꞌgan nirang duwa duꞌut adapan it adiꞌ ngayti.

²³ Mampang si Solomon, maat ya it sang kataawan ngayti, “Kayti maat mu, iyan egen ngaytu nga waꞌwaꞌ, anak mu. Iyan miyatay na ngayti, iyan i kat iba mu ngaytu. Ta imu gasiꞌ ngaytu, maat mu, talagang imu i egen ngaytung waꞌwaꞌ. Iti, miyatay ngayti, i kanya. Ta kayti, ari matuud?”

²⁴ Ta, egay beken, singkat ni Solomon i sang kataawan nga taawan ya. Maat ya, “Pisiꞌan mu aku it karis.” Namisiꞌ i tiyaꞌeg ngayti baw tiyaban ya duꞌut ki Solomon.

²⁵ “Kayti,” maat i adiꞌ ngayti, “begsangen i waꞌwaꞌ ngaytu nga egenen ka managasang begsang kamu nga duwa.”

²⁶ Pagkagneg it matuud ngayti nga tagꞌanak, kimneber-keber i seled ya. Magsusgaw kanya nga miyampang, maat ya, “Kagalang-galang nga Adiꞌ, in atkayan na lamang, kanya na i begayan mut waꞌwaꞌ ngayan. Ega lamang it begsangen ngayan.” “Ega,” maat i sang kataawan ngayti, “sigi, begsangen na lamang.”

²⁷ Iyan atkayti na, mampang siꞌ si Solomon ngayti. “Ta in atkayan, ega na begsangen i waꞌwaꞌ ngayan ka ibgay asat uꞌna ngayang miyampang nga babay, ka iyan nga matuud i inaꞌ it waꞌwaꞌ ngayan.”

²⁸ Nabaritaꞌan it muꞌsang mga Israelita i ibiyetangan ngaytit adiꞌ nira nga ukuman. Egay beken, paggalangen nira kanya it kamatuudan, ka natantuwan nira nga binggayan kanyat Ampuꞌang Diyus it ega basta-bastang kasepsep kat pangukuman nga kataldengan.