1 Mga Adiꞌ 17 - Tagbanwa

Natuman i isiyugid ni Elias nga lumakag it tulung taꞌun i kaꞌlay

¹ Ta it atkayti, miyabut duꞌut ki Acab ngayti si Elias nga prupitaꞌ. Taga Tisbe kanya nga duꞌut Galaad. Pagꞌabut, maat ya, “Talagang pagdedngegen tami it AMPUꞌANG DIYUS it Israel nga pagsirbiyan ku. Yay matuud, kat mga taꞌun ngaytu nga magdadarapaꞌ, maski dikdik, ega dimikdik. Eeꞌ baꞌ, panugpuꞌ bang masked, ega manugpuꞌ seked it luwasen ku siꞌ i itu nga inampang ku.”

² Gimnaring duꞌun kayti inaat it AMPUꞌANG DIYUS si Elias ngayti,

³ “Limꞌid ka na situ. Patataguꞌ ka duꞌun it sapaꞌ it Carit nga duꞌun it lebatang ayun it danum it Jordan.

⁴ Asan nay pagꞌimnan mu it sapaꞌ ngayan baw may singkat ku nayang mga ugak nga manigduꞌlung it pangaꞌen mu.”

⁵ Egay beken, siyunud ni Elias i inaat ngaytit kanya. Napanaw na kanya nga naꞌaduꞌun nat sapaꞌ ngaytit Carit nga duꞌun ngaytit lebatang ayun it Jordan.

⁶ Mapun-meyag mabut i mga ugak nga magpanduꞌlung it pagkaꞌnen ya nga tinapay baw karniꞌ. Duꞌun nat sapaꞌ ngayti i pagꞌimnan ya.

⁷ Temed miyabut i aldaw nga napra na gasiꞌ i sapaꞌ ngayti ka yanayti, daꞌna magꞌura-uran.

⁸ Bawnga inaat siꞌ kanya it AMPUꞌANG DIYUS,

⁹ “Limꞌid ka siꞌ situ, paꞌaduꞌun ka it lansangan it Sarepta nga duꞌut rugar it Sidon. May singkat ku duꞌun nga esang balu nga yay sumuwituꞌ it imu it pangaꞌen.”

¹⁰ Aypaꞌ egay beken, naꞌaduꞌun siꞌ si Elias it Sarepta. Pagꞌabut ya duꞌun tama-tamang magseled kanya duꞌun it puwirtaꞌan it lansangan ngayti, naltegan ya nay balu ngayti nga magpanguꞌmit-kuꞌmit it isundur. Kaꞌampang si Elias, “Unu may danum mi? Paꞌimnun aku.”

¹¹ Desang maat mapanaw na kanya nga mamisit danum, maat siꞌ ni Elias, “In mapakay begayan mu gasiꞌ aku it maski dekeyeng pangaꞌen nga makaꞌen ku.”

¹² Katubag i babay ngayti, maat ya, “Yay matuud, nga pagdedngegen aku it AMPUꞌANG DIYUS mu, ega na talagay papangaꞌen namen, rumꞌar manat sang dekeyeꞌ mana nga ari-arina baw sang lulnuꞌan manang lana-lana. Yanaytuytu i pagꞌargan kut sundur ngaytu, isaꞌun maꞌilutuꞌ ku na, ka maski puyangten kami na it ana-anak ku, makakaꞌen kami naga it maski kaꞌsa manang kaꞌen.”

¹³ Mampang siꞌ si Elias ngayti, maat ya, “Ayaw kat palibeg it pikir mu. Muliꞌ ka na ka buwaten mu nay paꞌaaten mu ngayan. Temed uꞌnaen mu daꞌan it milutuꞌ i makaꞌen ku nga maski sang dekeyeꞌ lamang nga tina-tinapay. Isunud mu mana nga ilutuꞌun i imyung kaꞌnen.

¹⁴ Sabap ituy ipagꞌaat it AMPUꞌANG DIYUS it bangsa namen nga Israel, ‘Talagang ega maꞌubus mi i arina ngayan asat pagbebtangan ya baw ega gasiꞌ maꞌubu-ubus i lana ngayan asat tapayan nga pagbebtangan ya seked it ega paꞌ naꞌbut i aldaw nga paꞌuranen siꞌ it AMPUꞌANG DIYUS i banwa.’”

¹⁵ Pagkagneg it balu ngayti, siyunud yay inaat ngayti ni Elias. Ta yay matuud, aldaw-aldaw sang siraan nay magkaraꞌnen, atnakaytit seked naꞌlay.

¹⁶ Talagang ega nga matuud naꞌubu-ubus i arina ngayti duꞌut pagbebtangan ya. Atnagay lana ngayti, ega gasiꞌ magkaꞌubu-ubus, subung nat isiyanggup ngayti it AMPUꞌANG DIYUS nga isiyugid ngayti ni Elias.

¹⁷ Temed ta, miyabut nga simnarut i anak it balu ngayti, maꞌget nga sarut nga ipiyatay ya na.

¹⁸ Kaꞌampang i babay ngayti, maat yat ki Elias, “Unu nay naꞌisgan mut aken, manigsirbi it Ampuꞌang Diyus? Siguru yay inasitu mu, isaꞌun nga irapar mut aken i mga kasalaꞌan ku baw isaꞌun matay i anak ku ngaytu.”

¹⁹ Mampang si Elias ngayti, “Daliꞌ,” maat ya, “isini mut aken i waꞌwaꞌ ngayan.” Tiyaban ni Elias duꞌut pagꞌigaꞌan yang seled nga duꞌut dibwat bawnga ipiyaliꞌtid yay waꞌwaꞌ ngayti duꞌun it irigaꞌan nga pagꞌigaꞌan ya.

²⁰ Bawnga nagpasanguꞌ-sanguꞌ kanya, nga magꞌaat, “AMPUꞌANG DIYUS ku, unu bayni, atkayni ngayning nabetangan, iyan nay tumbas mu it babay ngayni nga nagpataꞌid it aken?”

²¹ Katlu pataruban ya it bilug ya i waꞌwaꞌ ngayti baw siging panalangin ya nga magꞌaat, “AMPUꞌANG DIYUS ku, talagang pagꞌangutun kung banar asat imu nga ipaꞌuliꞌnan muy ginawa it waꞌwaꞌ ngayni.”

²² Ta, panalangin ni Elias ngayti, siyambungan talaga it AMPUꞌANG DIYUS. Nagꞌegnan nagay waꞌwaꞌ ngayti.

²³ Bawnga tiyaban ya na duꞌun it salu. Maat yat balu ngayti, “Wayni nay anak mu, nagꞌegnan naga kanya.”

²⁴ Yamanay nakatubag it babay ngayti, maat ya, “Kayti ku natantuwan nga talagang manigsirbi kang matuud it Ampuꞌang Diyus. Purus talaga kamatuudan i ipagsugid mu nga ampang it AMPUꞌANG DIYUS.”