1 Mga Adiꞌ 16 - Tagbanwa

¹ Ta it atkayti, ituy ukuman it AMPUꞌANG DIYUS it ki Baasa nga ipiyaꞌampang ya it esang prupitaꞌ nga si Jehu, nga anak ni Hanani.

² Maat ya, “Esa ka nga timawaꞌ nga taw, temed ipiyatindeg ku ikaw nga mamaalaꞌ it bangsa ngaytu nga Israel nga piniliꞌ ku nga mga taawan ku. Temed iyan nagay giyuru mu, karaꞌe-raꞌetan ni Jeroboam. Ipiyakursud mu nga magkasalaꞌan i mga taawan ku ngaytu, nga yanay ikiyaꞌangut it iseg ku.

³ Aypaꞌ kayti, puuꞌun ku gasiꞌ ikaw, pati mga kaꞌanakan mu, nga subung naga it binwat ku it ki Jeroboam.

⁴ Kayti, in siyu-siyu it mga kaꞌanakan mu i duꞌut lansangan i patayan ya, agden talaga it keꞌdeng. In duꞌun it uma i patayan ya, mga tarwangin i maged.”

⁶ Pagpatay ni Baasa ngayti, duꞌut Tirsa i limbengan it kanya. Simnubli it kanya, anak ya nga si Ela.

⁹ Temed kiyuntraꞌ si Ela ni Zimri, nga esa nga mataꞌas kat mga sundaluꞌ ya, nga magpamaalaꞌ it sang lubuk nga mga sundaluꞌ nga maggamit it sarakayan it magpakibunuꞌ. Kaꞌsa nga maglangu si Ela duꞌun it balay ni Arsa nga manigpamaalaꞌ it balay ya duꞌun it Tirsa,

¹⁰ siminled si Zimri ngayti ka inimatay ya. Ikaduwang puluꞌ baw pitu na nga taꞌun i pagꞌadiꞌ ni Asa duꞌun it Juda, iyan inagaw na ngayti ni Zimri duꞌun it ki Ela i pagkaꞌadiꞌ duꞌun it Israel.

¹¹ Iyan naꞌagaw na ngayti ni Zimri i pagkaꞌadiꞌ, imbus yat mimatay i mga kaꞌanakan ni Baasa. Talagang egay ipiyaꞌped ya nga lalaki, inimatay ya nga muꞌsa. Pati mga iba-iba nira, riyagarap ya nga tanan.

¹² Kat binwat ya ngayti nga piyuuꞌ ya i muꞌsang kaꞌanakan ni Baasa, natuman i inampang ngayti it AMPUꞌANG DIYUS nga ipiyaꞌampang ya it prupitaꞌ ngayti nga si Jehu.

¹³ Talagang ereꞌeret i iseg it AMPUꞌANG DIYUS it kana Baasa, duwa ni Ela, sabap it mga kasalaꞌan nira ngayti nga namagsamba sira it mga pagbete-beteꞌen nga diyus baw sabap it narayak nira i mga sinakepan nira nga mga Israelita nga sumamba gasiꞌ it mga iti ngayti nga egay kakapulusan.

^15b Ta, ega naga naꞌlay i pagꞌadiꞌ ni Zimri, pitung aldaw lamang. Ka iyan duꞌun nat Gibeton i mga Israelita nga sundaluꞌ, ka magpanrumpak it mga Filisteo,

¹⁶ nabaritaꞌan nira i binwat ngayti ni Zimri nga inimatay yay adiꞌ ka inagaw ya i pagkaꞌadiꞌ. Aypaꞌ nagꞌupa-upakaten sira nga yanay ipaꞌdung nira nga adiꞌ, pagbayaꞌen nira nga si Omri, nga kanyay piyakapagbayaꞌen it mga sundaluꞌ.

¹⁷ Bawnga liminꞌid sira duꞌun it Gibeton, ka kiyulung nira i lansangan ngaytit Tirsa ngayti nga pagtataꞌidan ni Zimri.

¹⁸ Iyan namuyaan ni Zimri nga daꞌgen kanya, binwat ya, nangli na duꞌun it pagkukutaꞌen nga bagiꞌ it pamalay-balay nagat adiꞌ bawnga nagꞌapuy. Aypaꞌ uyut kanya it balay ngayti nga naꞌanteng.

¹⁹ Napaliꞌ yay itiꞌen sabap it mga kasalaꞌan ya kat panleteg it AMPUꞌANG DIYUS, nga giyuru ya i karaꞌe-raꞌetan ni Jeroboam, nga iti nay ipiyagkasalaꞌan it mga Israelita.

²¹ Pagpatay ni Zimri ngayti, nagraꞌe-raꞌeten i mga taw. Sabap sang lubuk, yay naꞌirgan nira nga ipaꞌdung kat pagkaꞌadiꞌ, si Tibni nga anak ni Ginat. Sang lubuk, si Omri na ngayti i kanirang ireg.

²² Temed, iyan naꞌlay na, nandaꞌeg naga i mga magꞌireg ngaytit ki Omri, ka nagtas i ginawa ni Tibni. Aypaꞌ nagꞌadiꞌ na si Omri ngayti.

²³ Nagꞌadiꞌ si Omri duꞌun it Israel it tulung puluꞌ na baw esa nga taꞌun i pagꞌadiꞌ ni Asa duꞌun it Juda. Sang puluꞌ baw duwang taꞌun i kaꞌlay it pagꞌadiꞌ ni Omri. Seledan it enem nga taꞌun, duꞌut Tirsa i tiyaꞌidan ya.

²⁴ Bawnga inalang ya duꞌut ki Semer i esa nga mungsuꞌ nga magrega it dakulang kantidad. Pagkaꞌalang ya, binwat ya na nga siyudad. Piyangaranan ya it Samaria, nga pinsiꞌ ya duꞌun it ngaran it inalangan yat mungsuꞌ ngayti nga si Semer.

²⁵ Temed, pagꞌadiꞌ ni Omri ngayti, maraꞌe-raꞌet kat panleteg it AMPUꞌANG DIYUS. Talagang karaꞌe-raꞌetan nga binwat ya, subraꞌ pat karaꞌe-raꞌetan it muꞌsa ngayti nga nakauꞌnat kanya it nagꞌadiꞌ.

²⁶ Sabap giyuru ya talaga i mga kasalaꞌan ni Jeroboam ngayti nga anak ni Nabat, nga ipiyagkasalaꞌan it bangsa nira nga Israel. Ka piyasamba sira it pagbete-beteꞌen nga diyus nga egay kakapulusan, nga yay ikiyaꞌangut it iseg it AMPUꞌANG DIYUS it bangsa nira nga Israel.

²⁸ Pagpatay ni Omri ngayti, duꞌun nat Samaria ngayti i limbengan it kanya. Gimnanti it kanya nga nagꞌadiꞌ, anak ya naga nga si Acab.

²⁹ Nagpapuꞌun it magꞌadiꞌ duꞌun it Israel si Acab nga anak ni Omri, iyan ikatulung puluꞌ may walu nang taꞌun i pagꞌadiꞌ ni Asa duꞌun it Juda. Duꞌut Samaria i tiyaꞌidan ni Acab ngayti. Duwang puluꞌ may duwa nga taꞌun i kaꞌlay it pagꞌadiꞌ ya.

³⁰ Talagang subraꞌ paꞌ it karaꞌe-raꞌetan it muꞌsang nakauꞌnat kanya i karaꞌe-raꞌetan nga siyarit buwat ni Acab ngayti kat panleteg it AMPUꞌANG DIYUS.

³¹ Ega paꞌ piyakugayen ya i karaꞌe-raꞌetan ngayti nga binwat ni Jeroboam ngayti nga anak ni Nabat, diyunga-dungagan ya paꞌ, ka inasawa ya paꞌ si Jezebel nga anak ni Et-baal nga adiꞌ it Sidon. Ta garing sikayti nagsirbi na kanya baw simnamba na it ki Baal.

³² Binwat ya, nagpatindeg it papagsambaan it ki Baal duꞌun it Samaria ngayti. Duꞌut balay ngayti, nagpabwat kanya it papangantengan.

³³ Nagpatindeg paꞌ kanya it piyakaꞌarigi nga ladawan ni Ashera nga pagsambaen gasiꞌ. Ta unupat kasalaꞌan ngayti nga siyari yat buwat, talagang subra-subraꞌ paꞌ it binwat gasiꞌ it muꞌsa ngayti nga nakauꞌnat kanya it nagꞌadiꞌ duꞌun it Israel.