1 Mga Adiꞌ 19 - Tagbanwa

Duꞌut Bukid it Horeb i piyalagyuwan ni Elias

¹ Pagꞌabut ni Acab, pagtuturan duꞌut asawa ya nga si Jezebel. Pagkagneg ni Jezebel it binwat ngayti ni Elias nga imbus ya nat mimatay i mga prupitaꞌ ni Baal, kulput na kanyat pangise-iseg.

² May piyapanaw yang lagi nga paꞌaduꞌun it ki Elias, tinggunan ya nga aaten, “Ipagsumpa ku, mapakay nga subraꞌ paꞌ it kubwaten kut imu i buwaten it aken it mga diyus ku in seked dedelem nga atkaytuy uras ega paꞌ naꞌimatay ku ikaw. Ipatibayaꞌ ku naga ikaw it mga prupitaꞌ ngayti nga piyangimatay mu.”

³ Pagkaꞌrut ni Elias it iti ngayti, masyaduy iꞌlam ya. Liminꞌid kanyang lagi. Naꞌaduꞌun kanyat Beer-seba nga sakep it Juda. Iyan duꞌun na sira, itiyuduꞌ ya na duꞌun i taraꞌgen ya ngayti.

⁴ Bawnga naꞌaduꞌun kanya it rugar nga kapupuyangtan it esa-esa ya mana. Iyan sang aldaw nay piyanawan ya, pagꞌapun miyadung kanya duꞌun it siꞌrung it esang kayu bawnga nanalangin nga magꞌaat, “AMPUꞌANG DIYUS, pisiꞌen mu na aku kayti, sabap dakulaꞌ nang matuud nga kakuriꞌan ku. Ireg ku nayni nga matay aku, ka ega nay kapulusan ku nga taw.”

⁵ Pagkatupus ya, nagpabuntul na kanya langkuy it nakaꞌigaꞌ duꞌun it siꞌrung it kayu ngayti. Sakaling may miyabut nga esang anghil. Giniꞌleng ya si Elias bawnga inaat ya, “Masulag ka, ka kumaꞌen ka.”

⁶ Pagmukrat ya pagpanigmata, naltegan ya duꞌut ayun it uluwan ya i sang batu nga tinapay nga ikiyalutuꞌ ya init it batu, baw may danum gasiꞌ nga duꞌut dadanuman. Nagbangun kanya ka kimnaꞌen. Pagkaꞌinum ya minigaꞌ siꞌ.

⁷ Temed nagpaꞌuliꞌ nagay anghil ngayti nga tiyaꞌeg it AMPUꞌANG DIYUS. Giniꞌleng ya siꞌ si Elias bawnga inaat ya siꞌ, “Bangun, ka kumaꞌen ka naga ka ega kaya muy panaw mu ngaytu.”

⁸ Nagbangun siꞌ si Elias ka kimnaꞌen siꞌ. Pagkaꞌinum ya, kiminseg i ginawa ya. Sabap it pangaꞌen ngayti, ega ginteman kanya lamang naꞌlay nga luꞌug-luꞌug ya, ka kaꞌlay, epat nga pulung aldaw baw delem. Nakaꞌbut na kanya duꞌut Horeb nga pagpangaranan it Bukid it Ampuꞌang Diyus.

⁹ Pagꞌabut, siminled kanya duꞌun it kubkub, nga duꞌun nay piyaꞌaldawan ya. Sakaling nagnegan yay ampang it AMPUꞌANG DIYUS, nga magꞌaat, “Unuka situ ka, Elias?”

¹⁰ Katubag si Elias, maat ya, “Talagang piyanindegan ku nga banar ikaw nga AMPUꞌANG DIYUS nga landaw nga gunaan. Sabap talagang riyanggaꞌ nat mga Israelita i pakiꞌupakat mu it kanira. Siyari nira nat panranggaꞌ i mga papangantengan it ipagsamba it imu. Siyari na gasiꞌ nirat pangimatay it tarep basiꞌ i mga prupitaꞌ mu. Ta aku mana ngaytuy naꞌped nga mapiyamayaꞌ it imu, temed sigi nagang tiꞌes nirat aken isaꞌun maꞌimatay aku gasiꞌ.”

¹¹ Maat i tubag it AMPUꞌANG DIYUS it inampang ngayti ni Elias, “Manliꞌwan ka na, ka timindeg ka kat adapan ku duꞌun it bukid ngaytu.” Pagkaꞌampang ya kayti, nanarimbay nay AMPUꞌANG DIYUS. Uꞌnang miyabut, eyep it deres nga ereꞌeret nang sebeg. Napunggar i bukid ngayti baw namagkarmek i mga batu, temed ega pay duꞌut deres ngayti nga AMPUꞌANG DIYUS. Sumubli siꞌ, yimnegyeg i lugtaꞌ, temed ega pay AMPUꞌANG DIYUS duꞌun.

¹² Pagpedek it yegyeg ngayti, may siminggu nga apuy, temed ega pay AMPUꞌANG DIYUS duꞌut apuy ngayti. Pagpugdaw it apuy ngayti, subuk kudedngegen si Elias it ampang kat malubay lamang nga agusꞌus.

¹³ Ta it atkayti, tiyagnepan ni Elias i rupa ya it gulamen ya. Nanliꞌwan kanya seked duꞌun lamang it balaꞌbaꞌan it kubkub ngayti. Nagnegan yay ampang nga magꞌaat, “Elias, unuka situ ka?”

¹⁴ Katubag kanya, maat ya, “Talagang piyanindegan ku nga banar ikaw nga AMPUꞌANG DIYUS nga landaw nga gunaan. Sabap talagang riyanggaꞌ nat mga Israelita i pakiꞌupakat mut kanira. Siyari nira nat panranggaꞌ i mga papangantengan it ipagsamba it imu. Siyari nat pangimatay it tarep basiꞌ i mga prupitaꞌ mu. Ta aku mana ngaytuy naꞌped, temed sigi nagang tiꞌes nirat aken isaꞌun maꞌimatay aku naga gasiꞌ.”

¹⁵ Maat it kanya it AMPUꞌANG DIYUS, “Paꞌuliꞌ ka naga duꞌun it dalan nga piyanawan mu. Paꞌaduꞌun it rugar nga kapupuyangtan nga adeꞌdeng it Damasco. Pagꞌabut mu duꞌut siyudad ya, paturuꞌan mut lana i ulu ni Jazael ka kanyay sumubli nga magꞌadiꞌ it Siria.

¹⁶ Paturuꞌan mu gasiꞌ si Jehu nga anak ni Namsi ka kanyay sumubli nga magꞌadiꞌ it Israel. Paturuꞌan mu gasit lana si Eliseo nga anak ni Safat nga taga Abel-mehola ka magprupitaꞌ kanya nga gumantit imu.

¹⁷ Ka iyan makaribri kat tarep basiꞌ ni Jazael, si Jehu i kaꞌimatay. Ta yan gasiꞌ nga makaribrit ki Jehu, maꞌimatay ni Eliseo.

¹⁸ Itu gasiꞌ i ireg ku nga maꞌrutan mu kayti. Pitung ribu naga i kadakel it mga Israelita nga ipiyapinpin ku nga matuud naga nga mga taawan ku. Sira ngaytu, ega magpanluud nga magsamba it ki Baal.”

Pagpasiguru it ki Eliseo nga magprupitaꞌ

¹⁹ Egay beken, napanaw na si Elias ngayti. Naparagan ya si Eliseo nga magꞌaradu. Sang puluꞌ may duwa sirang muꞌsa, kada sang kataawan tagduduway bakaꞌ nga magguyud it aradu. Si Eliseo nay maggiyaringan. Pagtaꞌlib ni Elias duꞌut ki Eliseo ngayti, ipiyasagmen ya nat ki Eliseo i gulamen ya, nga katandaꞌ it ipasubli it kanya i pagkaprupitaꞌ.

²⁰ Iti nga lagi, tiyananan na ni Eliseo i mga ipagꞌaradu ya ngayti baw miyusig it ki Elias ngayti, ka maat ya, “Mamꞌun aku daꞌan duꞌun it mga giyaringan ku. Pagkapamꞌun ku, ta mayaꞌ aku nayat imu.” “Eeꞌ,” maat ni Elias ngayti, “mamꞌun ka na daꞌan duꞌun. Daꞌku naga magpanreges it imu.”

²¹ Ta, miyuliꞌ daꞌan nga matuud si Eliseo ngayti. Nagꞌimatay kanya it duway tudu, yanayti, duwa ngayting gamit yat kanya, bawnga inilutuꞌ ya. Yanay giyamit yang isiyundur, singkaw baw aradu ya na ngayti. Nagpakaraꞌnen kanyat mga maꞌiba ya duꞌun bawnga nanundug nat ki Elias ngayti, ka katabang ya na.