1 Mga Adiꞌ 14 - Tagbanwa

¹ Kat iti nga timpu simnarut si Abias nga anak ni Jeroboam ngayti.

² Aypaꞌ ka inaat ni Jeroboam i asawa ya, “Kayti, buwaten mu, pabaluy-baluy ka isaꞌun daꞌka makilalaan nga asawa ku, ka paꞌaduꞌun ka it Silo. Paꞌaduꞌun ka it ki Ahias ngayan nga prupitaꞌ nga miyaat it aken nga magꞌadiꞌ aku kat itu nga mga taw.

³ Tumaban ka it sang puluꞌ nga katinapayan, pirang batuy biskuwit, baw sang garapun i deges. Maꞌrutan ta yan i mabetangan it waꞌwaꞌ ngaytu ka isugid yat imu.”

⁴ Atkayti nga matuud i binwat it asawa ya ngayti. Naꞌaduꞌun kanya it Silo, diritsu duꞌun it balay ni Ahias. Talagang gurang na nga gurang si Ahias ngayti, beleg na.

⁵ Isiyugid nga lagi it kanya it AMPUꞌANG DIYUS nga mabut duꞌun it balay ya i asawa ni Jeroboam nga magbete-beteꞌ nga belag kanya nga babay, ka mangingkut it mabetangan it anak nira nga magsarut. Ega lamang desang isiyugid it AMPUꞌANG DIYUS, ipiyagꞌaat ya paꞌ it ki Ahias i ampangen ya.

⁶ Aypaꞌ ka, iyan nabatiꞌan ni Ahias nga magdarapaꞌ nat salakwatan i asawa ngaytit adiꞌ, maat ya, “Langbus sinit seled, kagalang-galang nga asawa it adiꞌ. Unuka magbete-beteꞌ ka nga belag ka nga taw? Seled na ka isaꞌun magnegan mu i kasesmekan nga ibaritaꞌ kut imu.

⁷ Pagkaꞌuliꞌ mu duꞌun it asawa mu, itu nay isugid mu nga inampang it AMPUꞌANG DIYUS, kanya nga miniliꞌ it bangsa ngaytu nga Israel nga taawan ya. Aaten mu, ‘Piniliꞌ ku ikaw kat kadaklan isaꞌun mamaalaꞌ ka it piniliꞌ ku nga mga taw.

⁸ Biyugtuꞌ ku kat pamegbeg it pamalay-balay ni David i dakulaꞌ nga kabagiꞌan it kaꞌadiꞌan ya ka ibiyagiꞌ ku na it imu. Temed unuka atkayan nga daꞌka nagpasbung it ki David ngayti nga siyunud ya it kamatuudan i mga urdin ku? Talagang tingled i nakem ya nga simnunud it kumpur kaꞌirgan ku. Purus talaga magayen kat panleteg ku i mga buwat ya.

⁹ Temed ikaw, talagang subraꞌ paꞌ it karaꞌe-raꞌetan it muꞌsang nakauꞌnat imu i karaꞌe-raꞌetan nga binwat mu. Naꞌangut mu nay iseg ku kat mga binwat mu ngayan nga pagsambaen nga mga ladawan nga tiyunaw nga bulawan i binwat. Talagang tinibabaꞌ mu na aku.

¹⁰ Aypaꞌ, sabap it binwat mu ngaytu, rigaen ku it ega pateng i mga kaꞌanakan mu. Talagang puuꞌun ku sira nga muꞌsa nga mga lalaki. Egay maꞌped, gurang, mangaꞌwaꞌ. Kalgisen ku talaga situt bangsa nga Israel i kaꞌanakan mu, Jeroboam. Ipasbung ku it marignaꞌ nga pagꞌawaꞌen it pagayen-gayen.

¹¹ Kayti, in siyu-siyu it mga kaꞌanakan mu i duꞌut lansangan i patayan ya, agden talaga it keꞌdeng. In duꞌut uma i patayan ya, mga tarwangin i maged. Muꞌsa ngaytu, ampang tu it AMPUꞌANG DIYUS.’”

Ganti mangganti i magꞌadiꞌ duꞌun it Israel [Mga 924 seked it 869 B.C.]

²⁰ Nagꞌadiꞌ si Jeroboam duꞌun it Israel seledan it duwang puluꞌ baw duwang taꞌun parabir naꞌbut i kanyang depa. Pagpatay ya, siyubli i pagkaꞌadiꞌ ya it anak ya nga si Nadab.

Ega gasiꞌ magayen i pagbuwaten it mga taga Juda

²² Duꞌun gasiꞌ it Juda, naꞌabat gasiꞌ it mga taw duꞌun i kaꞌimun it AMPUꞌANG DIYUS sabap it karaꞌe-raꞌetan nga pamagbuwaten nira, nga subraꞌ paꞌ it karaꞌe-raꞌetan nga siyarit buwat it mga kagiyaringanan nira.

²³ Ka nagbuwat gasiꞌ sirat kanira nga papagsambaan. Baw duꞌun it sagpaw it kada mungsuꞌ, u duꞌun it siꞌrung it kada kayu nga maluꞌgum, nagpatindeg sira it mga pagsambaen nira nga batu baw mga piyakaꞌarigi nga ladawan it pagpangaranan it Ashera.

²⁴ Puyra paꞌ it iti ngayti, duꞌut mga papagsambaan nira ngayti may mga taw nga, katengdanan nira, magpagamit it bilug nira kat in siyu-siyuy magsamba duꞌun. Lalaki paꞌ maka i mga magpagamit ngayti. Talagang giyuru na nira i karaꞌe-raꞌetan it mga bangsa nga piyuuꞌ it AMPUꞌANG DIYUS, iyan pagꞌabut it mga Israelita ngayti duꞌun.

²⁵ Pagpapuꞌun ni Nadab it nagꞌadiꞌ duꞌut Israel, duwang taꞌun nay pagꞌadiꞌ ni Asa duꞌut Juda. Temed duwang taꞌun lamang i kaꞌlay it pagꞌadiꞌ ni Nadab ngayti.

²⁶ Sabap karaꞌe-raꞌetan ga i binwat ya kat panleteg it AMPUꞌANG DIYUS. In unuy karaꞌe-raꞌetan nga binwat it amaꞌ ya nga ipiyagkasalaꞌan it mga Israelita, ipiyasigi ya naga.

²⁷ Ega nga matuud naꞌlay i pagꞌadiꞌ ni Nadab ngayti ka inagaw ni Baasa, nga anak ni Ahias nga kat kuyunang mga tungtung-inapuꞌ ni Isacar. Iyan riyumpak ni Nadab baw mga sundaluꞌ ya i Gibeton, nga esang lansangan nga naꞌagaw it mga Filisteo it tagnaꞌ, inimatay kanya ni Baasa ngayti.

²⁹ Pagkaꞌagaw ni Baasa it pagkaꞌadiꞌ, imbus ya it pangimatay i muꞌsang kuyunan ni Jeroboam, subung nat inampang ngayti it AMPUꞌANG DIYUS nga ipiyaꞌampang ya it prupitaꞌ ngayti nga si Ahias nga taga Silo.

³⁰ Atkayti i nabetangan it kuyunan ngayti ni Jeroboam sabap it mga kasalaꞌan ya, nga iti i ipiyagkasalaꞌan it mga sinakepan ya nga mga Israelita. Aypaꞌ ka naꞌangut ya talagay iseg it AMPUꞌANG DIYUS.

Pagꞌadiꞌ ni Abiam duꞌun it Juda [Mga 928 seked it 926 B.C.]

³¹ Pagkaꞌbut it ki Roboam ngayti nga kapaladan, ilimbeng kanya duꞌun it susubliyen nira nga kalelbengan nga duꞌun it pagpangaranan it Siyudad ni David. Inaꞌ ni Roboam ngayti, si Naama nga taga Ammon. Simnubli it pagkaꞌadiꞌ ni Roboam ngayti, anak ya nga si Abiam.