1 Mga Adiꞌ 22 - Tagbanwa

Pagpatay ni Acab

¹ Ta, tulung taꞌun ega nagrurumpak i Israel baw Syria.

² Pagꞌikatlu na ngayting taꞌun, namasyar duꞌun it adiꞌ it Israel si Josafat ngayti nga adiꞌ it Juda.

³ Nasugid na nga lagi ni Acab ngayti nga adiꞌ it Israel duꞌun it mga taawan ya, “Magkaꞌrutan mi nga, iyan lansangan it Ramot-galaad nga naꞌagaw it adiꞌ it Siria, aten yan. Unuka egay pagbuwaten tami isaꞌun mabaiꞌ tami duꞌun it kanya?”

⁴ Bawnga inaat ya si Josafat ngayti nga magpasyar duꞌun it kanya, “Unuytu, magkapakay mu nga sang tamiyan nay manrumpak duꞌun it Ramot-galaad?” Katubag si Josafat, “Sigi, bayaꞌen ta ikaw. Uyut ku i mga sundaluꞌ ku, pati mga kabayuꞌ namen.”

²⁹ Ta it atkayti, riyumpak nat adiꞌ ngayti it Israel baw adiꞌ ngayti it Juda i Ramot-galaad.

³⁴ Temed subuk siyugid nga narampat it ipiyanaꞌ it sundaluꞌ ngaytit Siria i adiꞌ ngayti nga si Acab, nangindelangan i tarep panaꞌ it piyagkabitan it kanukal. “Edey! Naꞌiguꞌ aku na!” maat ni Acab it manigpapanaw it sarakayan yat magpakibunuꞌ. “Sigi, baringen mu na i pagsakayan ta ngaytu. Ipaꞌalaid mu na aku situt pagbunuꞌan ngaytu.”

³⁵ Masaki-sakit talaga nga pagbunuꞌ. Duꞌun lamang si Acab, magtataꞌgen mana duꞌun it pagsakayan ya ngayti, nga magsasarunga naga duꞌun it mga taga Siria ngayti. Duguꞌ na nga muꞌsa i duꞌut daꞌtag it sarakayan ya ngayti, ka sigi nga burwak it duguꞌ nga garing duꞌut bungad ya. Pagdelem, natay na kanya.

³⁶ Iyan adeꞌdeng semdep nay aldaw inurdinan nay kadakel ngaytit mga sundaluꞌ nga Israelita nga muliꞌ nay kada esa kat kanya-kanyang rugar nga pagtataꞌidan.

³⁷ Atkayti ikiyagtas it ginawa it adiꞌ ngayti it Israel nga si Acab. Tiyaban naga nira duꞌun it Samaria, ka duꞌun naga i limbengan.

³⁸ Iyan pagꞌugasan nay sarakayan ya ngaytit magpakibunuꞌ, baw kanukal ya, pagtilaꞌan nat mga keꞌdeng i duguꞌ ya, subung nagat inaat it AMPUꞌANG DIYUS.

Pagꞌadiꞌ ni Ocozias duꞌun it Israel [Mga 870 B.C.]

⁴⁰ Pagpatay ni Acab, si Ocozias nga anak ya naga i simnubli it pagkaꞌadiꞌ ya.

⁴¹ Iyan ikaꞌpat na nga taꞌun i pagꞌadiꞌ ni Acab duꞌun it Israel, nagpapuꞌun si Josafat it magꞌadiꞌ duꞌun it Juda.

⁴³ Kat pagꞌadiꞌ ya, ega piyasyangan ya i magayeng adat it amaꞌ ya ngayti nga si Asa. Giyuru ya talaga baw piyaꞌresan ya i kumpur magayen kat panleteg it AMPUꞌANG DIYUS. Lamang, ega naga ipiyaꞌawaꞌ ya i mga papagsambaan duꞌun it kamumungsuꞌan. Sigi paꞌ nga duꞌun it mga mungsuꞌ ngayti i pagꞌantengan it mga taw it kamangyan baw mga ipagsamba nira.

⁴⁶ Temed iyan naꞌped nga mga lalaki nga manigpagamit it bilug nira kat siyu-siyu nga magsamba nga duꞌun it Juda ngayti, nga ega piyangimugaw it amaꞌ ya, piyangimugaw ya na.

Pagpatay ni Josafat baw pagꞌadiꞌ ni Joram duꞌun it Juda [Mga 864 seked it 858 B.C.]

⁵⁰ Pagpatay it adiꞌ ngayti duꞌut Juda nga si Josafat, ilimbeng kanya duꞌun it limbengan nagat mga kagiyaringanan ya, nga duꞌun it pagkukutaꞌen ngayti nga pagpangaranan it Siyudad ni David. Simnubli it pagkaꞌadiꞌ ya, anak ya nga si Joram.

⁵² Temed karaꞌe-raꞌetan kat panleteg it AMPUꞌANG DIYUS i siyarit buwat ni Ocozias ngayti. Sabap ega naga piyasyangan ya i maraꞌe-raꞌet nga buwat it inaꞌ baw amaꞌ ya, baw buwat gasiꞌ ni Jeroboam nga anak ni Nabat, nga iti nay ipiyagkasalaꞌan it mga Israelita.

⁵³ Nagsirbi baw simnamba si Ocozias it ki Baal. Talagang piyaꞌiseg ya nga banar i AMPUꞌANG DIYUS it bangsa nira nga Israel, nga subung naga it binwat it amaꞌ ya it tagnaꞌ ngayti.